خه‌لك د ڤێ‌ هه‌لبژاردنێ‌ دا ل چ دگه‌رێت؟

سالح زێباری

هه‌لبژاردن وه‌ك ئێك ژ ستین و پره‌نسیپێن دیموكراسیێ‌ و مافێ‌ گه‌لی ل سه‌ر بریار دانا چاره‌نیسیێ‌ خوه‌، د چه‌ند فلته‌ران را ده‌رباز دبیت ژ هه‌میان گرنگتر ژی هه‌وا هه‌لبژارتنانه‌ و نها خه‌لكێ‌ كوردستانێ‌ به‌ره‌ڤ پرۆسەیا هه‌لبژارتنان دچن بۆ دیاركرنا نونه‌رێن خوه‌ ل په‌رله‌مانێ‌ كوردستانێ‌ كو فه‌ره‌ دیڤ یاسا و رێسایێن كوردستانێ‌ هه‌می ئالیه‌ك پێگیر ببیت ب ده‌م و چاوانییا بانگه‌شێ‌.
لیستێن ڤه‌كری پتر ده‌رفه‌ت ب ده‌نگده‌ری دایه‌ ب ئازادی كه‌سه‌كێ‌ هه‌ژی ده‌ست نیشانبكه‌ت بۆ هندێ‌ ببیته‌ نوونه‌رێ‌ وی، هه‌روه‌سا ژ ئالیه‌ك دیتر ڤه‌ ده‌رفه‌ته‌ك باش ژی ب به‌ربژێری دایه‌ ب هه‌می شیان كار بكه‌ت بۆ ده‌ست ڤه‌ ئینانا باوه‌ریا خه‌لكی. لێره‌دا ئه‌و پرس تێـته‌ رۆژه‌ڤێ‌ كو ئه‌م دێ‌ ل گوتارێ‌ دا به‌حس ژێ‌ كه‌ین، خه‌لك ل چ دگه‌رێت؟ سیسته‌مێ‌ سیاسی و جڤاكی و ئابۆری و ئولی هه‌می پارتێن سیاسی نه‌چاركرینه‌ كو دیڤ نه‌رینێن ده‌نگده‌ری به‌ربژێران دیار بكه‌ن. نها ل كوردستانێ‌ دا چو پارته‌یەك نه‌شێت خوه‌ ژ سنورێن عه‌شیره‌تیێ‌ لابده‌ت بۆ دیاری كرنا به‌ربژێران ژ به‌ركو جڤاكێ‌ كورده‌واری ب خوینده‌وار و نه‌خوینده‌وار ڤه‌ هه‌تا راده‌كێ‌ زۆر پێگیره‌ ب عشیره‌تیێ‌ ڤه‌. هه‌روه‌سا دیاری كرنا كه‌ساتیێن ئولی ژی بووینه‌ هژماره‌ك مه‌زن ل ڤێ‌ پرۆسەیێ‌ ئه‌و ژی بۆ وی پێگه‌هێ‌ وان یێ‌ گرنگ د زڤریت د ناڤ جڤاكی دا .هه‌روه‌سا میدیاكار و هونه‌رمه‌ند و سیاسێن دیار ژی د ڤێ‌ هه‌ڤكێشێ‌ دا خوه‌دی ده‌نگن. به‌رامبه‌ر ڤێ‌ چه‌ندێ‌ د كوردستانێ‌ وه‌كی هه‌ر ده‌ڤه‌ره‌كا دی یا عیراقێ‌ و هه‌تا رۆژهه‌لاتا ناڤین ئیسرائیل تێنه‌بیت! هه‌می ل سه‌ر ئاستێ‌ عشیره‌تی و ئولی و مه‌زهه‌بی و كارێزما و هێز و دیرۆكا پارتێ‌ ده‌نگی دده‌ن.
ئه‌م نها بێین ڤێ‌ پرسێ‌ بكه‌ین، ئه‌رێ‌ ده‌نگده‌رێ‌ مه‌ ل سه‌ر جادێ‌ چ دڤێت؟ پشتی ریبریبوونا كوردستانێ‌ ب مه‌زنترین كریزا دارایی ئه‌و ژی ب ئه‌گه‌رێ‌ داكه‌فتنا بهایێ‌ پەترۆل و هاتنا هژماره‌كا زۆرا ئاواره‌ و په‌نابه‌ران ل ناڤخوە و ده‌رڤه‌ و ئیداره‌دانا خراب و قوتكرنا بودجێ‌ كوردستانێ‌ ژ ئالیێ‌ به‌غدا ڤه‌ و هه‌روه‌سا كریزێن سیاسی و گه‌فێن سه‌ربازی و خیانه‌ت و دورپیچێا ل سه‌ر كوردستانێ‌. نها ئه‌ڤ سه‌روبه‌ره‌ سوپاس بۆ خودێ‌ هه‌تا راده‌كێ‌ باش به‌ره‌ف ته‌مام بوونه‌ و وه‌كی سه‌رۆكێ‌ حكومه‌تێ‌ د چه‌ندین جاران دا راگه‌هاندییه‌ كو كوردستان به‌ره‌ڤ ئاینده‌یه‌كێ‌ گه‌شه‌ و رۆژێن خوشتر و باشتر و گه‌شتر ل پێشیا مه‌نه‌ و ئه‌ڤ كریزه‌ به‌ره‌ف داویێ‌ نه‌. ئه‌ڤ چه‌نده‌ ل پێش چاڤ ژی دیاره‌ و كاریگه‌ریا كریزان هه‌تا راده‌كێ‌ كێمتر بوویه‌ و خه‌لكی نها دڤێت:
– هه‌بوونا ئێكرێزییێ‌ د ناڤبه‌را هه‌می ئالیێن سیاسی دا بوو هندێ‌ زێده‌تر كریز ریبریێ‌ وان نه‌بن و به‌رده‌وام گۆتنا وان ئه‌وه‌ دبێژن (تنێ‌ هه‌ژار یێ‌ خوساره‌ته‌) ب راستی فه‌ره‌ به‌ربژێر و پارتێن كوردستانی ژی ڤێ‌ گوتنێ‌ ب گرنگ وه‌ربگرن و نه‌هێلن ئه‌ڤ هه‌وه‌ و پرۆسه‌یه‌ ببیته‌ فاكته‌رێ‌ زێده‌بوونا لێك دیركه‌فتن و په‌یدابوونا كریزێن سیاسی و ئابۆری كوردستانێ‌ دا.
