تە ئەز کوشتم نەسرینێ یا کێ یە؟

ڕۆال ناڤگوندی

داهێنان ئەو زاراڤە یێ بۆ بەرهەمەکی دهێتە بکارئینان کو بەری وی دەمی ئەو بەرهەمە نەبوو، کارێن هونەری ژی پشکەکا گرنگن ژێ.
ئەگەر ئەم سترانێ بکەینە نموونە، سترانێن فولکلووری ژی هەر داهێنانا کەسەکی یان زێدەترن، لێ ب بوورینا دەمی و نەدیکۆمێنتکرنا سترانێ و خۆدانێن سترانێ، دبیتە فولکلوورێ وێ دەڤەرێ.
لێ ئەگەر ستران یا کەسەکی بیت و هاتبیتە گۆتن و تۆمارکرن و دیکۆمێنتکرن هنگی دێ بێژین کو فلان ستران یا فلان کەسی یە، ئانکو ئەڤی کەسی داهێنانەک یا کری!
و ئەرکەکێ ئەخلاقی یە کو ئەم ‌مرۆڤ رەنج و زە‌حمەتا داهێنەری بەرچاڤ بکەین، چونکی داهێنان ب سانەهی چێنابیت، داهێنەر گەلەک ژ هزر، دەم، شیان و عەشقا خوە ددەتێ..
سترانا (نەسرینێ) یا کو سترانبێژ و پێشکێشکارەکێ کەنالەکێ تورکی، ل ناڤەراستا ئەڤ سالە ‘٢٠١٨’ دو پارچە ژێ گۆتین و لسەر کلیپێ نڤیسی پەیڤ و ئاواز نەدیار و ب دابەشکرنا مۆزیکەکا تام عەرەبی (ئەرەبێسک) و ژ هەژی گۆتنێ یە کو پارچەیا دویێ خەلەت ژی دبێژیت (هوین دشێن ل خارێ سەحکەنە یا درست و یا خەلەت) و د تۆرا جڤاکی (یوتیوب)ی دا بەلاڤ کری.  د عەسلێ خۆ دا یا کێ یە؟
ئەڤ سترانە یا هونەرمەندێ مەزن یێ کورد جوان حاجۆ یە، ژ پەیڤێن خیشکا وی دلبەر حاجۆ یێ و ژ ئاوازێن جوان حاجۆ یە و ل سالا ١٩٧٠-١٩٧٢ ستراندییە و بەلاڤ کرییە. و هەر ئەڤ سترانە د ئەلبووما خۆ یا نوو (فەلەک) دا کو ل ٢٤-٥-٢٠١٨ بەلاڤ کرییە..
من دڤێت بێژم کو گەلەک سترانبێژێن دی ژی ئەڤ سترانە یا گۆتی لێ یا ل سەر نڤیسی پەیڤ و ئاواز گەلەری یان نە دیار (ئەگەر خۆش مروڤەکی ئاماژە پێ دابیت کو یا جوان حاجۆ یە من نە دیتییە)…
ئەرێ ما نە ئێک ژ ئەرکێن هونەری و ئەخلاقی یێن سترانبێژی ئەوە کو بەری سترانێ بەلاڤ بکەت باش دیڤچوونێ بۆ بکەت دا مافێ داهێنەری بەرزەنەکەت؟
یان ئەگەر یێ خەلەت بیت ما نە پێدڤی یە ب فەرمی داخازا لێبورینێ ژ خۆدانێ سترانێ بکەت؟
ئەز بەحسێ سازییێن حکومی یێن مافێ پاراستنا داهێنانان ناکەم لێ ئەم وەک گوهدار مانە باشترە هند د سادە و سەرڤە سەرڤە نەبین، هەما مە چ دیت و گوهـ لێبوو بێی لێگەریان و دیڤچوون باوەر بکەین؟
سپاس.

تە ئەز کوشتم
تە ئەز کوشتم نەسرینێ
دلێ من دخوازێ تە ببینێ
کولیلکا سۆر و شینێ
تە ئەز پیر کرم لێ دینێ

چاڤرەشێ، چاڤرەشێ دل گەشێ
رۆ وەک ستێرکا بنەقشێ
پۆر ژ رەنگێ شەڤ رەشێ
لبەر مالا مە دمەشێ

بنێرە، ل ئەڤینا من و خوە بنێرە
بوهایە وەک زیڤ و زێرە
مە ئاڤدا ب روندکێن چاڤا
مە پێدا دل و جان پێرا
……..
لینکێ نەسرینێ یا کەڤن
https://www.youtube.com/watch?v=9BuJ0_Z-gV4

لینکێ نەسرینێ یا نی
https://www.youtube.com/watch?v=NxByO5JPEko

 ئەو سترانا هاتییە نووکرن دبێژیت:
تە ئەز کوشتم
تە ئەز کوشتم نەسرینێ
دلێ من دخوازێ تە ببینێ
کولیلکا سۆر و شینێ
تە ئەز پیر کرم لێ دینێ

چاڤرەشێ، چاڤرەشێ دل گەشێ
رۆ وەک ستێرکا بنەخشێ
رۆژ رەنگێ چاڤرەشێ
دبەر مالا مە دمەشێ

 

 

 

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.