حکومەتا ھەرێمێ دێ راپۆرتا ١٠٠ رۆژی یا پرۆژەیێن خوە بەلاڤ کەت

حکومەتا ھەرێمێ دێ راپۆرتا ١٠٠ رۆژی یا پرۆژەیێن خوە بەلاڤ کەت

WAAR-دهۆك:

جڤاتا وەزیرێن ھەرێما کوردستانێ ئەڤرۆ سپێدێ کۆم بوو و مەسروور بارزانی راگەھاند: د رۆژێن بھێن دا دێ راپۆرتا سەد رۆژی یا کار و پرۆژەیێن حکومەتێ بۆ رایا گشتی ھێت بەلاڤکرن.
جڤاتا وەزیرێن ھەرێما کوردستانێ ئەڤرۆ سپێدێ ب سەرۆکاتییا مەسروور بارزانی، سەرۆکێ حکومەتێ کۆم بوو و گۆتوبێژا رەوشا سیاسی و سەربازی یا دەڤەرێ و ئامادەکاریێن پێشوازییا ئاوارەیێن رۆژئاڤایێ کوردستانێ و پەیوەندیێن ھەولێر و بەغدایێ کر، سەرۆکوەزیر بارزانی راگەھاند: نێزیکە سەد رۆژ ب سەر ژیێ حکومەتا ھەرێمێ دەربازببن، بۆ ڤێ یەکێ ژی حکومەت دێ راپۆرتەکا کار و پرۆژەیێن خوە بەلاڤ کەت، ژبەرکو حکومەت یا خەلکی یە و بۆ خزمەتا خەلکی یە، لەو پێدڤییە ھایداری ئەرکێن وێ ببن.
دەربارەی رۆژئاڤایێ کوردستانێ ژی، سەرۆکێ حکومەتێ ئامادەییا ھەرێمێ بۆ پێشوازی و خزمەتا ئاوارەیان نیشاندا و دیار کر، تا نھا پتری ھەشت ھزار ئاوارەیان ھاتینە و ھەرێم پێدڤی ھاریکارییا حکومەتا ئیراقێ و جڤاکا نێڤدەولەتی یە.
ل دۆر پەیوەندیێن ل گەل بەغدایێ ژی، مەسروور بارزانی دیار کر، حکومەتێ کۆمەکا راسپاردە و پێشنیازان بۆ چارەکرنا کێشەیان داینە حکومەتا ئیراقێ و نھا چاڤەرێی بەرسڤێ یە.
ھەر د کۆمبوونا ئەڤرۆ دا، جڤاتا وەزیران بۆ رێکخستنا کاری و نەھێلانا رۆتینێ و کێمکرنا خەرجییان بریار دا ھەر وەزیرەک پێداچوونا ھەیکەلێ وەزارەتا خوە بکەت.
ھەروەھا پرۆژێ وەزارەتا کاروبارێن جڤاکی یێ گرێدانا زارۆیان ب خێزانێن جێگیر ژی ڤە ب رەنگەکێ مەبدەئی پەسەندکر، ب مەرجێ چەند گھۆرینان د ناڤەرۆکا پرۆژەی دا، دیسان بریاردا سەرەدان و رێککەفتن و دکیۆمێنتێن فەرمی یێن شاندێن حکومەتێ ژی بھێن رێکخستن و دیڤچوون بۆ ھەبیت.

بابه‌تێن ب ڤێ مژارێ ڤه‌ گرێدای