بناغێ ھێزا ئابووری یا ھەرێم و ئەمریکا

بناغێ ھێزا ئابووری یا ھەرێم و ئەمریکا

زوھری جەبەلی

پەیوەندییێن ھەرێما کوردستانێ و ئەمریکا زۆرتر د بوارێن سەربازیدا بوون، لێ پشتی حکومەتا ھەرێمێ ب سەرۆکاتیا رێزدار نێچیرڤان بارزانی بناغێ ئابوورییەکا سەربخۆ دانا و ھژمارەکا زۆرا بەرمیلێن نەفتا کوردستانێ ب رێکا تورکیا بۆ ھەمی جیھانێ ھناردی، کۆمپانیایێن ب ھێزێن بوارێ سامانێن سرووشتی بەرێ خوە دا ھەرێمێ و کارین پشتەڤانی و کارتێکرنەکا نێڤدەوڵەتی بۆ ھەرێما کوردستانێ چێکەن و، ھەرێما کوردستانێ بوو جھەک گرنگ ژ بۆ جیھانا ئابووری. رێزدار نێچیرڤان بارزانی سیاسییەکێ دووربینە و دزانی ھەتا کوردستان نەبیتە خوەدی ئابوورییەکا بھێز و کێڵگێن نەفتێ، پێشڤەچۆن دێ کەفیتە ئاستەنگیا و، ھەر ئەو نەفت و ئابووریا بھێز و ئەمنییەتا کوردستانێ بوو وەکری، کورد ب بھێزی بمینەڤە و ببنە خوەدی پشتەڤانییا نێڤدەوڵەتی. پڕۆژەیا ھەری گرنگ د ڤێ دووماھیکێدا، ئیمزا کرنا یادداشتا لێکتێگەشتنێ بوو د ناڤبەرا ژورا بازرگانییا ھەرێما کوردستانێ و ژورا بازرگانییا ویلایەتێن یێکگرتیێن ئەمریکا. ھەروەک سەرۆکێ ھەرێمێ د گوتارا خوەدا دیار کر کوو، قۆناخا پشتی شەڕێ داعشێ قۆناخا ئاڤەدانکرنێیە. بۆ دیرۆکێ ژی دیار دکەڤیت کوو د دەما سەرۆکاتیا خوەدا ل سەرۆکاتییا ئەنجۆمەنێ وەزیران، نێچیرڤان بارزانی رۆلەکێ گرنگ گێڕا و جھێ کارکرنا وی دەرکەفت. ھەرێما کوردستانێ د ناڤ ڤان ئالۆزیی و قەیرانێن داراییدا، ئاڤەدانییەکا مەزن ل ھەمی کوردستانێ ھاتە کرن و، ئەو پڕۆژەیێن خزمەتگوزاری بۆ شار و گوندێن کورستانێ ھاتییە کرن، د ھەیاما ٥٠ ساڵێن دن ژی ل عێراقێ ناھێن کرن.
د پڕۆژەیا ژورا بازرگانییا ھەرێمێ و ئەمریکا، گەڵەک کار دێ ھێنە کرن، کوردستان دێ کەفیتە قۆناخەکا نویدا، پڕۆژەیێن خزمەتگوزاریێ دێ ب رەنگەکێ بەرفرەھتر ھێنە ئەنجامدان، ب شێوەیەکێ سەردەمیانە و ب نەخشە و رێکێن نوو دێ خزمەتا ھەڤوەڵاتییان ھێتە کرن. تنێ ھاتنا ژورا بازرگانیا ئەمریکا، بەسە بۆ ڤێ چەندێ کوو گرنگیا ھەرێمێ دێ بۆ دەوڵەت و جیھانێ ھێتە دیار کرن، گەڵەک کۆمپانیا و ولاتێن دی دێ ھێنە کوردستانێ و وەبەرھێنانێ کەن.چونکی ھەرێما کوردستانێ جودا ژ عێراقێ، ھەرێمەکا پاراستییە و ئەمنیەتا وێ بەقەرارە و، مافێن وانا تێن پاراستن و، باوەڕی دناڤبەرا ھەرێمێ و کۆمپانیایێن بیانی و ناڤ خوەدا ھەیە، ئەڤ چەندە ژی د ھەیاما بۆریدا بۆ ھەمی جیھانێ دیار کەفتییە. نەخاسمە سەرەدانا سەرۆکێ ھەرێمێ بۆ بەغدا و ھەولدان بۆ نەھێلانا کێشەیێن د ناڤبەرا ھەولێر و بەغدا کاردانەڤەیەک ل جیھانێ پەی خوەدا ئانی و دێ بیتە ئەگەر کوو باوەڕییەک چێ ببیت بۆ کۆمپانیا و وڵاتێن دن ژی کو بێنە کوردستانێ و وەبەرھێنانێ بکەن.
پشتی رزگار کرنا عێراقێ ل ساڵا ٢٠٠٣یێدا، پەیوەندیێن گەلێ کورد و ئەمریکا بەر ب پێشڤەچۆنێ چۆن و ژ بلی پەیوەندیێن سەربازی، پەیوەنیێن دیپلۆماسی و ئابووری ژی چێ بوون. ئەڤ پەیوەندییە ژی کارتێکرنەک مەزن ھەبوو لسەر باوەڕی و پێگەھا کوردان ل رۆژھەڵاتا ناڤین.
ژورا بازرگانییا ئەمریکا نوێنەرایەتییا زیدەتر ژ ٣ ملیۆن کۆمپانی و بزنسمەنێن مەزنێن جیھانی دکەت و دێ بیتە پرەکا دی یا گرێدانا ھەرێمێ ب دونیایا دەرڤە یا بازرگانی، ب تایبەت د بوارێن ئینتەرنێت و سیستەمێن دارایی و بانکی، کارگێڕی و رێڤەبرن، پیشە سازی و تڕومپێلان، ھەڤکاری کرنا پڕۆژەیێن بچیک و رووبڕوو بوونا گەندەلیێ و چەند بوارێن دی یێن بازرگانی.
ھاتنا ڤان کۆمپانیا ب رێکا ژورا بازرگانییا ئەمریکا بۆ ھەرێمێ، دێ بیتە ئەگەر بۆ بھێز بوونا ئابوورییا ھەرێمێ و گەڵەک خەڵک دێ بیتە خوەدی کار و رێژا بێکاریێ ل ھەرێما کوردستانێ دێ کێم بیتەڤە.

بابه‌تێن ب ڤێ مژارێ ڤه‌ گرێدای