بۆچی حكومه‌تا هه‌رێمێ چ هه‌لویست نینن به‌رامبه‌ر‌ توركیا؟

عیماد ئالیخان

سوپایێ توركیا ده‌ڤه‌رو گوندێن سنوری یێن باشورێ كوردستانێ كرینه‌ ئارمانج و به‌رده‌وام دهێنه‌ تۆپبارانكرن ژلایێ وان ڤه‌ و بوویه‌ ئه‌گه‌رێ په‌یدابوونا گیان ژ ده‌ستدانا خه‌لكێ سڤیل و ترسه‌كا مه‌زن ئێخستیه‌ دناڤا خه‌لكێ ئاكنجیێن وان ده‌ڤه‌ر و گوندان و گه‌له‌ك ژ ئاكنجیێن ده‌ڤه‌رێن دكه‌ڤنه‌ سه‌ر سنورێ دناڤبه‌را باشور و باكورێ كوردستانێ جهـ و وارێن خوه‌ چولكرینه‌. تۆپبارانكرن ژ لایێ سوپایێ توركیا ڤه‌ به‌رده‌وامه‌ و دژوارتر لێهاتیه‌، كو ئێدی نه‌ بتنێ گوندێن دكه‌ڤنه‌ سه‌ر سنورێ بووینه‌ ئارمانجا وان، به‌لكو ئێدی گوندێن دووری سنوری ژی توپباران دكه‌ن ب هێجه‌تا هه‌بوونا چه‌كدارێن په‌كه‌كێ ل وان ده‌ڤه‌ران، وه‌كی مه‌ د هه‌یاما چه‌ند رۆژێن بۆری  دیتی كو چه‌ند گوندێن دوسكیان هاتینه‌ تۆپبارانكرن و ببوو ئه‌گه‌رێ په‌یدابوونا ئاگره‌كێ مه‌زن وب سه‌ده‌ما وێ ئاقارێ چه‌ند گوندان هاته‌ سوتن و تیمێن ئاگرڤه‌مراندێ و خه‌لكێ گوندی نه‌شیان زوو كۆنترۆلا وی ئاگری مه‌زن بكه‌ن، له‌وا زیانێن ئاگری ب رووبه‌ره‌كێ هه‌ره‌ مه‌زن یێ ئاقارێ وان گوندان كه‌ڤت. ئه‌رێ بۆچی حكومه‌تا هه‌رێما كوردستانێ چ هه‌لویست به‌رامبه‌ر تۆپبارانكرنا توركیا بو ئاخا باشورێ كوردستانێ نینن و یا بێ ده‌نگه‌؟! سه‌ره‌رای هندێ كو رۆژانه‌ ئه‌م نوچه‌یێ په‌یوه‌ندیێن هه‌رێما كوردستانێ و توركیا د ده‌زگه‌هێن راگه‌هاندنێ و سوشیال میدیایێ دا دبینین كو د ئاسته‌كێ هه‌ره‌ باش دا نه‌. یان بۆچی ده‌مێ شاندێن مه‌زن یێن باشور سه‌ره‌دانا توركیا دكه‌ن گفتوگویه‌كێ تایبه‌ت دگه‌ل سه‌ركردێن توركیا ناكه‌ن سه‌باره‌ت راوه‌ستاندنا تۆپبارانكرنا ئاخا باشورێ كوردستانێ، هه‌روه‌سا بێده‌نگیا په‌رله‌مانێ كوردستانێ و نه‌ ده‌ركرنا چ به‌یانناما به‌رامبه‌رڤان هێرشێن توركیا سه‌ر ئاخا باشوورێ كوردستانێ كو ئه‌ڤه‌ هه‌موو بووینه‌ جهێ ترس و گومانێ ل جه‌م خه‌لكی ب گشتی، ئێدی دڤێت ئه‌ڤ تۆپبارانكرنه‌ سنوره‌ك بۆ بهێته‌ دانان وراوه‌ستاندن داكو خه‌لك و جوتیارێن وان ده‌ڤه‌ران ب ئارامی بچنه‌ سه‌ر مولك و وارێ خوه‌ بێی ترس و زێده‌تر ژ ده‌ستدانا گیانێ ئاكنجیێن خه‌لكێ سڤیلێ وان ده‌ڤه‌ران.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.