بۆ ئه‌و كه‌سێ پێشمه‌رگه‌ی نه‌نیاسیت

 

عه‌بدوللا جه‌عفه‌ر كۆڤلی* :

هه‌ر جڤاكه‌ك ژ جڤاكێن مرۆڤایه‌تیێ، ب بۆرینا وه‌ختی، شانازیێ ب وان كریار و پێرابوونان دكه‌ت، ئه‌وێن كچ و كوڕێن وان پێشكێشی مرۆڤایه‌تیێ كرین، ئه‌و خوه‌ سه‌ربلند دبینن كو وان باشییه‌ك پێشكێشی شارستانییه‌تا مرۆڤایه‌تیێ كربیت، خوه‌ ئه‌و باشی چه‌ند یا بچووك ژی بیت. ئه‌و باشییا ئه‌م ملله‌تێ كورد ژی، لسه‌رده‌مێن بۆری و هه‌تا نهۆ، خوه‌ لناڤ جڤاكێن مرۆڤایه‌تیێ پێ سه‌ربلند دبینین، ئه‌وه‌ یاكو كچ و كوڕێن مه‌ یێن كورد ب هه‌موو دلێری و خوینا خوه‌ پێخه‌مه‌ت وه‌لات و ملله‌تێ خوه‌ پێشكێشكری. ب تنێ وه‌ختێ مرۆڤ په‌یڤا (پێشمه‌رگه‌) دبێژیت، هه‌موو كه‌لهـ و چه‌په‌ر و بهێزترین له‌شكر ژبه‌رئێك دچن، خه‌ونێن وان یێن كو چوجاران بجهنه‌هێن پووچدبن كو ئه‌و چوجاران نه‌شێن پییێن خوه‌ یێن پیس داننه‌ سه‌ر ئه‌ردێ كوردستانا پیرۆز. ئه‌ڤ پێشمه‌رگه‌یه‌، نه‌وه‌سیانێ دزانیت و نه‌ترس لجه‌م هه‌یه‌، ژ هه‌موو به‌ربه‌ست و ئاسته‌گان دبۆریت پێخه‌مه‌ت وه‌لات و ملله‌تێ خوه‌، ئه‌و ژدایكبوویه‌ داكو شه‌ڕی بكه‌ت و به‌رگرى و سه‌ركه‌ڤتنێ بده‌ستخوه‌ڤه‌ بینیت، ئه‌و وه‌ك چرایه‌كى خوه‌ دحه‌لینیت داكو رێیا ئازادییا ملله‌تێ وی به‌ره‌ڤ ئۆمێد و مافان رۆهن ببیت، شه‌ڤ لجه‌م پێشمه‌رگه‌ی رۆژن، چاوا عاشقه‌ك ب گه‌رمی و ئازادى حه‌ز ژ خوه‌شتڤییا خوه‌ دكه‌ت، وه‌سا پێشمه‌رگه‌ ژی ب گه‌رمی حه‌ز ژ تڤه‌نگ و چه‌كێ خوه‌ دكه‌ت پێخه‌مه‌ت ئازادكرنا ملله‌تێ خوه‌، بێهنا بارووتێ د دفنا ویدا به‌رده‌وام یا كه‌هییه‌، له‌و خوه‌شیێ ژێ دبینیت. سینگێ پێشمه‌رگه‌ی كه‌لهه‌كا ئاسێیه‌ بۆ پاراستنا وه‌لات و ملله‌تێ وی، به‌ژنا وی چیایه‌كێ بلنده‌، ئه‌و ب هێزا ده‌ستێ خوه‌ مه‌زنێ دارستانێیه‌، داكۆكیكار و بێهنفره‌هه‌ ب مێرانییا خوه‌، ب دلۆڤانی و نه‌رمییا خوه‌ یێ مه‌زنه‌، ب ڕێژتنا هه‌ر دلۆپه‌كا خۆها وی، كورسیێن شه‌ڕكار و هێزێن تاریێ دهه‌ژیێن و خۆدانێن وان كورسییان وه‌ك مشكان خوه‌ د تاریاتییا شه‌ڤێدا ڤه‌دشێرن، ب رێژتنا چپكه‌كا دیتر ژى، ئه‌و ژیانێ پێخه‌مه‌ت ڤیان و دلۆڤانی و ئۆمێدێ دابین دكه‌ت.
پێشمه‌رگه‌ ئه‌و گڕنژینه‌، ئه‌وا لسه‌ر لێڤ و دێمێن زاڕۆ و دایكێن بێگونه‌هـ دهێته‌ دیتن، ئه‌و هیڤییه‌، ئه‌وا لسه‌ر ده‌ست و ملێن وى خه‌ونێن ملله‌ته‌كێ خوه‌ڕاگر دبنه‌ راستى، ئه‌و وه‌ك ئه‌یووب-ى بێهنفره‌هه‌، چوجاران ڤه‌گه‌ران و شكه‌ستن د فه‌رهه‌نكا ژیان و كارێ ویدا نینه‌، دچاڤێن ویدا دامه‌زراندنا ده‌وله‌تا كوردی دهێته‌ دیتن كو ئه‌و خه‌ون ئۆمێدا هه‌ر كورده‌كییه‌، لسه‌ر هه‌موو كیانێ وی ب پیتێن زێڕ و ئه‌لماسی نڤیسییه‌ (یان كوردستان یان نه‌مان)، ب پێنگاڤێن وی، نه‌خشه‌یێ رۆناهییا ئایینده‌یێ ملله‌تی دهێته‌ دیتن، لژێر سیبه‌را وی، مرۆڤ هیڤی و ئێمناهیێ دبینیت و چو تشت ل همبه‌ر وی نینن كو نه‌هێنه‌ بده‌ستخستن، ده‌نگێ وی، سه‌مفۆنی و سترانه‌كه‌ و دبیته‌ ده‌نگێ شێری د گۆهێن دژمنێن كورد و كوردستانێدا كو دلۆڤانیێ پێ نابه‌ت و ب ده‌سته‌كێ ئاسنین ل دژمنی دده‌ت و ئه‌ردی لژێر پییێن وی دهه‌ژینیت و ئاگری ژ ئه‌سمانی لسه‌رسه‌رێ وی دبارینیت، و ژیانا وی دكه‌ته‌ دوماهی رۆژ و وه‌خت.
