تركیا و كێشانا دو دۆسیێن ژ هه‌ڤ جودا ب ته‌رازوویه‌كێ

 

ته‌حسین ناڤشكى :

هه‌ر ژ ده‌ستپێكا په‌یدابوونا كێشه‌یا داعشێ ل ده‌ڤه‌رێ و داگیركرنا مووسلێ و گرتنا 49 فه‌رمانبه‌رێن كونسلخانه‌یا تركیا ژ لایێ ڤى گرۆپێ تیرۆریڤه‌، تركیا ب رێیا میدیایێن راگه‌هاندنێ، هه‌رده‌م ئێك قاون لێدده‌ت و پتر نیڤه‌كا دارى دگرت و به‌رپرسێن وێ یێن بلند، تایبه‌ت سه‌رۆكێ وه‌زیران و سه‌رۆك كۆمار، چ قاس ب دژوارى ره‌خنه‌یا داعشێ بكه‌ن، د گۆتارێن خوه‌دا رێكخراوا ئازادیخوازییا كوردى p.k.k هه‌ڤبه‌رى رێكخراوا تێرۆرى یا داعشێ دكه‌ن و دۆسیێن ژ هه‌ڤ جودایێن هه‌ردوكان، ب ته‌رازوویه‌كێ دكێشن و وه‌كهه‌ڤ ل قه‌له‌مددن.
دبت ئه‌ڤ سیاسه‌تا خه‌و‌نان ب كولتۆرێ بۆهریێ ئمپراتۆرییا ئۆسمانیڤه‌ دبینت، نه‌ تشته‌ك ئه‌جێب بت. ژبه‌ر كو گرۆپێ تیرۆریێ داعشێ ژى هه‌مان نێڕین هه‌یه‌ و گه‌له‌ك شانازیێ ب دیرۆكا خیلافه‌تا ئیسلامێ دبت، تایبه‌ت د قۆناغا داویێ دا، ده‌مێ ئمپراتۆرییا ئۆسمانى سه‌ركێشییا ڤى خیلافه‌تێ دكر و د شه‌ڕێ ناڤدارێ ((مه‌رج دابق)) دا سه‌ركه‌ڤتن لسه‌ر ((مه‌مالیكان)) هینایى. نها ژى داعشێ كۆڤاره‌ك ب ناڤێ (دابق) هه‌یه‌، رێزگرتن بۆ وێ روودانا دیرۆكى، گه‌له‌ك شانازیێ ب كولتۆرێ خیلافه‌تا ئۆسمانى دبه‌ت.
هه‌كه‌ ئه‌م ب هوورى ل گۆتارا گشتییا ده‌ستهه‌لاتا تركیا بنێرین، دێ بینین هه‌مان گه‌وهه‌رێ سیاسه‌تا داعشێ یه‌ كو خه‌ونان ب دیرۆكا خیلافه‌تا ئیسلامێڤه‌ دبینن كو جاره‌كا دى كۆنترۆلا ده‌ڤه‌رێن به‌رى رێككڤتنا سایكس-پیكۆ بكه‌ت. هه‌ر ژبه‌ر ڤێ چه‌ندێیه‌، دێ بینین تركیا، هه‌ر ل ده‌ستپێكا پێكئینانا به‌ره‌یێ دژى داعشێ، هنده‌ك مه‌رجێن گه‌له‌ك ب زه‌حمه‌ت هاڤێته‌ به‌ر هه‌ڤپه‌یمانێن دژى داعشێ نها شه‌ڕى دكه‌ن، ئه‌وژى ئه‌وه‌ یان دێ دگه‌ل داعشێ ل چه‌په‌رێ ئه‌سه‌دى ژى ده‌ن كو په‌كه‌كه‌ ژى ژ وى چه‌په‌رییه و ده‌ڤه‌ره‌ك دژه‌ فڕین ل كه‌مه‌را سینۆرێن وێ و سووریایێ دانن‌ یان ئه‌و به‌شدارى به‌ره‌یێ دژى داعشێ نابیت. ئه‌ڤ هه‌لوه‌سته‌ بیرا گۆتنا مه‌زنان ((یان ناچمه‌ ئاشى یان دێ ئاشه‌ڤانى كوژم)) ل بیرا من دئینت.
