بەرھەمێ ئەم بەرھەڤی دانوستاندناینە!

سالح زێباری

بەرھەمێ ئەم بەرھەڤی دانوستاندنانینە!
پشتی ئەنجامدانا ریفراندوما سەربەخویا کوردستانێ ل ٢٥ ئیلونا سالا چووی، حکومەتا عیراقێ ب ھەمی رەنگەکێ کو ل دەست ھاتی کەفتە دژاتیا خەلکێ کوردستانێ و دۆرپێچەکا دژی ھەمی یاسا و رێسایێن نافخۆیی و جیھانی ئێخستە سەر گەلێ کوردستانێ، ب دائێخستنا دەرازینکێن نێڤدەولەتی و فرۆکەخانەیێن ھەولێر و سلێمانیێ و قوتکرنا ھەمی ھەفکاری و مافەکێ کو ل مەرکەزی دھات سەروبەرەک نەخوش ل کوردستانێ خولقاند. ل دیف ڤێ دورپێچێ دا گرۆپێن میلیشیاتی ل گەل گروپێ خیانەتکار ب پیلانەکا نافخۆی و ھەرێمی ب ھیڤیا نەھێلانا کیانێ کوردستانێ بوون. پشتی وان رێکارێن توند ئەوێن کو بەغدا ل دژی ھەرێمێ گرتیە بەر، بەغدا ھەمی جورە دانوستاندنەک رەدکر، بەرامبەر دا سەروک وەزیرێن کوردستانێ بەردەوام دگۆت (ئەم بەرھەڤی دانوستاندناینە) د نھا دا دیار بوو کو ڤێ گوتنێ چ واتایەک ھەبوو.
مە بڤێت و نەڤێت ریدانێن شازدەیێ ئوکتوبەرێ بالانسێ ھێزێ بلایێ حکومەتا عیراقێ ڤە شکەست و تایبەت پشتی وێ بێ دەنگیا ھێزێن جیھانی و دەست تێکھەلکرنا وەلاتێن ئیقلیمی ل گەل بەغدا دژی ھەرێمی و ئەو ناکوکیێن کو گورەپانا سیاسی یا ھەرێمێ ڤەگرتی و ئەو خوە بێ ھژمارکرنا ھندەک ئالییان و خوە ئێخستنە بن چەنگێ خزعەلی و عامر و سلێمانی. ھندی دیتر غرورێ سەرکردێن بەغدا گرتن و دانوستاندن رەدکرن. بەلێ ب وی نەھجێ دبلۆماسی یێ حکومەتا کوردستانێ گرتیە بەر بوچارەسەریا ھەمی ئاریشێن ھەیی ناڤبەرا ھەولێر و بەغدا دیف دەستورێ عیراقێ و ب ئێک پاکێچ. ھەمی ھاوکێشە گوھری و ئەو بێنا شەری و باریتێ گوھری بۆ رینشتنێن دو ئالی و سەرەدان و پەیوەندی و چارەسەرکرنا ئاریشان دیف خوە دا ئینا. ل داویی پێنگاڤ ژی بریارا سەروک وەزیرێن عیراقێ عەبادی بو سەبارەت راکرنا دوورپێچا سەر فروکەخانێن کوردستانێ ,و ھنارتنا مووچێن وەزارەتێن پەروەردەو ساخلەمیێ یە،  پشتی ب داویی ھاتنا ھویربینکرنا وان و ئەو ئاسانکاریێن کو حکومەتا کوردستانێ بو لێژنێن بەغدا کری.
ئەڤ بریارە دەستپێکەک باش بون بو دوبارە ڤەگەراندنا باوەریێ و دەست ڤەئینانا پشتەڤانیا نێڤدەولەتی و بە بەرەف پێش برنا پەیوەندیێن ھەردو ئالیا و چارەسەرکرنا ئاریشێن ناڤبەرا ھەولێر و بەغدا. ئەڤ چەندە ژی ل ھەلویستێ سەروکێ فەرەنسا ئیمانوێل ماکرونی دیار بو دەمێ ل تویتەکێ دا پشتەڤانیا خوە بو نێچیرڤان بارزانی و حەیدەر عەبادی دیار کری بو چارەسەرکرنا ئاریشێن ناڤبەرا وان دا و دلخوشیا خوە ژی دیار کر ب راکرنا دورپێچا ل سەر فرۆکەخانەیێن ھەرێمێ ژی، ل ئالیێ خوە ڤە ژی ئەمریکا پێشوازی ل ڤێ بریارێ کر و دلخوشیا خوە دیار کر.
ل دەستپێکا کێشێن ڤێ داویێ سەروک وەزیرێن کوردستانێ بەردەوام دگوت ئەم ل گەل چارەسەکرنا ئاریشاینە ب رێکا دەستورێ عیراقێ و ب وی مەرجی کو دەستور وەکی خوە بێتە جێ بەجێ کرن، ھەردەم دگوت ئەم بەرھەڤی دانوستاندناینە ل گەل بەغدا و ھیڤی دارین بەغدا ژی بێتە پێش. ب دبلوماسیەتا سەرکەفتی و دووپاتیکرن ل سەر جێ بەجێ کرنا دەستورێ عیراقێ و بەردەوام بەرھەڤی دیارکرن بو دانوستاندا ل گەل بەغدا و سەرەدان و رینشتن ل گەل عەبادی، نێچیرڤان بارزانی شیا پشتەڤانیا نافخوی و ھەرێمی و نێڤدەولەتی بدەست بینیت و ھەمی ژی گڤاشتنا ل بەغدا بکەن بو دەستپێکرنا دانوستاندنێن بێ مەرج و لادانا ھەمی بریارێن دژی کوردستانێ ھاتینە دەرکرن. ب ڤی رەنگی بژاردەیا ئاشتی و دبلوماسیەت و جێ بەجێ کرنا دەستوری و پاراستنا خوینا گەنجێن کوردستانێ و عیراقێ و وەرگرتنا مافێن خەلکێ کوردستانێ و ب رێکا دەستوری و پاراستنا کیانێ سیاسی و دەستوری یێ ھەرێمێ ب سەرکەفت ل سەر بژاردەیا شەری و نەھێلانا کوردستانێ.
گرتنا فرۆکەخانێن کوردستانێ و دەرازینکێن سنوری و دورپێچا ئابوری ھەمی بەرھەمی ئەقلیەتا شوڤینی و رەتکرنا مافێ کوردستانیا و ب پلە دو ھژمارتن بوو. بەلێ دبلوماسیەتا سەرکەفتی یا حکومەتا ھەرێما کوردستانێ ھەمی ئەو پیلان ژ ناڤبرن ل گەل پاراستنا ئەنجامێن ریفراندومێ کو لادانا ئەنجامان مەرجێ سەرەکی یێ بەغدا بو کو ل گەل کوردستانێ دانوستاندنان بکەت. دەست کرن ب چارەسەکرنا وان ئاریشێن ھەیی ل ناڤبەرا ھەولێر و بەغدا کو ژییەک درێژ ھەی و بریارا راکرنا دورپێچا ل سەر فروکەخانەیێن کوردستانێ و بریارا ھنارتنا موچەی بەری نەوروزێ و ئەو پشتەڤانیا نێڤدەولەتی بو ڤان پێنگاڤان و بو حکومەتا ھەرێما کوردستانێ، بیرا مە ل وێ گوتنێ دئینیت (ئەم بەرھەڤی دانوستاندناینە ل گەل بەغدا ), نھا ئەنجام دبێژیت کی رول ل چارەسەریا ئاریشان ھەبوو و سەرەرایێ پاراستنا کیانێ کوردستانێ.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.