ب شه‌ڕكرنێ دگه‌ل پێشمه‌رگه‌ی، دژمن تبلێن خوه‌ دگه‌زینیت و پووشمان دبیت، لێ پووشمانی چو مفای ناده‌ته‌ وى. هندی ئه‌م لدۆر پێشمه‌رگه‌ی بنڤیسین، په‌یڤ و پێنڤیس نه‌شێن ئه‌وا ئه‌ڤ مێرخواسه‌ دكه‌ت دیار بكه‌ت، چنكو ئه‌و هه‌لگرێ نامه‌یێن پیرۆز و ره‌وشتێن دێرین و ناسناڤێن مرۆڤایه‌تیێیه‌ كو هه‌ر هه‌موو به‌هایێ ئێك دلۆپا خۆها وی نائینن، چنكو وه‌ختێ ئه‌و خۆها خوه‌ درێژیت، ل هه‌مان وه‌خت ژى، ئه‌و ملله‌تێ خوه‌ به‌ره‌ڤ بلندییانڤه‌ دبه‌ت، له‌و لسه‌ر مه‌ فه‌ردبیت به‌ژنا خوه‌ ل همبه‌ر ڤی زه‌لامێ مه‌زن و قاره‌مان بچه‌مینین، ئه‌وێ خوه‌ بۆ مه‌ دكه‌ته‌ قۆربان، هه‌موو رێزگرتن و خوه‌چه‌ماندن بۆ وی بن.
پێشمه‌رگه‌، ده‌زگه‌هه‌كێ په‌روه‌رده‌ییه‌ كو ئارمانجا وی خزمه‌تكرنا وه‌لاتییه‌، درووشمێ وی (ده‌ستپاكی، قۆربانیكرن و خوه‌گۆریكرن تاكو سه‌ركه‌ڤتنێ)، ئه‌و فێرگه‌هـ و زانكۆیه‌ كو لسه‌رئاستێ زانست و زانین و ئاڤاكرنا مرۆڤایه‌تیێ په‌روه‌رده‌ بوویه‌، كاری ب بنده‌ستكرن و ژناڤبرنێ ناكه‌ت، ده‌رچوویێن وان، گه‌له‌ك ناڤن كو بووینه‌ ستێرێن گه‌ش ل ئاسمانێ كوردستانێ و نهۆ هه‌موو كوردستانی شانازیێ پێ دبه‌ن كو ئه‌و ژ هه‌مان فێرگه‌هـ و زانكۆیا دێرینن، چنكو درووشمێ وان (یان كوردستانه‌كا سه‌ربخوه‌ كو ئالایێ وێ یێ ره‌نگین دگه‌ل ئالایێن وه‌لاتێن دونیایێ بهه‌ژیێت، یان مرن)ـه‌. پێشمه‌رگه‌ دێ هه‌ر مینیت ئه‌و كه‌لها ئاسێ و چه‌په‌رێ بهێز بۆ وه‌لات و وه‌لاتیێن خوه‌، هندی وه‌خت دسه‌رڕا ببۆریت، دێ ئه‌و بهێزتر و موكۆمتر و ب به‌هاتر لێهێت وه‌ك شوونواران. پێشمه‌رگه‌ی ب هه‌زاران شه‌هید داینه‌ كو نهۆ ئه‌م ل همبه‌ری مه‌زنییا وان رادوه‌ستین، ئه‌م سۆزێ دده‌ینه‌ وان لسه‌ر رێیا وان بچین و شه‌رمێ ژ لۆمه‌یێن چو لۆمه‌كاران نه‌كه‌ین، خوه‌ ئه‌م چی پێشكێشی وان بكه‌ین، ناگه‌هیته‌ به‌هایێ ئێك دلۆپا خۆها وان.
ئه‌ڤرۆ، ل هه‌موو جیهانا دیمۆكراسی، ناڤێ پێشمه‌رگه‌ی بوویه‌ هیڤی و هێڤێنێ ئازادیێ و په‌سنا وی دهێته‌كرن، لێ ل هه‌مان وه‌خت ژی، ناڤێ وى لجه‌م دژمنان بوویه‌ جهێ ترسێ، چنكو پێشمه‌رگه‌ ژ پێش هه‌موو جڤاكێن مرۆڤایه‌تی و جیهانێڤه‌ یێ شه‌ڕێ ڤان كۆمێن تیرۆریستان دكه‌ت، چنكو ئه‌ڤ كۆمێن تیرۆریستان، چو ژ به‌هایێن مرۆڤایه‌تی و دینی و ره‌وشتی نزانن. دیرۆكێ و روودانان دیاركرییه‌ كو پێشمه‌رگه‌ هێزه‌كا رێكخستییه‌، لدووڤ پیڤه‌رێن نێڤده‌وله‌تی و شه‌رعی هاتییه‌ دامه‌زراندن پێخه‌مه‌ت هاریكاریكرنا بنده‌ست و بێڕێیان، ئه‌ڤجا خوه‌ ئه‌و ل كیڤه‌ بن.

*ماسته‌ر ب قانوونا نێڤده‌وله‌تی
[email protected]

بابه‌تێن ب ڤێ مژارێ ڤه‌ گرێدای