“بیژه‌ن كامكار” ل ته‌هرانێ دێ سترانێن كوردى بێژیت

“بیژه‌ن كامكار” ل ته‌هرانێ دێ سترانێن كوردى بێژیت

وار – دهۆک :

پشتى گه‌شتا سه‌ركه‌ڤتى و گێرانا چه‌ندین ئاهه‌نگان ژ لایێ گرۆپێ فرۆزان یێ مۆزیكى و گۆتنا چه‌ندین سترانێن فولكلۆرێ كوردى ژ لایێ مامۆستا و هونه‌رمه‌ندێ مه‌زن یێ كورد “بیژه‌نێ كامكار” ل باژێرێ كۆنیایێ ل توركیا، ئه‌ڤێ تیپێ ل به‌ره‌ ڤێ جارێ ل ته‌هرانێ ئاهه‌نگه‌كا مه‌زن یا فولكلۆرێ كوردى ب پشكدارییا مامۆستا “بیژه‌ن كامكار” و ب مێهڤاندارییا “یارا ئه‌میر باهونه‌ر” بله‌زترین ژه‌نیارێ ئامیرێ كه‌مانجێ ل جیهانێ بگێریت.
ده‌رباره‌ى ڤێ چه‌ندێ، سیاووش عه‌بدى سه‌رپه‌ره‌شتێ گرۆپێ فرۆزان، بۆ رۆژنامه‌یا وار گۆت: پشتى گێرانا ئاهه‌نگا كۆنیایێ و وێ سه‌ركه‌ڤتن و پێشوازییا نه‌چاڤه‌رێ كرى ئه‌وا مه‌ دیتى، مه‌ وه‌ك گرۆپێ فرۆزان یێ مۆزیكێ، بریار دا كو ڤێ ئاهه‌نگێ دگه‌ل چه‌ند سترانه‌كێن دى یێن نوو كو بۆ ئێكه‌مین جاره‌ ژ مامۆستایێ هه‌ره‌ مه‌زن “بیژه‌ن كامكار” دهێته‌ بهیستن، ل باژێرێ ته‌هرانێ و ل بورجێ میلاد یێ بناڤودونگ بگێرین.
سیاووشى زێده‌تر گۆت: ئارمانجا ڤێ ئاهه‌نگێ پێشكێشكرنا سترانێن بناڤوده‌نگێن فولكلۆرێ كوردى ب ئاماده‌كرن و دابه‌شكرنه‌كا نوویه‌ كو ژ لایێ منڤه‌ هاتییه‌ ئاماده‌كرن. هه‌ر وه‌سا مامۆستا كامكار دێ دوو هۆزانێن نوو ژ دیوانا مامۆستا “هه‌ژار موكریانى” كو ژ هه‌لبژارتنا وى بخۆ نه‌ و هۆزانه‌ك ژ دیوانا “مه‌لا مسته‌فا بیسارانى” كو ژ هه‌لبژارتنا هه‌ڤالێ مه‌ “ئالان وه‌یسى” یه‌ دێ بێژیت، ئه‌ڤ هه‌ر سێ كار نوو نه‌ و تا نها ل چو جهان نه‌هاتیینه‌ پێشكێشكرن.
د ڤێ ئاهه‌نگێ دا، پشتى بۆرینا ماوه‌یه‌كێ درێژ، د سترانا “كه‌ڤۆكێ” دا، مامۆستا كامكار ب خۆ دێ ب ژه‌نینا ئامیرێ ده‌فێ رابیت. هه‌ر وه‌سا د ڤێ ئاهه‌نگێ دا دێ دو هۆزان ژ هۆزانێن خانمێن ئه‌ندامێن ڤێ تیپێ “ئه‌و دلبه‌را من” و “دلێ بریندار بووى” دێ ب ده‌نگێ مامۆستا كامكارى هێنه‌ گۆتن.
