وار – دهۆک :
ل شه‌مبییا بهێت لسه‌رانسه‌رى جیهانێ ته‌ماشه‌ڤانێن ته‌پاپێى و بتایبه‌ت پشته‌ڤان و حه‌ژێكه‌رێن خولا ئسپانیا دێ به‌ره‌ڤ یاریگه‌ها سه‌نتیاگۆ برنابیۆ چن ژبوو دیتنا یارییا 226ێ یا دناڤبه‌را هه‌ردو یانه‌یاندا دهێته كرن و تێدا ریال 90 سه‌ركه‌ڤتن به‌رامبه‌ر 88 سه‌ركه‌ڤتنان بوو به‌رشه و زێده‌بارى 48 وه‌كهه‌ڤییان، ریال شیایه 328 گۆلان تۆماربكه‌ت و به‌رامبه‌ر 307 گۆلان بۆ به‌رشه‌لۆنا، یاریا شه‌مبییا بهێت ژ كلاسیكۆیا ئسپانییا دناڤبه‌را هه‌ردو یانه‌یاندا دێ هێته كرن، ژبه‌ر گرنگییا ڤێ یاریێ و حه‌ژێكه‌رێن هه‌ردو تیمان رۆژنامه‌یا وار ب فه‌رزانى راپرسینه‌كێ و راپۆرته‌كا جۆدا لسه‌ر گرنگییا وێ به‌رهه‌ڤ بكه‌ت، لێ وه‌كو یا دیار كو ئه‌نجامێن راپرسینى و بۆچۆنێن وه‌رزشڤانان ژێكجۆدا بوون، بۆ پتر پێزانینان دڤێ دویڤچوونێ دا بخوینن:
لده‌ستپێكێ ئه‌وس ئه‌كره‌م ئێك ژ حه‌ژێكه‌رێن ته‌پاپێى دبێژیت، ب دیتنا من ئه‌ڤ یارییه بۆ هه‌ردو تیما دێ گه‌له‌ك یا بهێز بیت و به‌رشه‌لۆنا دێ مفاى ژ شیانێن یاریكه‌رێ خۆ سوارێزى بینیت و كو ئه‌ڤه دێ بیته یارییا وى یا ئێكێ یا فه‌رمى دگه‌ل به‌رشه و به‌رامبه‌ری وێ ریال ژى خۆدان یاریكه‌رێن بهێزه و پێكهاتێ وان یێ دورسته و بێ كێماسى تنێ گارێس بێل نه‌بیت كو یێ د شكێ دا یاریێ بكه‌ت و ئه‌ز نابینم نه‌پشكدارییا وى كارتێكرنێ ل ئاستێ ریال بكه‌ت و ب مه‌رجه‌كی كو كریستیانۆ لسه‌ر ئاستێ خۆ یێ بۆرى ب مینیت، بۆچوونا من دێ یارى ب وه‌كهه‌ڤى بدوماهی هێت.
ژلایه‌كێ دویڤه هاریكارێ راهێنه‌رێ یانه‌یا گاره ئاراز سلێمان دبێژیت، هه‌موو ده‌ما یاریێن كلاسیكۆیێ جوداهییه‌كا به‌رچاڤ هه‌یه ژ یاریێن دى، هه‌رچه‌نده كو لڤێ دوماهیێ یانه‌یا مه‌له‌كى د باشترین ئاست دایه و تیمه‌كا ب رێكوپێكه و بتایبه‌ت پشتى دو ئه‌نجامێن لاواز د خولێ دا داین، لێ ئه‌ز دبینم به‌رشه‌لۆنا نێزیكتره ب سه‌ركه‌ڤیت.
هه‌ر وه‌سان فاتما جیهاد یاریكه‌را هه‌لبژارتیێ ئیراقێ یا تێنسا ئه‌ردى دبێژیت، دڤێ یاریێ دا دێ نومره‌یێن پیڤاى په‌یدابن و هه‌ر تیمه‌ك و یاریكه‌ره‌ك دێ بزاڤێ كه‌ت بده‌ستخۆڤه بینیت و ئه‌ز دبینم كو دێ یارى ب وه‌كهه‌ڤى ب دوماهی هێت.
هه‌روه‌سان سه‌روه‌ر یوونس ئێك ژ پشته‌ڤانێن به‌رشه‌لۆنا دبێژت، دێ یاریه‌كا بهێز و پڕ هه‌ڤڕكى بیت، ئه‌وژى ژبه‌ر شكاندنا نومره‌یێن پیڤاى دناڤبه‌را هه‌ردو تیمان بتایبه‌ت ژلایێ یاریكه‌ر مێسى ڤه بۆ باشترین گۆلگه‌رێ خولا ئسپانییا و گۆلكه‌رێ كلاسیكۆیا ئه‌وا هه‌تا نۆكه 21 گۆل تۆماركرین، هه‌ر وه‌سان به‌رشه دێ هه‌موو شیانان مه‌زێخیت تۆڕا گۆلا خۆ هه‌ر بهێلیت پاقژ و چ گۆل لسه‌ر نه‌هێنه كرن، به‌رامبه‌ر وێ ریال دێ ب هێز یاریێ كه‌ت و ئه‌وا د یاریێن بۆریدا هژماره‌كا زۆر یا گۆلان تۆماركرین، نه‌كرنا گاریس بێل و پشكدارییا سوارێزى دێ تایبه‌تمه‌ندییه‌كا دى لسه‌ر ئاستێ هه‌ردو تیمان هه‌بیت، بۆچوونا من دێ به‌رشه‌لۆنا ب سه‌ركه‌ڤیت و جوداهیا خالان دناڤبه‌را خۆ و ریالێ كه‌ته 7 خال.
ل دوماهیێ رۆژنامه‌ڤانێ وه‌رزشى ئه‌یسه‌ر مسته‌فا دبێژیت،
ئه‌گه‌ر به‌رێ خوبده‌ینه یاریێن ڤێ دوماهیێ یێن هه‌ردو یانه‌یان دێ بینین كو ئاستێ یانه‌یا ریال باشتره ژ ئاستێ یانه‌یا كه‌ته‌لونی و ئه‌س دبێژم كلاسیكۆیا ڤێ جارێ دێ د به‌رژه‌وه‌ندیا یانه‌یا ریالدا بدوماهیك هێت، چۆنكه ستێرا وێ كریستیانۆ رونالدۆ یێ د خۆشترین رۆژێن خۆدا دبوریت و راسته هێلا به‌ره‌ڤانییا یانه‌یا ریال نه ژ هێلێن باشه، به‌لێ هێلا ناڤین و هێرشبرنێ دێ بنه رێگر ل هه‌مبه‌ر یاریكه‌رێن یانه‌یا به‌رشه‌لۆنا و كریستیانۆ دێ میسی و هه‌ڤالێن وی ئێخیته د ره‌وشه‌كا نه‌باش دا، ریال یا پێتڤی سه‌ركه‌ڤتنێ یه داكو جوداهییا خالان كێمتر لێ بكه‌ت و خۆ نێزیكى سه‌رێ لیستێ بكه‌ت.
لدوماهیێ ژى راپرسینه‌ك بۆ پتر ژ 75 كه‌سان هاته كرن و تێدا دیاربوو كو ب رێژه‌یا 50% ده‌نگدان ب سه‌ركه‌ڤتنا ریال مه‌درید هاتنه دان و 46% ده‌نگدان بۆ به‌رشه‌لۆنا و 4% ده‌نگدان بۆ وه‌كهه‌ڤیێ هاتنه دان.
