بیره‌وه‌رییا 66 سالییا مافێ مرۆڤی ل سووریێ

 

نووری بریمۆ :

ل ئێكه‌م جار و تنێ ب به‌رێخوه‌دانا وێنه‌ی، مرۆڤ چو كه‌سه‌كێ ده‌ستهه‌لاتدار و ده‌ستهه‌لاتلێكری نابینیت ئه‌و لسه‌ر خوه‌ قه‌بوولبكه‌ت كو كه‌سه‌كێ دیتر وى ب دوور ژ مرۆڤاتیێ بهه‌ژمێریت كو حه‌زبكه‌ت مال و ئه‌ردێ خه‌لكه‌كێ دیتر داگیڕبكه‌ت و ئازادی و پیرۆزیێن وان پێلێبكه‌ت. لێ ل جارا دووێ و ب به‌رێخوه‌دانا ناڤه‌رۆكێ نه‌ك ل وێنه‌ی، دێ بینی د دیرۆكێدا گه‌له‌ك ده‌ستهه‌لاتدارێن چو مرۆڤایه‌تی لجه‌م نه‌یی ب هه‌موو ره‌نگان هه‌بوون (دینی، سیاسی و جڤاكی…)، پترییا وان سته‌مكاربووینه‌ و چو‌ مرۆڤایه‌تی لجه‌م وان نه‌بوویه‌، چنكو وان جویڤێ خوه‌ لسه‌رسه‌رێ مرۆڤان بلنددكر، نه‌ ئه‌ڤه‌ ب تنێ، به‌لكو د هنده‌ك قۆناغێن دیرۆكێدا، هنده‌ك ده‌ستهه‌لاتداران كرێتترین ره‌نگێ قانوونا دارستانێ بجهكرییه‌، ئه‌وژی؛ ئه‌وكه‌سێ بهێز كه‌سێ لاواز دخۆت.
لدۆر ڤێ یه‌كێ، ئه‌و كه‌لهێن سته‌مكاریێ یێن كو لسه‌رده‌مێن بۆری جه‌نگیزخان، هۆلاكۆ، هێلته‌ر و فاشیێن وه‌ك وان ئاڤاكرین، هه‌روه‌سا ئه‌و هه‌وێن ژناڤبرنا نڤشی یێن كو سه‌ددام، میلۆسوڤیچ و به‌شیر و یێن وه‌ك وان دكتاتۆر دژی وه‌لاتییان كرین، هه‌روه‌سا ئه‌و هه‌وێن سه‌رژێكرنێ یێن كو داعش یا تیرۆریست و ئه‌وێن وه‌ك وێ وارگه‌هێ كوردان، ل شامێ و ئیراقێ و هه‌موو جیهانێ دژی وه‌لاتییان ئه‌نجام دده‌ن، باشترین به‌لگه‌یێن گۆمانبڕن كو هه‌ڤپشكییه‌ك د ناڤبه‌را تیرۆریستێن ڤی سه‌رده‌می و گرگره‌یێن چاخێن بۆریدا هه‌بوون، ئه‌وژی هه‌ڤپشكییا بڕینا ستۆكور و قویتى بوویه‌، زێده‌باری بنپێكرنا مافان.
ل ڤان رۆژێن بۆرین، ئه‌م د بیره‌وه‌رییا 66 ێ یا راگه‌هاندنا مافێن مرۆڤیدا بووینه‌ كو ل (10- كانوونا ئێكێ سالا 1948)ێ بوویه‌، ماده‌م مه‌ره‌ما مه‌ گه‌ڕیانه‌ ل په‌یوه‌ندییا د ناڤبه‌را سته‌مكاری و سته‌ملێكریدا ل دونیایا مه‌، دێ گرێدایی هه‌موو ره‌نگێن سته‌مكاریێن به‌رێ و تیرۆریستێن نهۆ بین كو وه‌خته‌كێ درێژ د ناڤبه‌را واندا بۆرییه‌، لێ هه‌كه‌ مرۆڤی راستییا ڤێ كێشه‌یێ بزانیت، دڤێت مرۆڤ پتر بچیته‌ ناڤ بابه‌تی، داكو باش بسه‌ر وان داگیڕكاری و مافخوارنێن دژی مرۆڤایه‌تییا مه‌ ل ڤان وه‌لاتان هاتینه‌كرن، كو وه‌سا قه‌ده‌رێ خواستییه‌ ئه‌م لێ بژین و دناڤدا یا ل ده‌رڤه‌ی وان بمرین، هندی كو هه‌رچوار پارچه‌یێن كوردستانێ، ئیراق و سووریێ مالێن مه‌ بن، دێ ئه‌م پایه‌ندبین ب ململانه‌یێ دگه‌ل قه‌ده‌را خوه‌ و گه‌ریانێ ل ئه‌وا ل ڤان وه‌لاتان روودده‌ت ژ داگیركاریێن داعش و شه‌بیحه‌یان، تبدانان لسه‌ر برینێ دێ هه‌ر مینیت خه‌ما ئێكێ و دوماهیێ بۆ هه‌موو قۆربانی و زیاندیتیێن سه‌ربڕ و تیرۆریست و ئه‌وێن هاریكارییا وان دكه‌ن.