ده‌رباره‌ى ئارمانجا ڤێ ئاهه‌نگێ، سه‌رپه‌ره‌شتێ گرۆپێ فرۆزان یێ مۆزیكێ، گۆت: ئارمانجا مه‌ یا سه‌ره‌كى ژ گێرانا ڤێ ئاهه‌نگێ، زیندى كرنا مۆزیكا ده‌ردوورانه‌ و بزاڤ بۆ بالكێشان و گرنگیدانا زێده‌تر یا گرۆپێن مۆزیكا فولكلۆرى و مۆزیكا مه‌حه‌لى یه‌ كو د ڤێ رێ دا، ب ئاماده‌بوونا مامۆستا كامكار، ئه‌ڤ هه‌ڤكارییه‌ هه‌م دێ زه‌نگینتر بیت و هه‌روه‌سا دێ بیته‌ ئه‌گه‌رێ پاراستنا ره‌سه‌نایه‌تییا كارى.
ناڤبرى زێده‌تر گۆت: هه‌روه‌سا من دڤێت ئیشاره‌تێ ب وێ هاریكارییا كو مامۆستا كامكارى ب مۆزیكا كوردى، ب ریتمێ د مۆزیكا مه‌قامى و مۆزیكا فولكلۆرى یا ئیرانێ كریه‌ (بتایبه‌ت د ریتمێن گه‌رۆك) بده‌م و هه‌ر وه‌سا ل وێ باوه‌رێ مه‌ كو ژ بلى كامكاران، گرۆپه‌كێ دى وه‌كو پێدڤى ب ستران و مۆزیكا كوردستانێ خزمه‌ت نه‌كریه‌.
ئه‌ڤ ئاهه‌نگه‌ ل رۆژا ئه‌ینیێ رێكه‌ڤتى “16” كانوونا ئێكێ یا ئه‌ڤساله‌ و ل ده‌مژمێ “8:30” شه‌ڤێ ل هولا سه‌ره‌كى یا بۆرجێ میلاد ل ته‌هرانێ هێته‌ گێران. هه‌ر وه‌سا ئه‌ڤ ئاهه‌نگه‌ دێ مێهڤاندارییا “یارا ئه‌میر باهونه‌ر” بله‌زترین ژه‌نیارێ كه‌مانچێ ل جیهانێ كه‌ت. د ڤێ ئاهه‌نگێ دا دێ چه‌ندین سترانێ فولكلۆرێ كوردى ژ وان “بۆ تۆڕاوى”، “كه‌ڤۆكێ”، “فریال”، “گوا وه‌نه‌وشه‌”، “مه‌گرى” و “ واران” و سێ سترانێن نوو كو تا نها نه‌هاتینه‌ پێشكرن دگه‌ل دو سترانێن فارسى ب ده‌نگێ مامۆستا بیژه‌نێ كامكار هێنه‌ پێشكێشكرن.
گرۆپێ فرۆزان یێ مۆزیكێ بگشتى 135 ئه‌ندام هه‌نه‌، كو 120 كه‌س ژ وان ژه‌نیارێن ئامیرێ ده‌فێ نه‌ و 15 كه‌سێن دى ژونیارێن ئامیرێن دى یێن مۆزیكێ نه‌ كو 7 ژ ڤان كه‌سان كوردن.
ل داویێ سیاووش عه‌بدى ئه‌گه‌رێ زێده ‌پشكداركرنا ئامیرێ ده‌فێ د ڤى گرۆپى دا دیار كرو گۆت، په‌راوێز بوون و ژبیركرنا ڤى ئامیرى د مۆزیكا مقامى یا ئیرانێ دایه‌. ئه‌و مه‌زنییا كو ئه‌ڤ ئامیره‌ ل ده‌مێ ئاهه‌نگێ ل سه‌ر شانۆیێ دروست دكه‌ت كێمتر ئامیره‌ك دشێت دروستبكه‌ت و ئه‌ڤ خالا گرنگ هاتییه‌ ژ بیركرن.

بابه‌تێن ب ڤێ مژارێ ڤه‌ گرێدای