بەرێخۆدانا جڤاکى بۆ ژنێ ل سەدێ بوورى ژ سەدێ نها پێشکەفتى تربوویە !

بەرێخۆدانا جڤاکى بۆ ژنێ ل سەدێ بوورى ژ سەدێ نها پێشکەفتى تربوویە !

ژن ئەو نیڤا جڤاکیە یا بەردەوام بەحس ژێ دهێتەکرن کو بێ وێ ژیانا مرۆڤایەتیێ نەشێت بەردەوامیێ ب خۆ بدەت لێ هند جاران دهێینە هایدارکرن کو ڕێژەیا ژنان ژ یا زەلامان زێدەترە ژبەر ڤێ چەندێ کارکرنا ژنێ د بیاڤێن گشتى و تایبەت دا گرنگەکا یەکجار مەزن هەیە و ژن کارەکتەرەکا کاریگەرە د جڤاکى دا و دشێت ببیتە دەستەکێ کاری یێ باش و رۆلێ خۆ د ئاڤەدانى و ئەولەهى و زانستى و پێشکەتنا وەلاتى دا بگێریت، ژبەر کو دەستەکی بهێزە د ناڤا جڤاکى دا . بزانین ل بەرى نها د جڤاکێ کوردی دا ژنێ کار دکر؟ د نها دا جڤاکێ کوردەوارى توشی هەڤدژبوونا کەلتورێ کوردى بووینە لهەمبەرى ژنێ، ژبەر کو ئەگەر ئەم بەرێ خۆ بدەینە ڕۆلێ ژنێ ل بەرى ٥٠ بۆ ١٠٠ سالان بەرى نها دێ بینین ئەو کاریگەری و کارکرنا ژنێ د وى دەمی دا هەی د نها دا ب شەرم و گومان دهێتە دیتن، زێدەبارى کو ئەم ڤی سەردەمى ب سەردەمێ پێشکەفتنێ بناڤ دکەین و وى سەردەمی ب پاشکەفتن ناڤ دکەین، ئەگەر تیشکێ بێخینە سەر کارێ ژنێ د وى دەمی دا ، ژنێ د ناڤ مالێ دا هەمى کارەکێ مالێ دکر، هەروەسا کارێ دایکینیێ دکر، و کارێ دەرڤە ژى مل ب ملێ زەلامان د ناڤ زەڤیێ بۆ درینا گەنم و جهـ و برنج و کونجیان کاردکر و سەخبێرکرنا ڕەز و بیستانان و بخودانکرنا ئاژەلان، هەروەسا دەمێن پێدڤی ژن هەبوونە چوونە کاروانى دگەل زەلامان، و هند جاران زەلام ل مال نەبوویە و ژنی بتنێ مێڤانێن زەلام ژ خزم و دوست و کەسوکاران خزمەت بۆکریە بێ هەبوونا چ زەلامەکێ د مالێ دا، هەر وەسا رۆلێ ژنێ هند زووربوویە ئەگەر دوو هۆز ب شەر چبوون و ژن چبوو دناڤبەرا وان دا هەمی تشت ب دوماهی دهاتن و ئەو هەڤرکی بەتاڵ دبوو، هەروەسا مە چەندین نمونێن سەرکردە و حکومرانیا ژنا کورد هەنە ب ڤی ئاوای بۆ مە دیار دبیت کو ژن تمامکەرا هێزا زەلامی یە و بەروڤاژی. دگەل هەبوونا کەلتورەکێ ب ڤی ئاوای د نها دا کارکرنا ژنێ ل دەف پشکەکاهەر وی جڤاکی جهێ حێبەتیێ یە ل دەرڤەى مالێ و د دەمەکێ دا کو کارێ مالێ بساناهی و لاوازبوویە و ولات پێدڤی دەستێ کارى و بسپۆریێن تایبەتە ب ژنان ڤە هەیە کو هەمى بتنێ ب زەلامى ناهێتە پرکرن وەکى نوژاریا تایبەت ب نەخوشیێن ژنان ڤە پێدڤیە ژن نوژدار بیت، ماموستایێن بنەرەتى و داینگەهـ و باخچێن زارۆکان پێدڤیە ب ڕێژا ٧٥% ژن بن ژبەر کو دکاریت هەم پەروەردە و دایکینی و ڤیانێ بدەتە زارۆکی و هەژمارەکا کارێن دى، زێدەباری ڤێ چەندێ ژى ژبەر دژوار بوونا بارێ ژیانێ و بلندبوونا ئاستێ ماددى و بلنبوونا پێدڤیێن ڕۆژانە وەکرسیە ژنى ژى بچیتە د بیاڤێ کاری دا بۆ بدەستڤە ئینانا کوژمەکێ پارەى بۆ باشترکرنا ئاستێ خێزانێ و پرکرنا هەمى هەمى وان پێدڤیێن ڕۆژانە. فەرە بێژین ئەگەر ژن نیڤا جڤاکیە ب گرنگى و ڕێژەیا خۆ ڤە و ڕێگری لێ بهێتە کرن کو ئەو نیڤ د کارێن کەرتێن گشتى و تایبەتى دا کارنەکات، کەواتە ٥٠% یا ڤی جڤاکى عاطل و بێ کار دبیت و ئەگەر جڤاکەکێ هند یێ پیاوسالارە و باب ب نەڕەوا دبینیت کو ژن کار بکەت، ئەرێ مەرەما وى ژ هنارتنا کچان بۆ قوتابخانێ و کولیژ و پەیمانگەهان چیە؟. د هەمان دەمدا چ زەلامەک رازی نابیت نوژدارەکێ زەلام چارەسەریا زارۆکبوونا هەڤژینا وى بکەت، د دەمەکێ دا ئەڤە هەر ئەو زەلامە یێ بهزرا خۆ دگەل کارکرنا ژنێ دا ل دەرڤەى مالێ نینە، لڤیرە نێرین دهێتە گوهەرین و پێدڤیا کارکرنا ژنێ دبیتە کەتوارەکێ پرى حورمەت بۆ جڤاکى، ئەگەر ژن وەک دایک بشێت زەلامى وەکى سەرکردە و نوژدار و ئەندازیار و ماموستایان درۆست بکەت ئەو بخۆ دێ شێت پتر ژ زەلامى وان ڕۆلان گێریت ژبەر کو ئەو داهێنەر و هێزا وان هەمى کارانە یێن زەلام تێدا بسەر دکەڤیت.

 

 

بابه‌تێن ب ڤێ مژارێ ڤه‌ گرێدای