حکومەتا هەرێمێ ئێک مەرجێ نەگۆر بۆ دەستپێکرنا دانوستاندنان هەیە

WAAR-دهۆك:

سەرکردایەتییا ئیراقێ ژ شازدەی مەها 10 تا نها ژی، عەقلیەتا ژێ دهاتە پێشبینی کرن و یا بەری نها سەرکردایەتیێن ئێک ل دووڤ ئێک پەیرەو کری، دوبارە کرە ڤە. ڤێ جارێ بەهانەیا ئیراقێ بۆ ب سەرداگرتنا کوردستانێ، رێفڕاندۆما سەرخوەبوونا کوردستانێ بوو، لێ ئەگەر ئەم ل ژمارەکا خالان ڤەگەڕین، دێ تا رادەیەکی پشتڕاست بین کو گەر رێفڕاندۆم نەهاتبا کرن ژی، بەغدا دا هەمان هەلویستێن نها هەبن.

د ڤی بابەتی دا ناخوازم زانیاریێن هەموو دزانن دەربارەی شەڤا شازدە سەر هەڤدە و روودانێن کەرکووکێ دوبارە بکەم. بەلێ خالا گرنگتر یا من دڤێت سەر براوەستم ئەوە کو ئەرێ ل هەرێما کوردستانێ دهاتە گۆتن کو رۆژا پشتی رێفڕاندۆمێ دێ سەرخوەبوون هێتە راگەهاندن؟ ئەرێ بەری رێفڕاندۆمێ ژی، حکومەتا هەرێمێ هەر داخوازا دانوستاندن و بجهئینانا دەستوورێ ئیراقێ نەدکر؟ گەر رێفڕاندۆم نەهاتبا کرن، ئیراق دابیتە شاما شەریف کو ئێکڕێزی و سەقامگیری و ئاساییشا هەموو پێکهاتەیان تێدا پاراستی بیت؟ و ئەرێ حکومەتا هەرێما کوردستانێ ئامادەیە ب مەرجێن بەغدا دەست ب دانوستاندنان بکەت؟

حکومەتا ئیراقێ بەری رێفڕاندۆما سەرخوەبوونا کوردستانێ، زێدەتری 55 مادەیێن دەستووری بنپێ کربوون، هەموو داخوازیێن هەرێما کوردستانێ، بجهئینان و پێگرییا حکومەتا ئیراقێ ب دەستووری بوو، لێ حکومەتێن ئیراقی، ژبلی کو بۆ بندەستکرنا کوردان و لاوازکرنا وان، ئامادە نەبوون دەستووری بجهـ بینن، هەموو دەمان، هەرێما کوردستانێ وەک دوژمنەک نیشا پێکهاتەیێن دی یێن ئیراقێ ددا و باشترین بەلگە ئەوە کو هەر پارتا سیاسی یا ئیراقی یا د هەلبژارتنان دا زێدەتر دژایەتییا کوردستانێ کربا، زێدەتر دەنگ بدەستڤە دئینان. سەرکردەیێن ئیراقی هەموو دەمان ژبەر نەبوونا بەهانەیان بەرانبەر پێشڤەچوونا بلەز ل هەرێما کوردستانێ و ڤەشارتنا گەندەلییا ل ئیراقێ هەیی، هەرێما کوردستانێ ل بەر چاڤێن پێکهاتەیێن دی یێن ئیراقێ رەش دکر و سووچێن جودا ددانە پال وێ. لێ ئەڤە هەمی بەس نەبوو کو ئەو روویێن خوە پێ سپی بکەن، لەورا دەست ب بڕینا نیڤ بودجەیا ژ بەغدا بۆ هەرێما کوردستانێ دهات، کرن.

ژبلی بابەتێن گرێدای بودجەیا هەرێما کوردستانێ، ئیراقێ چو دەمان دەلیڤە نەددا دەستپێکرنا دانوستاندنێن رژد دەربارەی بجهئینانا دەستووری، هەردەم باوەری ب بکارئینانا هێزێ هەبوو و گەفێن حکومەتا بەری نوکە یا مالکی ژی، ژ نموونەیێن عەقلیەتا ئیراقێ یە.

