بۆ ئێكه‌م جار ل كوردستانێ شانۆیا چایخانه‌یان دێ هێته‌ نمایشكرن

بۆ ئێكه‌م جار ل كوردستانێ شانۆیا چایخانه‌یان دێ هێته‌ نمایشكرن

 

Capture

وار – نه‌وزاد ئامێدى :

گرۆپێ له‌یزین یێ شانۆیێ ل باژێرێ سلێمانیێ ده‌ست ب داهێنانه‌كا نوو، ئه‌وژى پێشكێشكرنا شانۆگه‌ریێن چایخانه‌یان یان ژى گه‌رۆك كو دێ هه‌ر شه‌ڤ ل چایخانه‌یه‌كێ یان چه‌ندین چایخانه‌یێن باژێرێ سلێمانیێ پێشكێش كه‌ن.
ده‌رباره‌ى ڤى شێوازى، دكتۆر نیاز له‌تیف سه‌رۆكێ كۆما له‌یزین یا شانۆ و بالێ ل سلێمانیێ بۆ رۆژنامه‌یا وار گۆت: شانۆیا چایخانه‌یان، نیشاندان ب شێوازێ (بیرفۆرمانس)ه‌، واته‌ نمایشكرن ب ده‌نگى و هه‌ر ئه‌كته‌ره‌ك ژى رۆلێ خۆ دخوینیت و چێرۆكخوان رۆلێ سیبۆگرافیا و ده‌رهێنه‌رى بۆ سیناریۆ خوانان.
دكتۆر نیاز زێده‌تر دبێژیت: شانۆیه‌ك دروست دبیت كو ره‌نگه‌ ئه‌ڤ جۆرێ شانۆیێ پێشتر به‌لاڤ نه‌بوویه‌ یان ژى یا به‌لاڤبووى، لێ نه‌ ل كوردستانێ و ئیراق و ده‌ڤه‌رێ. ئه‌ڤه‌ ئێكه‌مین جاره‌ ئه‌ڤ ئه‌زموونه‌ دهێته‌ كرن. شانۆگه‌رى نابیت گه‌له‌ك یا درێژ بیت و نابیت ئه‌كته‌رێن ڤێ شانۆگه‌ریێ ژى گه‌له‌ك بن تا كو بێزارى بۆ بینه‌رى دروست نه‌بیت و دگه‌ل پێشكێشكرنا بابه‌تى، تام و خۆشییه‌كێ بده‌ت و هیچ بێزارییه‌ك پێڤه‌ دیار نه‌بیت و هه‌روه‌سا بینه‌ر یان جه‌ماوه‌ر گوهداریێ بكه‌ت.
شێوازێ “بیرفۆرمانس”‌ یان نمایشا “كافى تیاتر caffe threatre “، د وه‌لاتێن جیهانێ دا گه‌له‌ك یێ به‌ربه‌لاڤه‌ لێ ئه‌ڤه‌ بۆ ئێكه‌م جاره‌ ل كوردستان و ئیراق و ده‌ڤه‌رێ دهێته‌ ئه‌نجامدان و هه‌موو ئه‌كته‌رێن گه‌لىك ب شیان تێدا پشكداریێ دكه‌ن. چونكه‌ زارڤه‌كرن و نوانجان ب ده‌نگى گه‌له‌ك یا ب زه‌حمه‌ته‌ و هه‌ر ئه‌كته‌ره‌كى ئه‌ڤ شیانه‌ نینن.
ده‌رباره‌ى شانۆگه‌ریا كو دێ ژ لایێ كۆما له‌یزین هێته‌ پێشكێشكرن، دكتۆر نیازى گۆت: شانۆگه‌ریا مه‌ ب ناڤێ “بها” لێ نه‌ بۆ تشته‌كێ ماددى به‌لكو باس ل بهایێ روحى دكه‌ت. ئه‌ڤ شانۆگه‌ریه‌ ژ هزر و نڤیسین و ده‌رهێنانا “گۆران سه‌ركه‌لویى” قوتابیێ كۆلیژا هونه‌رى پشكا شانۆیێ و ئه‌ندامێ گرۆپێ له‌یزینه‌.