ژبلى كو هنده‌ك وه‌لات ژبه‌ر پاراستنا به‌رژه‌وه‌ندیێن خوه‌ دگه‌ل تركیا، هه‌لوه‌سته‌ك بێده‌نگ هه‌بت، وه‌كى دى هه‌موو دزانن كێشانا ئارمانجێن دۆسیێن په‌كه‌كێ و داعشێ ب ته‌رازوویه‌كێ، بێ وژدانییه‌كا مه‌زنه‌ دهێته‌كرن. ژبه‌ر كو خه‌باتا په‌كه‌كێ تنێ د چارچۆڤه‌یێ ئاخا كوردستانێ دایه‌ و تنێ ئارمانجا وێ ئازادكرنا ڤێ ئاخا داگیركرییه‌ و گه‌هشتنا مافێن ژ ده‌ستداینه‌. به‌رامبه‌ر ئارمانجا داعشێ رۆهن و زه‌لاله، هه‌موو دزانن، زڤڕاندنا‌ ده‌وله‌تا خیلافه‌تێ یه‌ كو قۆناغا ئێكێ ژ چینێ، هه‌تا رۆژهه‌لاتێ ئۆرۆپایێ و مه‌غربێ و ئه‌سپانیایێ و هنده‌ك وه‌لاتێن دى داگیر بكه‌ت. ئه‌رێ هه‌كه‌ مرۆڤ ب وژدان باخڤت، نه‌ گوننه‌هه‌كا مه‌زنه‌، په‌كه‌كه‌ و داعش ب ئێك پیڤه‌رى بهێنه‌ كێشان؟!
تركیا باش دزانت ده‌وله‌تێن هه‌ڤپه‌یمان، گه‌له‌ك ب زه‌حمه‌ت ئه‌وا ئه‌و نها دخوازت، وه‌ها ب ساناهى ژێره‌ بكه‌ت. ژبه‌ر هندێ ڤى مه‌رجێ (ته‌عجیزى) ددانت داكو ئه‌و گومانا لسه‌ر وێ هه‌یى كو ده‌ست دگه‌ل داعشێ هه‌یه،‌ لبه‌ر خه‌لكه‌كى تارى كه‌ت و ژ بیرا وان ببت به‌رى هه‌یامه‌كێ پشتى سێ چار مه‌هێن بارمته‌كرنێ، د پرۆسێسه‌كا مژدار دا هه‌ر 49 كونسول و فه‌رمانبه‌رێن كونسولخانه‌یا تركیا ژ لایێ داعشێڤه‌ هاتنه‌ ئازادكرن، بێى خوین د تلا ئێكى ژى بهێت!
ناهێته‌ ڤه‌شارتن كو داعش ناڤداره‌ ب هه‌لوه‌سته‌ك سه‌رره‌ق، ژ سینۆرى زێده‌ دژوار همبه‌ر ‌ئازادكرنا ئێخسیران هه‌یه‌ و گه‌له‌ك جاران ب رێكێن هه‌مه‌جى و هۆڤانه‌ ئێخسیرێن خوه‌ مینا كاغه‌زا گڤاشتنێ لسه‌ر دژمنێ خوه‌ دكوژت‌، بێى هزرێ د پێگوهه‌ڕتنا وان دا بكت. پرسیار ئه‌وه‌: ئه‌رێ هه‌كه‌ داعشێ سێ جار به‌رامبه‌ر ئازادكرنا ستافێ كونسولخانه‌یا‌ ژ تركیا قه‌زانج وه‌رنه‌گرتبت، به‌رئاقله‌ وه‌سا ساناهى و سه‌رفه‌راز و سه‌ربلند وان ئازاد كه‌ن؟!

بابه‌تێن ب ڤێ مژارێ ڤه‌ گرێدای