حکومەتا ھەرێمێ و بەلانسا بەرژەوەندییان

ژیوار عەبدولجەبار

کوردستان د ناڤا دلێ ئالۆزیێن رۆژھەلاتا ناڤەڕاست دایە، لەورا دوور نینە گەلەک جاران پرچکێن شەڕی ب گەھنە وێ ژی. گەفا مەزن د قووناغا بووری دا داعش بوو کو چو سیاسەت دگەل وێ نەدھاتنە بکارئینان، لێ بوو قووناغا نوو، ھەڤڕکییا سیاسەتێ دەستپێ کرییە و پرسیار دھێتە کرن؛ ئەرێ کوردستان دێ شێت بێی کو بکەڤیتە بن کارتێکرنا ئێکسەر یا وەلاتێن دەڤەرێ و دانا زیانێن زێدەتر، بەرژەوەندیێن خۆ پارێزیت و گەفان ژ خۆ دوور کەت؟
رۆژھەلاتا ناڤەڕاست ئەو دەڤەرا زێدەتری سەد سالانە زلھێز شەڕێ بەرژەوەندییان لێ دکەن، نھا کەفتییە د قووناغەکا نوو یا ھەڤڕکییان دا، زلھێزێن جیھانێ ب رێیا زلھێزێن ھەرێمی شەڕی ل سەر نێچیرێن بچووکتر دکەن. ئیراق و سووریا ژ دیارترین ئارمانجێن زلھێزێن ھەرێمی نە و ھەرێما کوردستانێ ژی دبیتە پشکەک ژ وان دەڤەران یێن ھەڤڕکی ل سەر دھێتە کرن، لێ یا کوردستانێ ژ وەلاتێن دی جودا دکەت، خالەکا گرنگە، ئەوژی پاراستنا بەرژەوەندیێن خۆ ب رێیا کێشانا بەرژەوەندیێن زلھێزێن جیھانی و ھەرێمی.
ل ھەرێما کوردستانێ د ھەیاما سالێن بووری دا، ھەست ب گەفا پشتی داعشێ دھاتە کرن، لەورا حکومەتا ھەرێمێ سیاسەتا ئابۆرێ ئازاد پەیرەو کر. ب رێیا وێ سیاسەتێ، بەرژەوەندیێن ئەمریکا، رۆسیا وەک زلھێزێن جیھانی و ئیران و تورکیا، زلھێزێن ھەرێمی کەفتنە کوردستانێ و گەر بەرژەوەندیێن وان وەلاتان نەبان، کرنا رێفڕاندۆمەکێ ب ئارمانجا سەرخوەبوونێ تا رادەیەکی دا زەحمەت بیت و ھەروەسا دەرئەنجام و شەڕێن پشتی رێفڕاندۆمێ ژی، دا گەلەک دژوارتر بن.
سیاسەتا ئابۆرێ ئازاد، بەلانسا پاراستنا بەرژەوەندیێن وەلاتان ل کوردستانێ بدەستڤە ئینایە و بەرانبەر وێ، ھەرێما کوردستانێ ژی وەک ژێدەر بۆ داھاتی و ھەروەسا وەک دروستکرن و بھێزکرنا پەیوەندیێن دگەل وەلاتان، مفای ژ پاراستنا بەرژەوەندیێن وەلاتێن دی دبینیت.
راستە دھێتە گۆتن کو تورکیا بەری رێفڕاندۆمێ پەیوەندیێن بھێز دگەل کوردستانێ ھەبوون و پشتی بیست و پێنجی ئیلۆنی، پەیوەندی ژ ڤی دەستی چووینە یێ دی، لێ گەر بەرژەوەندیێن تورکیا ل کوردستانێ نەبان، ھەر ژ رۆژا بڕیارا رێفڕاندۆمێ دھاتە دان، دشیا سنۆرێن خۆ دگەل کوردستانێ بگریت و ب گرتنا سنۆران ئیران ژی دا ئامادە بیت سنۆران بگریت و ھەرێم دا کەڤیتە بن دۆرپێچەکا تەمام. لێ تورکیا نە ژبۆ خاترا خەلکێ کوردستانێ و نە ژبۆ خاترا چو وەلاتان ژی، بەلکو بۆ پاراستنا بەرژەوەندیێن خۆ، سنۆر نەگرتن و نەگرتنا سنۆران ھەرێم ژ دۆرپێچەکا تەمام پاراست کو ئەوژی وێ سیاسەتێ ڤەدگەڕیت یا بەلانسا بەرژەوەندیێن وەلاتان پاراستین.
ژ ئالییەکێ دی ڤە، حکومەتا ھەرێما کوردستانێ شیا مەزنە کۆمپانیێن پەترۆل و غازا سرۆشتی یێن جیھانی بکێشیتە کوردستانێ کو کۆمپانیێن مینا رۆزنەفت و دانە گاز و چەندین کۆمپانیێن دی نھا رێکەفتن دگەل ھەرێما کوردستانێ ھەنە. پاراستنا بەرژەوەندیێن ڤان کۆمپانییان ژی، پاراستن و ئارامییا کوردستانێ گەرەنتی دکەن.
ھەبوونا پەیوەندیێن ئابۆری و بەرژەوەندیێن وەلاتان، ب رەنگەکێ ئێکسەر دبیتە ئەگەرێ بھێزبوونا پەیوەندیێن دپلۆماسی و ھەبوونا ب دەھان کونسۆلخانە و نوونەراتیێن وەلاتێن بیانی ل کوردستانێ، ب رەنگەکێ ئێکسەر کارتێکرنێ ل سەر گرنگیا پاراستنا ئارامیا کوردستانێ بۆ وەلاتێن رۆژئاڤا دکەت. ھەرچەندە گەلەک جاران دھێتە گۆتن کو د شەڕێن ڤێ دوماھیێ یێن دگەل سوپایێ ئیراقێ دا چو وەلاتان خوە ل کوردستانێ نەکرە ھەڤال، لێ گەر بیرا خۆ ل نێزیکبوونا گەفا داعشێ بۆ سەر ھەولێرێ بینین، دێ گرنگیا پاراستنا ئارامییا ھەولێرێ ھێتە بیرا مە.
ھەموو سیاسەتێن حکومەتا ھەرێما کوردستانێ بەر ب وێ یەکێ دچن کو بەلانسا بەرژەوەندییان تێدا پاراستی بیت و ب پاراستنا بەرژەوەندیان، ھەرێمەکا مینا کوردستانێ کو د ناڤبەرا زلھێزێن ھەرێمی دایە، ب رەنگەکی باشترە ژ کو ب ئالییەکێ دیارکری ڤە گرێدای بیت و کوردستان ببیتە جھێ ھەڤڕکییا زلھێزێن دی.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.