ناڤبری زێده‌تر گۆت: ئه‌ڤ نمایشه‌ پێشتر نه‌هاتییه‌ نمایشكرن. باس ژ كیشه‌یا خێزانه‌كێ دكه‌ت، واته‌ یا جڤاكى یه‌ و ماوه‌یێ پێشكێشكرنا ڤێ نمایشێ نێزیكى 30 خوله‌كانه‌ و بتنێ 4 ئه‌كته‌ر”ژیان ئیبراهیم، حه‌مید بانه‌یى و مه‌ریوان كه‌ریم” بۆ نیشاندانا كه‌سایه‌تییان و هه‌ر وه‌سا چێرۆكخوانه‌ك كو ئه‌ز بخۆ ب ڤى ئه‌ركى رادبم، پشكدارین.
وه‌سا بڕیار د داهاتییه‌كێ نێزیك دا، ئه‌ڤ نمایشه‌ هه‌ر شه‌ڤ ل چایخانه‌یه‌كێ ل باژێرێ سلێمانیێ بهێته‌ نمایشكرن. هه‌ر دیسان دبیت هه‌ر د وێ شه‌ڤێ دا ل چه‌ندین چایخانه‌یان بهێته‌ نمایشكرن و دیسان دبیت بۆ گه‌له‌گ جهێن دى ژى ل هه‌رێمێ بهێته‌ ڤه‌گوهاستن. واته‌ ئه‌ڤ نمایشه‌ نمایشه‌كا گه‌رۆكه‌ و ئه‌كته‌رێن پشكدار د روونشتى نه‌ و بتنێ ب شێوازێ خواندنا دقى رۆلێ خۆ دبینن.
ده‌رباره‌ى ڤێ چه‌ندێ كا مه‌به‌ستا وان ژ پێشكێشكرنا ڤى جۆرێ ستایلێ نمایشان چییه‌، دكتۆر نیاز له‌تیف، سه‌رۆكێ گرۆپێ له‌یزین گۆت: مه‌به‌ستا مه‌ ژ ڤى كارى ده‌رئێخستن و نیشاندانا شیانه‌كا دى ژ داهێنانا ئه‌گته‌رێ كورده‌ كو ئه‌ڤ جۆره‌ نمایشه‌ كو بتنێ روونشتنه‌ و وه‌ك شه‌ڤگۆتنانه‌، لێ شیانه‌كا ده‌نگى و هه‌مه‌ ره‌نگى دڤێت.
دكتۆر نیاز زێده‌تر دبێژیت: بۆ نمایشكرنا ڤان جۆره‌ نمایشان، گه‌له‌ك ژ ئه‌كته‌رێن ئاسایى نه‌شێن ئه‌نجام بده‌ن. ره‌نگه‌ ڤى ستایلى ژى بكه‌ینه‌ به‌رهه‌مێ درێژ ماوه‌یێ خۆ و ل داهاتى دا ل سه‌ر ڤى كارى به‌رده‌وام بین. ئه‌ڤه‌ دیار دكه‌ت كو ئه‌كته‌رێن كورد شیانێن زێده‌ هه‌نه‌ و هیڤیدارم كو ژ لایێ جه‌ماوه‌رى بهێته‌ په‌سه‌ند كرن و بینه‌ر و گوهداره‌كى بۆ خۆ بده‌ستڤه‌ بینیت. چونكه‌ ئه‌ڤ ئه‌زموونه‌ بۆ ئێكه‌مین جاره‌ ل كوردستانێ دهێته‌ كرن.

بابه‌تێن ب ڤێ مژارێ ڤه‌ گرێدای