بۆچی كوردۆ؟

عادل حه‌سه‌ن :

زۆرجاران ئه‌ز ئاماده‌بوویمه‌ ل سمینارێن به‌رپرسێن پارتێن كوردى، گه‌له‌ك جاران مرۆڤى هه‌ست ب كێماسیا دكر ده‌مێ گوهددا وان چونكى وان گۆتنێن زه‌به‌لاح یێن هزرمه‌ندێن جیهانى وه‌ك تزبیا رێزدكرن، باوه‌ربكه‌ن كا چه‌وا سۆفیه‌ك بره‌هوانى زكرێ خودێ دكه‌ن وه‌سا ئه‌و به‌رپرس ژى بره‌هوانى گۆتنێن هزرمه‌ندا شرۆڤه‌دكرن و گه‌له‌ك جارن بحال دچۆن ، ل وى ده‌مى پر كه‌یفا من دهات، من هزر دكر كو ملله‌ت بخێره‌، چونكى ملله‌تێ مه‌ برێكا مرۆڤێن عاقلمه‌ند دهێنه‌ برێڤه‌برن، زۆرا جوانه‌ كو رهو‌شه‌نبیر ببنه‌ سیاسه‌تمه‌دار وهه‌ولبده‌ن هاولاتیێ خۆ ره‌وشه‌نهزر بكه‌ن ، بهه‌بوونا گه‌شا هزرى ل جه‌م به‌رپرسى و هاولاتى، دێ ملله‌ت بۆ كنارێن ته‌ناهیێ و گه‌شه‌كرنێ برێكه‌ڤیت.
هه‌تا ڤێره‌ گۆتنه‌ك خۆش و دلڤه‌كه‌ره‌ من گۆتى، لێ گۆتنا نه‌خۆش و دلگرانى ئه‌وه‌ ده‌مێ روودانه‌ك چێدبیت مرۆڤ هه‌ست ب وێ گه‌شا هزرى ناكه‌ت، به‌لكو مرۆڤ هه‌ست دكه‌ت كو هنده‌ك به‌رپرسێن پارتێن كوردى بنه‌زان ونه‌خۆشێن ده‌روونى دهێنه‌ خویاكرن، بگۆر هزرا من گۆتنا كوردى هه‌یه‌ دبێژیت: ( سه‌د گۆتن گۆرى كریاره‌كێ بن ) بۆ ڤان جۆره‌ كاودانان هاتیه‌ ، ژبه‌رچ ئه‌ز وه‌دبێژم ، ئه‌ز وه‌دبێژم چونكى ڤان سیاسه‌تمه‌دارا‌ن دلێ مه‌ سۆت بڤان ره‌فتارێن خۆ یێن نه‌ به‌رپرسانه‌ .
ئه‌م هه‌مى دزانین كو ئه‌ڤرۆ ملله‌تێ كورد یێ دقۆناغا (مان و نه‌مانێ) دا دبۆریت، هنده‌ك خوینمێژێن دونیایێ سیناریۆیه‌ك بۆ كوردان دارێشتیه‌ وبئه‌نجامدانا ڤێ سیناریۆیێ گه‌ر بسه‌ركه‌ڤن دێ كوردان به‌ره‌ڤ چه‌رخێ به‌رین به‌ن، یان دروستتر بێژم : دبیت كوردان نه‌هێلنه‌ لسه‌ر گۆكا عه‌ردى، ئه‌م بچاڤێن خۆ دبینین رۆژانه‌ ره‌فا شه‌هیدا یێ وه‌غه‌رێ دكه‌ن و بڕێن برینداران نه‌خۆشخانه‌ پركرینه‌، رۆژانه‌ ده‌ستدرێژیا سیكسى و كڕین و فرۆشتنێ بژن و كچێن كوردان دكه‌ن، بملیۆنان كۆچبه‌رى و مالخرابكرن مێڤانێن كه‌سێ كورده‌ …هتد .
به‌رانبه‌رى ڤان روودانان هنده‌ك پارتێن كوردى شوونا بیه‌ك ده‌ست وگیان به‌رگریێ ژهه‌بوونا خۆ وملله‌تێ خۆ بكه‌ن، مژوولى دابه‌شكرنا كورسیكا‌ وموزایدێن سیاسینه‌ به‌رانبه‌ر هه‌ڤدو، ئه‌و هێز هه‌یه‌ كو دشێن دو سالا دگه‌ل برایێ خۆ یێ كورد دانوستاندنێ بكه‌ن ژبۆ ئینانا كورسیه‌كێ یان گۆلكرنه‌كێ .
ل دوماهیێ دبێژم : هه‌روه‌كى كورد دبێژن ( مه‌ خۆ هاڤێته‌ پشت لاندكێن هه‌وه‌، نوكه‌ ناكۆكیا پشتگوهـ پاڤێژن، هه‌ڤركیا گیرۆبكه‌ن، مێرخاسیا بۆ دوژمنى ته‌رخانبكه‌ن نه‌ك بۆ هه‌ڤدو، هه‌ردو بهه‌ڤرا بچن گۆلا لسه‌ر دوژمنى بكه‌ن و هه‌ردو بهه‌ڤرا به‌رگریێ ژگۆلا خۆ بكه‌ن، خۆ بكه‌ن یه‌ك بۆ دانوستاندنا دگه‌ل هه‌ڤركێ خۆ نه‌ك دگه‌ل هه‌ڤدو ).
هه‌ر لایه‌كێ هه‌ست بكێمیا كورسیكا دكه‌ت، بلا فه‌رمۆت ئه‌ز ل مالا خۆ دێ هنده‌ك كورسیكا ده‌مێ.

بابه‌تێن ب ڤێ مژارێ ڤه‌ گرێدای