به‌ریا جزیرێ و مێردینێ ناس بكن!

كۆنێ ره‌ش

 

جزیرا سووریێ دلێ مه‌زۆپۆتامیایه‌ و به‌ریا مێردینێ كه‌زه‌با وێیه‌. به‌ریا مێردینێ لاندكا شارستانییا مرۆڤاهیێیه‌. جهێ هه‌ڤدیتنا نژادێن كو ژ باكۆرده‌ داكه‌تنه‌، پێرگی نژادێن كو ژ باشوورده‌ هاتنه‌ بوونه‌.. گه‌له‌ك رۆژێن خێر و شه‌ر د سه‌رره‌ ده‌رباس بوونه‌; بلند بوویه‌ و جاره‌كه‌ دن داكه‌تیه‌، ئارامی لێ به‌لاڤ بوویه‌ و وێرانیێ جاره‌كه‌ دن كۆنێ خوه‌ د سه‌رره‌ ڤه‌گرتیه‌، چه‌ند جاره‌كێ مۆخۆلان ب سه‌رده‌ گرتنه‌، خه‌لكێن وێ كوشتنه‌، مالێن وان وێرانكرنه‌ و تۆڤێ ژیانێ ژێ قوت كرنه‌.. لێ ڤا جاره‌كه‌ دن، پشتی 600 سالی ژ وێرانیێ و ژ دۆر سه‌د سالیڤه‌، ژیان هێلینا خوه‌ ب خورتی تێده‌ تێ ئاڤا دكه‌، جاره‌كه‌ دن ده‌نگێن مه‌لایێن مزگه‌فتان، زنگلێن دێران و قه‌والێن په‌ره‌ستگه‌هێن ئێزیدیان لێ تێنه‌ بهیستن، دۆدا، گوندێ من گونده‌ك ژ گوندێن پربه‌لاڤە د به‌ریا مێردینێ ده‌.

ژ ده‌ستپێكا مرۆڤاهیێڤه‌ شوونوار ل به‌ریا جزیرێ و مێردینێ هاتنه‌ ئاڤاكرن، هه‌سپ لێ هاتنه‌ كه‌دیكرن، گه‌نم لێ هاتیه‌ چاندن، ئەره‌به‌ و ته‌كه‌ل لێ هاتنه‌ چێكرن و هه‌روها گه‌له‌ك شوونوارێن مرۆڤاهیێ لێ هاتنه‌ دیتن و تێره‌ ده‌رباس بوونه‌…

ژ مێژڤه‌، گه‌له‌ك شارستانی لسه‌ر خاكا وێ هاتنه‌ ئاڤاكرن، گه‌له‌ك نیژاد تێره‌ ده‌رباس بوونه‌، پێمایێن خوه‌، شۆپ و شوونا خوه‌ لسه‌ر خاكا وێ هشتنه‌، مینا; تل هه‌له‌ف (واشۆكانی)، تل براك (قه‌هات)، تل بێده‌ر (نابادا)، تل ئە‌ربید (ئه‌شناكۆم)، تل مۆزان (ئۆركێش) و وها چاخر بازار، گرێ ئێلوونێ، گرێ بهه‌مدوونێ و ب سه‌دان گرێن دیرۆكی یێن دن كو ل به‌ریا مێردینێ و جزیرێ نه‌ به‌ربه‌لاڤ ن. د سه‌ر خاكا وێ ئا دیرۆكی ره‌ سۆباری، سۆمه‌ری و ئاكادی ده‌رباس بوونه‌، ئارتێشێن هووریان، هسیان، میتانیان و ئاشووریان شه‌رێ هه‌ڤ كرنه‌ و ته‌ڤان تۆڤێن خوه‌ د خاكا وان ده‌ چاندنه‌. ل وان ده‌ڤه‌ران گه‌له‌ك جاران فرس و رۆمێ هه‌ڤ وه‌ستاندنه‌. د ئەسمانێ وان ده‌ ده‌نگێ عولدارێن سۆمه‌ری و بابلیان بلندبوونه‌، لسه‌ر په‌راڤێن چه‌مێ وێ دوو`ایێن خوه‌دێناسێن میتانی و ئارامیان ل هه‌ڤ ڤه‌گه‌ریانه‌… ئەڤ ئە به‌ریا جزیرێ و مێردینێ، ئەڤ ئە دلێ وه‌لاتێ مه‌.

بابه‌تێن ب ڤێ مژارێ ڤه‌ گرێدای