نوکە ژی، ژبەر کو کوردستانێ رێفڕاندۆم کرییە و ئەنجامێن وێ رۆن و ئاشکرا نە، ئیراق دوبارە مەنتقێ هێزێ بکار دئینیت، ژبلی هەموو هێز و گرۆپێن چەکدار یێن ناڤخۆ یێن ئیراقێ، ژمارەکا سەرکردەیێن بەغدا ئامادەنە هێزێن دەرەکی ژی دژی کوردان بکار بینن و ئەڤە ل دەمەکی کو ل گۆری دەستوورێ ئیراقێ، هەرێما کوردستانێ هەرێمەکا فەرمی یە د چارچۆڤەیێ ئیراقەکا فیدڕال دا.

سەرکردەیێن ئیراقێ، وەکی ئەوا تا نوکە نیشا کوردستانێ داین، نە باوەری ب دەستووری، نە ب فیدڕالیەتێ، نە ب پێکڤە ژیانێ، نە ب دانوستاندنان و نە ب چو رێیێن ئاشتیانە هەیە. وان دڤێت ب هێز هەر تشتەکێ ئەو دخوازن ل سەر هەرێما کوردستانێ بسەپینن، لێ هەرێما کوردستانێ ل پردێ و زومار و چەندین دەڤەرێن دی، بۆ بەغدا دوپات کر کو ئاشتیخوازییا کوردستانییان سنۆر هەنە و کێشە ب بکارئینانا هێزێ چارە نابن.

خالا هەر ژ دەستپێکێ هەرێما کوردستانێ باوەری پێ هەیی، دەستپێکرنا دانوستاندنانە د چارچۆڤەیێ دەستوورێ ئیراقێ دا، لێ ئیراقی ئامادە نینن پێگری دەستوورێ وەلاتێ خوە بن و خواستا سەرکردەیێن ئیراقێ تا نها تنێ بێهێزکرنا هەرێما کوردستانێ یە و بڕیارا کێمکرنا بودجەیا هەرێمێ بۆ دوازدە ژ سەدێ، بەلگەیەکا دی یا نیازێن حکومەتا بەغدا یە.

گریمان: هەرێما کوردستانێ رێفڕاندۆما سەرخوەبوونێ ل بیست و پێنجی ئیلۆنێ نەکرییە، پارتێن دەستهەلاتدارێن ئیراقێ د هەیاما چار سالێن بووری دا، کارەکێ هند مەزن کربوون کو بانگەشەیا هەلبژارتنێن گولانا بهێت پێ بکەن؟ دەستهەلاتدارێن ئیراقێ باژێڕێن ئیراقی یێن د دەست داعش دا ب ناڤ رزگار کرینە، لێ هەموو تەڤدا کاڤل کرینە، خەلکێ وان دەڤەران ژی ئامادە نینن دوبارە باوەرییا خۆ بدەنە سەرکردەیێن شیعی و هەڤپەیمانێن وان یێن سونی.

حکومەتا هەرێما کوردستانێ بۆ دەستپێکرنا دانوستاندنێن رژد دگەل بەغدا، د ئامادەباشییەکا تەمام دایە، لێ تاکە مەرجێ هەرێما کوردستانێ کو دەستبەرداریێ ژێ نەکەت ئەوە کو دانوستاندن د چارچۆڤەیێ دەستووری دابن. ئەو دەستوورێ 17% یا بودجەیا ئیراقێ ب هەرێمێ ددەت، دەستوورێ کێشەیێن دەڤەرێن گرێدای مادەیێ سەد و چل ب رێفڕاندۆم و سەرژمێری چارە دکەن، ئەو دەستوورێ رێ نەدەت سوپایێ ئیراقێ بچیتە د ناڤا چو باژێڕان دا، هەروەسا ئەو دەستوورێ رێ نەدەت پۆلیسێن فیدڕال ژ بەسرا و بەغدا بەرەڤ باکۆری بهێن و حوکمی ل کەرکووکێ بکەن و دەستوورێ قەبوول نەکەت وەلاتێن دەردۆر هێزێن ئیراقی بۆ ژناڤبرنا پێکهاتەیەکا ئیراقێ بکار بینن.

ل دوماهیێ پێدڤییە لبەرچاڤ وەرگرین کو دبیت نوکە حکومەتا ئیراقێ رازی نەبیت دەست ب دانوستاندنان بکەت، لێ هەر دەمێ بەغدا بهێتە ئاشێ هویر و داخوازا دانوستاندنان بکەت، پێدڤییە سەرکردایەتییا هەرێمێ خودان ئێک هەلویست بیت و هەروەسا پێدڤییە هەموو ئالیێن سیاسی یێن هەرێمێ، پشتەڤانێن ناڤەڕۆکا ئەجێندایا حکومەتا هەرێما کوردستانێ بۆ دانوستاندنان بن.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.