به‌غدا.. ھێزێن ئێمناھیێ بزاڤا ڤالاکرنا مەیدانا تەحریر دکەن

به‌غدا.. ھێزێن ئێمناھیێ بزاڤا ڤالاکرنا مەیدانا تەحریر دکەن

WAAR-دهۆك:

ژ دەستپێکا خوەنیشاندانێن ئیراقێ تا نھا پتری سێسەد کەسان ھاتینە کوشتن و ھەژمارا برینداران ژ پازدە ھزار کەسان دەرباز بوویە.
مەدیایا ئیراقی بەلاڤ کر، ھێزێن ئێمناھییا ئیراقێ بزاڤا ڤالاکرنا مەیدانا تەحریر یا ناڤەندا بەغدا ژ خوەنیشاندەران دکەت، ب وێ ئەگەرێ ژی شەر و په‌ڤچوون دروست بوون و ل دووڤ ئاگەھیێن ھاتینە بەلاڤ کرن پتری سیھـ کەسان برینداربوون.
کۆمسیۆنا مافێن مرۆڤی ل ئیراقێ ژی د نووترین ئامار دا ئاشکرا کر؛ ژ دەستپێکا پێلا خوەنیشاندانێن ئیراقێ کو ل دەستپێکا مەھا چرییا ئێکێ یا ئەڤ سالە بوون، سێسەد و ئێک خوەنیشاندەر ل بەغدا و پارێزگەھێن باشۆر و ناڤەراستا ئیراقێ ھاتینە کوشتن.
ھەروەھا دیار کر؛ ھەژمارا بریندارا گەھشتییە پازدە ھزار کەسان، ل دەمەکی ھەژمارەکا ئێکجار زێدە ژی ھاتییە دەستەسەرکرن.
خوەنیشاندانێن ئیراقێ ل دویێ مەھا بۆری دەست پێ کرینە و پشتی سێ رۆژان ھاتن راگرتن، لێ ژ بیست و پێنجی ھەمان مەھێ ھەتا نھا بەردەوامن، خوەنیشاندەران ل دەستپێکێ داخوازا چاکسازییێ و نەھێلانا گەندەلییێ کرن، لێ نھا ئەو رژدن حکومەت بھێت ھەلوەشاندن.

بابه‌تێن ب ڤێ مژارێ ڤه‌ گرێدای