ل بیره‌وه‌رییا مافێ مرۆڤی ل سووریێ، ئه‌ڤ وه‌لاته‌ یێ ژ خودانێن خوه‌ یێن ره‌سه‌ن ڤالادبیت، هه‌ژماره‌یا قۆربانیێن وێ بووینه‌ 200 هزار كه‌س، بریندار، په‌یكه‌وتوو، گرتی، ره‌ڤاندی، ده‌ربده‌ر و كۆچبه‌ر ژی ب ملیۆنانه‌ و هێشتا ئه‌ڤ ده‌رده‌سه‌رییه‌ به‌رده‌وامن، رژێما به‌شار ئه‌لئه‌سه‌دی ژی، ب ره‌نگه‌كێ كۆره‌ سه‌ره‌ده‌ریێ دگه‌ل كاودانی دكه‌ت و تاكو نهۆ ب ده‌ستێن پۆلایی ده‌ستهه‌لاتداریێ دكه‌ت كو ئه‌و یه‌ك ژی بوویه‌ ئه‌گه‌رێ سۆتنا ته‌ڕوهشكان پێكڤه‌ و بازنه‌یێ توندوتیژیێ ژی گه‌له‌ك به‌رفره‌هـ بوویه‌، چنكو گه‌له‌ك ره‌نگێن شه‌بیحه‌ و كۆمین تیرۆریستی كۆمكرینه‌ و كرینه‌ گرئاڤێن ئه‌وله‌هیێ و میرگه‌هێن ئێك دژمنكارییا ئێكا دیتر دكه‌ت، هه‌روه‌سا پێرابوونێن توند و خووناوی دژی وه‌لاتیێن سووریێ ئه‌نجام دده‌ن، ئه‌و ململانه‌یێ دگه‌ل ئێكدو دكه‌ن كانێ دێ كی پتر وه‌لاتییان لسه‌ر ناسنامه‌یا (سوننی، عه‌له‌وی، كوردی و … هتد) كوژین داكو خوه‌ د پرتووكا گێنس دا تۆماربكه‌ن، بۆ زانین ژی؛ ئه‌و كارێن درنده‌ یێن شه‌بیحه‌یێن به‌شار ئه‌لئه‌سه‌د و تیرۆریستێن به‌غدادی و جۆلانی و شیشانی و یێن وه‌ك وان داگیركارێن سه‌رده‌می كرین، گه‌له‌ك زێده‌ترن ژ ئه‌وێن نیرۆن و كرۆمر و بینۆشیه‌ و یێن وه‌ك وان ل سه‌رده‌مێن بۆرین ژ برینا سه‌ر و ژ تیڤلكرنا مرۆڤان كرین.
نهۆ، پێدڤییه‌ جڤاكێ نێڤده‌وله‌تی مایتێكرنه‌كا له‌شكری د سووریێدا بكه‌ت، داكو ڤێ پێلا ده‌رده‌سه‌رییان راوه‌ستینیت، ئه‌و یا هه‌ژییه‌، له‌و فه‌ره‌ وه‌لاتیێن وێ زمانێ ئه‌قل و دیالۆگێ و بزاڤێن ته‌وافوقی كاری پێبكه‌ن پێخه‌مه‌ت دیتنا چاره‌سه‌رییان بۆ هه‌ر كێشه‌یه‌كا هه‌یی، داكو خوونا دهێته‌ رێژتن راوه‌ستیت، هه‌روه‌سا داكو بیانی و داگیركار ژ وه‌لاتی بهێنه‌ ده‌ركرن و شكه‌ستن ب تیرۆر و رژێما ئه‌سه‌دی بكه‌ڤیت، پاشی زڤراندنا ده‌ربده‌ر و كۆچبه‌ران بۆ سه‌ر مالێن وان ل سووریێ كو سووریایه‌كا دیمۆكراسی و فیدرالی بیت و تێدا مافێن هه‌موو پێكهاتێن وه‌لاتی بجهببن، فیدرالییه‌ت بۆ رۆژئاڤایێ كوردستانێ و هه‌ر ده‌ڤه‌را دیتر ل سووریێ بهێته‌ راگه‌هاندن و دانپێدانكرن وه‌ك باشترین چوارچۆڤه‌ بۆ پێكڤه‌ژیانا هه‌موو پێكهاته‌ و نه‌ته‌وه‌یێن هه‌ڤده‌ر، چنكو ئه‌و د وه‌رز و سه‌رده‌مێن خووناویدا ده‌ربازبووینه‌ نه‌خاسمه‌ ل ده‌ڤه‌رێن سوننه‌نشین و عه‌له‌وینشین و كوردنشین.

بابه‌تێن ب ڤێ مژارێ ڤه‌ گرێدای