حه‌ردۆی دڤێت ببته‌ په‌ڕله‌مانتار!

بلند محمد 

 

برا هه‌كه‌ ئه‌ز ببامه‌ په‌ڕله‌مانتار، دا من خانییه‌كێ ب مه‌خزه‌ن و ئاخر مۆدێل و ترومبێله‌كا مۆنیكا و ره‌سیده‌ك ل بانكێ هه‌بت و ب خودێ هه‌ى و هه‌یى دا ئه‌ز بم و چو حیساب ژى لسه‌ر من نه‌دبوون، به‌س قه‌دا ب زه‌مانى بكه‌ڤت، ما مه‌ زانى هۆسایه‌!.
سوحبه‌تێن چایخانێ، ژ وێ چایێ گه‌رمتر بوون یا بۆ خه‌لكى دهاته‌ پێشكێشكرن و ژ نشكه‌كێڤه‌ كه‌سه‌كى كو بره‌خڤه‌ یێ روونشتى بوو گۆتێ:
– حه‌ردۆ، بیلله‌هـ زه‌ڤله‌كێن ته‌ یێن كرێكارانن، ته‌ و په‌ڕله‌مانان چ ژێكه‌!

– عه‌زیزێ من، زه‌ڤله‌كێن من بۆ چنه‌؟ ئه‌زێ ل وه‌لاته‌كێ بێكار دژیم، ئه‌رێ باوه‌ر بكه‌ زه‌ڤله‌كێن من تێرا هندێ هه‌نه‌ كو پتر سه‌د كیلۆیان راكم. به‌س هه‌كه‌ مرۆڤ بوو په‌ڕله‌مانتار ته‌ پێدڤى ب زه‌ڤله‌كا نابت و تنێ دێ مینت ئه‌زمان و بۆ هندێ ژى برایێ ته‌ یێ بێ منه‌ته‌. یان خودێ حه‌سكه‌ت ڤان زه‌ڤله‌كان دێ بمه‌ خارج و پێ شۆلكم.

– به‌س هه‌ر په‌ڕله‌مانتارى نه‌ شۆلا ته‌یه، چۆنا خارج ژى زوزێ پێ دڤێن كوڕێ ده‌یكا خوه‌.

نوكه‌ حه‌ردۆ كرێداره‌ و خوده‌ى خێزانه‌ و پێدڤى ب پاره‌ى هه‌یه‌ و دا بشێت كرێیا خانى بدت و زاڕۆیێن خوه‌ ژى ب جوانى خوه‌دى بكت، وه‌كه‌ ئه‌و دبێژت، زه‌ڤله‌ك هه‌نه‌ و كار نینه‌ و كارێ وى شۆفێرێ ته‌كسیێیه‌، ل باژێڕكێ وێ یێ ب قاسى گونده‌كى ژى، خوه‌ مرۆڤ ژى هندى ترومبێلان لسه‌ر جاده‌یان نینن، ڤێجا دێ ژ كیڤه‌ نه‌فه‌ر هه‌بن كو ل گه‌ل وى سوار بن؟! دێ ڤێجا حه‌ردۆ وه‌ره‌ د سه‌ر كرێیا خانى ره‌، حه‌قێ ئاڤ و كاره‌با ژى بده‌ و سه‌یارێ ببه‌ كاشێ و سالانه‌ زه‌ریبا وێ ژى بده‌، وه‌ى پا گێره‌ ژ ته‌ چێبوون حه‌ردۆ. له‌وا جامێرى یێ هه‌قه‌ هزر ل كارێن باشتر بكت، ئه‌و نوكه‌ دناڤا نال و بزماران ده‌یه‌.

حه‌ردۆ، كو نموونه‌یێ گه‌له‌ك ژ ڤى خه‌لكییه‌، خه‌ونا وى ئه‌و بوو بچیته‌ ژ ده‌رڤه‌، لێ وێ رێیا هات و باتێ ژى دراڤ دڤێت. دێ ته‌كسیێ فرۆشیت، به‌لێ پێ ناگه‌هیته‌ ئیبراهیم خه‌لیل. باشه‌ ژ وێرێ وێڤه‌ دێ چ كت؟ ئه‌و وه‌غه‌ر ژى ب ده‌ستڤه‌ نا‌هێت. دوماهى خه‌ونا وى ئه‌و بوو ببته‌ په‌ڕله‌مانتار! په‌ڕمانتارى كاره‌ك مه‌زمۆنه‌ بۆ دابینكرنا ژیانێ، لێ حه‌ردۆیێ نه‌ خوانده‌ڤان ل ڤى وه‌لاتى دێ چاوا بته‌ په‌ڕله‌مانتار؟ گه‌له‌ك ب زه‌حمه‌ته‌.
دناڤبه‌را خه‌ون و ژیوارى ده‌، كه‌سێ كورد دژیت و خوه‌ هلاویستى هنده‌ك خه‌ونان دبینت و لسه‌ر وان خه‌ونان به‌رده‌وامیێ ب ژیانا خوه‌ یا وه‌كو مه‌ها ئادارێ پڕی خۆشى و نه‌خۆشى ددت. ئه‌ها یێ ل هیڤیێ ئه‌لنده‌كا گه‌ش و رۆهن ل هنداڤى ڤى وارى ب هه‌لت و بژین بۆ ژیانێ، نه‌كو راوه‌ستیایى ل هیڤیا مرنا خوه‌ بین.

نوكه‌ بۆ رزگاركرنا كه‌سێن د كاودانێن مینا حه‌ردۆیی دا دژین، مه‌ پێدڤى ب چاكسازییان هه‌یه‌ و حوكمه‌ت ده‌لیڤێن كارى ڤه‌كت بتایبه‌ت د كه‌رتێ چاندنێ دا كو كوردستانێ گه‌له‌ك ئه‌رد هه‌یه‌ و دشیاندایه‌ مفا ژێ بهێته‌ وه‌رگرتن و خوه‌دى زه‌ڤله‌كێن مینا حه‌ردۆیی بكار بكه‌ڤن و هزرا ده‌رڤه‌ نه‌كن و وه‌لات ئاڤه‌دان بت‌.

 

بابه‌تێن ب ڤێ مژارێ ڤه‌ گرێدای