بووك و زاڤایه‌كێ رۆژهه‌لاتا كوردستانێ زێڕێن خوه‌ ب ئاواره‌یێن شنگالێ به‌خشین

بووك و زاڤایه‌كێ رۆژهه‌لاتا كوردستانێ زێڕێن خوه‌ ب ئاواره‌یێن شنگالێ به‌خشین

Capture

وار – كوردۆ رۆژهات :

پارێزگارێ سنه‌ ل رۆژهه‌لاتا كوردستانێ د چارچۆڤێ سه‌ره‌دانا خوه‌ دا بۆ هه‌وێن خڕڤه‌كرنا هاریكارییان بۆ ئاواره‌یێن شنگالێ ل هه‌رێما كوردستانێ، به‌رهه‌ڤییا پارێزگه‌ها سنه‌ ده‌ربڕی بۆ ئاكنجیكرنا وان ئاواره‌یان ل سنوورێن وێ پارێزگه‌هێ.

عه‌بدولمحه‌مه‌د زاهدی پارێزگارێ سنه‌ د ڤێ سه‌ره‌دانا خوه‌ دا بۆ ناڤ هه‌وێن خڕڤه‌كرنا هاریكارییان بۆ كوردێن شنگالێ، راگه‌هاند:‌ ”هاریكاریكرنا كوردێن ئێزدى و شنگالێ كو بووینه‌ قوربانیێن گرۆپێ داعشێ، ئه‌ركێ هه‌موو مرۆڤانه‌”.
پارێزگارێ سنه‌ ئه‌و ئێكه‌ ژى راگه‌هاند، ”وه‌ك خزمه‌تكاره‌كێ خه‌لكى، ئه‌ز خوه‌ ب‌ ئه‌ندامێ هه‌وا هاریكاریێن كوردێن ئێزدی دزانم و ده‌ستخوه‌شیێ ل رێكخه‌رێن ڤێ هه‌وێ دكه‌م كو هاریكارییان بۆ ئاواره‌یێن ئێزدى كۆمدكه‌ن”.
پارێزگارێ سنه‌ د به‌رسڤا پرسێن رۆژنامه‌ڤانان دا، سه‌باره‌ت ب به‌رهه‌ڤییا پارێزگه‌ها وان بۆ ئاكنجیكرنا ئاواره‌یان، گۆت: ”ل ده‌ڤه‌رێن سنوورى ئاماده‌كاری بۆ ئه‌گه‌رێ هاتنا ئاواره‌یان و وه‌رگرتنا وان هاتینه‌كرن، لێ هیڤیدارین تیرۆریستێن داعش تێكبچن و كێشه‌یا ڤان وه‌لاتیێن بێ تاوان چاره‌سه‌رببیت و ڤه‌گه‌ڕنه‌ لسه‌ر مال و وارێ خوه‌ ڤه‌”.
ژ ئالییه‌كێ دى ڤه‌، بووك و زاڤایه‌كێن نوو یێن سنه‌یی پێنگاڤه‌كا بالكێش دا هاریكارییا ئاواره‌یێن شنگالێ كر، ئه‌و ژى ب به‌خشینا هه‌موو زێرێن وێ بووكێ ب سندوقه‌كا ‌خێرخوازیێ بۆ شنگالییان كو ل هه‌ولێرێ هاتبوو دانان.
رۆژا پێنجشه‌مبا بۆرى، بووك و زاڤایه‌كێن نوو یێن سنه‌یی خوه‌ گه‌هانده‌ هه‌ولێرێ، ئه‌و ژى ب مه‌ره‌ما به‌خشینا هه‌موو زێرێن وێ بووكێ ب ئاواره‌ و كوردێن ئێزدیێن لێقه‌ومایێن شنگالێ.
هه‌ر د ڤى چارچۆڤێ پێشكێكشكرنا هاریكارییان دا ژ بال بووك و زاڤایێن نوو ڤه‌، بووك و زاڤایه‌ك دى ژى هه‌ر ل رۆژهه‌لاتا كوردستانێ بڕیاردا هاریكارییان پێشكێشى ڤان ئاواره‌یان بكه‌ن.
ناڤێ زاڤاى ئیره‌ج وه‌یسییه‌ و ئاكنجیێ باژێڕێ ره‌وانسه‌را سه‌ر ب پارێزگه‌ها كرماشانه‌ ل‌ رۆژهه‌لاتا كوردستانێ و ب‌ ره‌زامه‌ندییا هه‌ڤژینا خوه‌، هه‌موو زێر و داهاتێ پرۆسه‌یا هه‌ڤژینییا خوه‌ كره‌ د ناڤ وێ سندوقێ دا كو بۆ هاریكاریكرنا لێقه‌ومایێن شنگالێ ل وى باژێڕى هاتییه‌ دانان.
دیسان بووک و زاڤایەک دى ژى كو ئاكنجیێن باژێڕێ سه‌رده‌شتێنه‌ ل رۆژهەلاتا کوردستانێ، ل پێنجشەمبا بۆرى د رۆژا داوه‌تا خوه‌ دا هه‌ڤخه‌مییا خوه‌ بۆ ئاوارەیێن شنگالێ دەربڕى.
دلشاد خزرى ئێك لە خزمێن ڤێ زاڤایێ سه‌رده‌شتێیه‌، كو بۆ (باسنیوز) راگەهاند، ”ڤان بووك و زاڤایان ب ناڤێن مەهدی رەسوولی و خانم فەریبا ل رۆژا داوه‌تا خوه‌ هه‌ڤخەمییا خوه‌ بۆ شنگالێ دەربڕى”.
هه‌ر وه‌كو د وێنه‌یه‌كێ وان ژى دا هاتییه‌ نیشاندان، ڤان بووك و زاڤایێن سه‌رده‌شتى په‌یامه‌ك بۆ ئاواره‌یێن شنگالێ ڤێیه‌، كو لسه‌ر كاغه‌زه‌كێ نڤیسینه‌ ”شنگال لە یاد ناکەین” ئانكو شنگالێ ژبیرناكه‌ین.
کارەساتا شنگالییان ب دەستێ چەکدارێن دەولەتا ئیسلامى ل ئیراق و شامێ یا ناڤدار ب (داعش)، دلێ هەموو کوردان ل هەموو جیهانێ ب خه‌م و كوڤان ئێخستییه‌، ڤان بووك و زاڤایان ژى، زێده‌بارى ده‌ربڕینا ئێش و ئازارێن ناخێ خوه‌ بۆ خووشك و برایێن وان یێن شنگالى، هه‌ڤده‌م د رۆژا ده‌واتا خوه‌ دا قه‌ستا هه‌وا خڕڤه‌كرنا هاریكارییان بۆ ئاواره‌یێن شنگالێ كر كو ل باژێڕێ وان هاتبوودانان.
ئه‌ڤجا پشتى وان ئه‌ڤ بڕیاره‌ داى كو زێرێ بووكێ بكه‌نه‌ د سندوقا هاریكارییان بۆ شنگالییان دا، وێنه‌یێن ڤان بووك و زاڤایان گه‌له‌ك بله‌ز د ناڤ مالپه‌رێن كوردى و تۆڕێن جڤاكى دا هاتنه‌ پارڤه‌كرن و پێشوازییه‌كا گه‌رم لێ هاتنه‌كرن.

بابه‌تێن ب ڤێ مژارێ ڤه‌ گرێدای