بیانی پەرێسێن خویانی شکێن

بیانی پەرێسێن خویانی شکێن

رەمەزان کامل

مستەفا رەشیدێ کورد و حەبیب ئەنوەرێ رووسی وەک نموونە و چەندین نمونێن دی یێن جڤاکی:

۱- لدەمی کو یاریکەر (حەبیب ئەنوەر ) شەرکەرێ رووسی، ل سەر یاریکەرێ ئەمریکی ب یاریا شەری بسەرکەتی، پتریا گەنجێن کورد ب تایبەتی بالێن ئیسلامی ( ژبەرکو بتنێ حەبیب موسلمانە)! وێنێن وی کرنە پرۆفایل و وەسا پشتەڤانی لێ کر ھەر وەکو ناسمامێ قارەمانیێ بۆ کوردستانێ ب دەستڤە ئینای!

ئەڤە د دەمەکێ دا کو گەنجێ کورد (مستەفا رەشید) شیا ریکۆردا گینسێ بشکێنت و مەساجەک بۆ ھەمی دنیای ھنارت کو گەنجێن کورد وەکو گەنجێن ھەمی مللەتان خودان شیان و بھێزن !

لێ پتریا کەسان سڤکاتی پێ کرن و ئەو گرنگی پێ نە ھات دان یا ب حەبیبێ رووسی ھاتییە دان، سەرەرای کۆ مستەفا ژی موسلمانە و کوردە و کورێ ڤی مللەتی یە!

ئەرێ ئەڤە نە شکاندنا بەھرە و بەرزەکرنا شیانێن گەنج وتاکێ کوردە؟

۲- سڤکاتییێ ب قەھرەمانێن کورد وەکو سەلاحدینێ ئەیووبی و مەلا مستەفای و … دکەن و شانازییێ ب گیڤارای و گاندی دبن، پا دیارە ئەڤ شورەش و قوربانی و ئازادییە لسەر دەستێ ناپلیۆنی و ھێتلەری و ستالینی ھاتینە ئەنجام دان؟

۳ـ ژبۆ پشتەڤانییا یاریا ریال مدرید و بەرشەلۆنا ئاھەنگ ل ناڤ بازاری دھێنە کرن  و ژبۆ یاریا زاخۆ و دھۆک شەر دھێتە کرن و کورسیک دھێنە شکاندن و… ھتد ئەرێ ئەڤە نە بێڕێزی و شکاندنا جڤاکی یە؟

٤ـ بەرھەمێن خومالی و کشتوکالی یێن جوتیارێن کورد ناھێنە کرین و ھەمی پێدڤیێن مە و گرنگییا مە ل سەر بەرھەمێ ئیرانی و ترکی و .. یە. ئەرێ ئەڤە نە شکاندنا رەنج و وەبەرھێنانا تاکێ کوردە؟

٥ـ ل دەمێ ھەلکەفت و کونسێرتێن ھونەری ب سەدان ھونەرمەندێن کورد مە یێت ھەین، دێ ھونەرمەندێن تورک و عەرەب ب پارێن خەیالی مھڤان و بەشدار کن.. ئەرێ ئەڤە نە شکاندنا ھونەرێ کوردی یە؟

٦ـ ب ھزاران گەنجێن ئەندازیار و دکتۆر و مامۆستا و خودان باوەرنامێن جودا جودا ل ناڤ مەداپێدڤی نە و بێ کارن، لێ کارگەھـ و نەخۆشخانە و کومپانیێن مە ۸٠٪ کەسێن بیانی نە و پشت بەستن ل سەر شیانێن تورك و ئەورۆپی و عەرەبانە، پا ھەبوونا ڤان زانکۆیا و ئەڤ رێژەیا دەرچوویا بۆ کەنگی نە؟

۷ـ ب سەدان بیرمەند و ھەلبەستڤان و نڤیسەرێن کورد وەکو شێرکو بێکەس و محسن قۆچان و بەختیار علی و کۆچەر بیرکار مە یێن ھەین کو خەلکێ ئەورۆپی بۆ خوە مفای ژێ دبینن و خو پێ ناڤ دکن، لێ ئەم مەتحەکارێن نزار قبانی و علی وردی و ستیڤن ھاوکینگی… ھتد، و ۱٠٪ پشتەڤانی بو ناھێت کرن کو بشێن پەرتووکێن خوە چاپ بکن، لێ ب دەھان پەرتووکێن بیانی وەردگێرن بۆ زمانێ کوردی! ئەرێ ئەڤە نە شکاندن و پشتگوھـ ھاڤێتنا رەوشنبیری و بزاڤا پێشکەفتنا تاکێ کوردە؟

۸ـ رێزگرتن و پێگێریکرن ب یاسایێ ل وەلاتێن بیانی و پێشێلکرن و پشتگوھخستنا رێنمایێن یاسایێ د وەلاتێ خوە دا. ئایا ئەڤە نە شکاندنا سەروەیا یاسایێ یە؟

ب راستی ژی ئەڤە کارەساتە د ھزرا کوردی دا کو گرنگی و پالپشتیا وی بۆ ناڤێن بیانی و دژایەتی وسڤکاتی ب رۆل و کەسایەتیێن خۆیانی.

سەرەرای کو گەلەک باشە ئەم مفای ژ ھزرێن ھەر بیرمەندەک و قەھرەمان و روشنبیرەکێ بیانی بۆ جڤاکێ  کوردی وەرگرن، لێ یا باشتر ئەم جارەکێ پشتەڤانێ بیانی و سەد جاران پشتەڤانێ خوەیانیا بن داکو ئەم ژی وەکو وەلاتێن جیھانا ئێکێ پێشبکەڤن و ھزرا تاکێ کورد گەشێ بکت.

بابه‌تێن ب ڤێ مژارێ ڤه‌ گرێدای