– ل كوردستانێ‌ هه‌میێ‌ بگه‌رێن چو ده‌نگده‌ره‌ك داخوازێ‌ ژ به‌ربژێران ناكه‌ت میتر و فرۆكه‌خانه‌ و تاوه‌رێن سه‌دان نهومی و ژیانه‌كا وه‌كی سوید و سویسرا ل ڤێ‌ رێ‌ بۆ ئاڤا بكه‌ن! لێ‌ كوردستانیان داخازیا سه‌ره‌كی كو دكه‌ن هه‌بوونا خزمه‌تگوزرایێن سه‌ره‌كی یه‌ ژ ئاڤ و كاره‌ب و جاده‌ و خواندن و ساخله‌می . له‌وما ب هیچ ئاوایه‌كێ‌ یا ره‌وا نیه‌ كو به‌ربژێر ب گۆتنێن مه‌زن و دیر ژ ژیواری پێكولا بده‌ست ڤه‌ ئینانا ده‌نگێن خه‌لكێ‌ ساده‌ بده‌ت. ئه‌گه‌ر ئه‌ڤرۆ به‌ربژێر ب گۆتنێن نه‌راست ده‌نگان بده‌ست بینیت ل ده‌ڤ خه‌لكی بێ‌ هیڤی بوون دروست دبیت و دگه‌هیته‌ راده‌كێ‌ باوه‌ری ب وی كه‌سی و سازیێن ده‌وله‌تێ‌ و پرۆسەیا سیاسی ژی نه‌مینیت.
– د سیسته‌مێ‌ ئابۆری دا ل كوردستانێ‌ دا نیزیكی (30%) خه‌لكێ‌ كوردستانێ‌ موچه‌خۆرێن حكومه‌تێ‌ نه‌! ب راستی هژماره‌كا نه‌ ل هندستان و نه‌ ل چینێ‌ هوسانینه‌! ئه‌ڤی مووچه‌ خوری ل به‌ربژێری دڤێت سوبه‌هی كار بكه‌ت بۆ گه‌رنتیكرنا مووچەیێ‌ وی ل دیڤ یاسایێن وه‌لاتی، هه‌روه‌سا كار بكه‌ت بۆ ڤه‌گه‌راندنا وێ‌ رێژا مووچه‌یی كو هاتییه‌ پاشكه‌فت كرن ژ بال حكومه‌تێ‌ ڤه‌ .
– خه‌لكێ‌ مه‌ د ڤێ‌ هه‌لبژارتنان دا ل وان كه‌سان دگه‌رێت كو بریار دای خۆ گوری وه‌لاتی بكه‌ن و خوینا خۆ بۆ ئازادی و سه‌ربه‌خۆیێ‌ رێشتی به‌رامبه‌ر داعش و حه‌شدێ‌. ب راستی ئه‌وان ریدانێن كو بووینه‌ هوكارێ‌ سه‌ره‌كی یێ‌ ماینه‌ڤا كیانێ‌ سیاسی و ده‌ستورێ‌ یێ‌ كوردستانێ‌ دێ‌ خالا ئێك لایكه‌ر بیت د ڤێ‌ هه‌لبژاردنێ‌ دا .
– خه‌لك ل ڤێ‌ هه‌لبژاردنێ‌ دا دێ‌ سزا هنده‌ك ئالیان ده‌ت كو نه‌شیان ببنه‌ ئه‌و كه‌س و به‌ربژێر و ئالی ئه‌وێن پێنج سالێن چووی باوه‌ری دایێ‌. هه‌روه‌سا ل سه‌ر وان كریار و پێنگاڤێن كو ل ده‌رڤه‌ی ئێكرێزیا ناڤ مالا كوردی هاتیه‌ هاڤێتن .
ل داویێ‌ فه‌ره‌ به‌ربژێر باش بزانن خه‌لك هه‌می ب ئێك تون و سۆز ناهێنه‌ رازیكرن، به‌لكی چه‌ند ته‌خ و چینن و ب چه‌ند تشتێن جودا رازی دبن و دڤێت كار بو رازیكرن و وه‌رگرتنا باوه‌ریا وان بكه‌ت بێ‌ بلاڤكرنا پرۆپاگنده‌ و دره‌وێن بێ‌ بها.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.