تورکیا ژ فێلبازەکێ سیاسی بۆ شکەستنبازەکێ جیوسیاسی!

محەمەد تەتەرخان

پشتی رێفراندوما ٢٥/٠٩ ژ ھەموو وەلاتێن ھەریمی پتر تورکیا خوە نەرازی کر، و بشەڤ و رۆژ ھێرش و گەف دکرنە سەر کوردێن باشووری. ئەردوگان چوو تەھرانێ و ل وێرێ دگەل سەرکردایەتیا ئیرانێ دژی گەلێ کورد پیلانگێری کرن و گەھشتنە رێکەفتنەکێ کۆ تورکیا پشتگێریا ئیراقێ و ئیرانێ بکەت کۆ ھەموو دەڤەرێن ناکۆک لسەر بکەڤنە دەستێ حکومەتا بەغدادێ دە، پرۆژەیێ سەرخوەبوونا کوردستانێ ژناڤ ببن، لبەرامبەری ھندێ کۆ حکومەتا بەغدادێ ھەتا سێگوشا سنوری (عراق-سوریا-تورکیا) بگریت و ژ دەستێ کوردان دەربێخیت و بڤێ چەندێ کوردێن باشووری و کوردێن رۆژئاڤا ژێک ڤەقەتینیت، ھەروەسا تورکیا رێیەکا پەژائیی دگەل عەرەبێن سونی یێن عیراقێ پەیدا بکەت، ژبۆی زێدەکرنا ھەژموونا خوە لسەر عەرەبێن سونی و تورکومانێن عراقێ، بەشێ یەکەمین ژڤێ پلانێ بفشار و پلانێن ئیرانێ و بخیانەتا ھندەک ژ سەرکردێن کوردان ھاتە جێبجێکرن، لێ بەشێ دووەمین ژ ڤێ پلانێ، ئیراقێ بەس یەک پێکول کر، کۆ ھێرشەکا مەزن ئینا سەر پێشمەرگەیی ل مەحمودیێ و زمار، ئارمانج ژڤێ ھێرشێ ھەلبەت سێگوشا سنوری بوو، لێ پشتی شکەستنا ھێرشا ێکەمین یا سوپایێ عراقێ و حەشدا شەعبی ھێدی عراقێ چ پێکولێن دن نەکر ژبۆی گرتنا ڤی سێگوشێ سنوری و جێبجێکرنا رێکەفتنا (عەبادی-ئەردوگان-روحانی) کۆ ھەلبەتە زەرەرمەندێ یەکەمین ژڤێ رێکەفتن ئەردوگان و تورکیا بوون، چونکی دەڤەرێن ناکۆک دبن کۆنترۆلا کوردێن باشووری دە بوون، کۆ ھەمیشە بکوردێن نێزیکی تورکیا دھاتنە بناڤکرن، تورکیا تەنھا برێیا کوردان دکاری کارتێکرنێ ل سەر پروسێسا سیاسی یا عراقێ بکەن، لێ ژ ئەنجامێ کریار و پیلانگیرییا (تورکیا-ئەردۆگانی) ئەڤ دەڤەرە کەتنە دبن دەستێن چەکدارێن عەرەبێن شیعی (پەنئیرانیزم) ڤە کۆ چ جاران ھەتا تەماشەی تورکیا وەک جیران ژی ناکەن بەلکۆ تورکیا وەک مەترسی و ھەڤرکێ خوە لدەڤەرێ دبینن. پشتی دەرێخستنا کوردان ژڤان دەڤەران ھەروەسا تورکمانێن سونی ژی دگەل کوردان ھاتن ئاوەرەکرن. واتە تورکیا دخاست ھەژموونا خوە زێدە بکەت لسەر عراقێ لێ ئەنجام بەروڤاژی ھاتن.

ھەروەسا ل سوریایێ ژی تورکیا دخاست لەیستوکەکا سیاسی یا چەپەڵ بدەت مەشاندن، ل سەر ملێن ھەڤالبەندێن خوە کۆ پێک دھاتن ژ (ئوپزسیونا سوری، ئیسلامیێن توندرەو، ئیسلامیێن میانرەو) کۆ ئارمانجا سەرەکە ژ دەستپێکرنا چالاکیێن وان ێن سەربازی گھورینا رژێما توتولاریزما بەعسی بوو ل سوریایێ، لێ تورکیا ئەردوگانی ھێزێن سوری ێن گھورینخواز ژ مەسار و رێرەوێ وان دەرێخستن و ل شوینا پشتگیرێ کرنا وان ژبۆی ژناڤ برنا رژێما بەشار ئەسەدی، رابوون ئەڤ ھێزێن سوری ێن “ئۆپوزسیۆنی” ب ھندەک شەر و پەڤچونێت لاوەکی و جانبی ڤە مژوول کرن ھەتا کۆ باوەریا گەلێ سوریا ژی بوان وەک ئوپزسیون و ھێزەکا ئەلترناتیڤ نەما. بەلکۆ ئەو ژی بوونە بارەکێ دن یێ گران ل سەر ملێن شورەشا گەلێن سوری و شەرعیەت دانە رژێما بەشار ئەسەدی لشونا ژناڤبرنا رژێما وی. ھێزێن ئۆپوزسیۆنا سوری د ماوێ 5 سالان بھزاران گەنج و خورتێن خوە دانە کوشتن ھەتا کۆ پارێزگەھێن (حلب، حمس، ئیدلب) ژ رژێما بەشار ئەسەدی رزگار کرین، لێ د ھەیاما چەند رۆژان دە، ژ ئەنجاما لەیستکەکا قرێژ یا ئەردۆگانی، ھەموو ئەو دەڤەرە ڤەگەراندن دبن کونترۆلا بەشار ئەسەدی ڤە، تەنھا ژبۆی لاوازکرن و ژناڤبرنا دەستکەفتێن گەلێ کورد ل سوریایێ. د ئەنجام دە ھەم ئۆپوزسیۆنا سوری ئەوا نێزیکی تورکیا باندورا خوە ژ دەست دا، ھەم باندۆرا کوردان ژی رۆژ بۆ رۆژێ زێدەتر و پتر لێھات ل ھەموو سوریایێ.

بڤان گاڤان و ژ ئەنجامێ سیاسەتکرن نە ل سەر بنگەھەکێ کەتواری و زانستی، بەلکۆ سیاسەتکرن ل سەر بنگەھێ فاشیزما نەتەوایەتی، تورکیا ژ یاریکەرەکێ ھەرێمی و دەولەتەکا خودان باندۆر ل سەر دەردۆرا خوە، ژبۆی دەولەتەکا لاوازا تە ژی ئاریشە و پرۆبلێمێن ناڤخوە ھاتە گھۆرین. بنێرینا من تورکیا ژ خوەشی و سەرخوەشیا خەونا نیوئۆسمانیزمیێ ھەتا ئەو جوگرافییا تورکیا ئەتاتورکی ژی دێ ژ دەست دەت.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.