باسكێتا دهۆكێ پێنگاڤا خۆ یا ئێكێ ب سه‌ركه‌ڤتیانه‌ هاڤێژت

باسكێتا دهۆكێ پێنگاڤا خۆ یا ئێكێ ب سه‌ركه‌ڤتیانه‌ هاڤێژت

Capture

وار – دهۆک :

تیما باسكتبۆلا یانه‌یا دهۆكێ پێنگاڤا خۆ یا ئێكێ ژبۆ پاراستنا ناسناڤێ خۆ یێ وه‌رزێ بۆری هاڤێژت، پشتی شیایی د یارییا خۆ یا ئێكێ دا ژ خولا ئیراقێ یا باسكتبۆلێ سه‌ركه‌ڤتنێ تۆماربكه‌ت، ده‌مێ ب سه‌ركه‌ڤتی د دێربیێ پارێزگه‌هێ دا لسه‌ر مێڤاندارا خۆ یانه‌یا زاخۆ ب ئه‌نجامێ(74-57) خالان، د یارییا واندا ئه‌وا دوهی ل هۆلا گرتییا ناڤه‌ندا وه‌رزش و لاوان ل باژێرێ زاخۆ هاتییه‌كرن، دڤێ یاریێ دا ئه‌وا لسه‌ر ئه‌نجامێ بڕیاره‌كا ئێكه‌تییا باسكێتا ئیراقێ ل وه‌رزێ بووری، یاریی بێی حازربوونا جه‌ماوه‌رێ هه‌ردو تیمان دهاته‌ بڕێڤه‌برن.
د چارێكا ئێكێ دا یاریكه‌رێن دهۆكێ هه‌ر ژده‌ستپێكێ گڤاشتن لسه‌ر خودانێن ئه‌ردی كرن و پرانییا هێرشێن وان ژلایێ یاریكه‌رێن پیشه‌كار بوو ئه‌وژی تۆنی واتسۆن و ئه‌نتۆنی مێلگوایین، ژلایێ خۆڤه‌ یاریكه‌رێن زاخۆ هنده‌ك بزاڤێن باش هه‌بوون به‌لێ ئه‌ڤ چارێكه‌ ب پێشكه‌ڤتنا تیما دهۆكێ ب (16-9) خالان بدوماهی هات. د چارێكا دووێ دا ئاستێ یاریێ باشتر لێهات و هه‌ردو بهێز هاتنه‌ دناڤ یاریێ دا دڤێ چارێكێ دا یاریكه‌رێن دهۆكێ و زاخۆ ئاسته‌كێ مه‌زن نیشاندا ب جوداهییا خاله‌كێ تیما دهۆكێ پێشكه‌ڤت ب(15-14) خالان، نیڤا ئێكێ بوو دهۆكێ ب(31-23) خالان بدوماهی هات. د چارێكا سێیێ دا تیما دهۆكێ ب هه‌موو شیانێن خۆڤه‌ هاته‌ دناڤ یاریگه‌هێ دا و شیا دڤێ چارێكێدا ئه‌نجامێ یاریێ ئێك لابكه‌ت پشتی شیایی كۆنترۆله‌كا باش لسه‌ر یاریگه‌هێ بكه‌ت، رۆلێ هه‌موو یاریكه‌رێن وێ ژبۆ تۆماركرنا خالان یێ دیاربوو بتایبه‌تی هه‌رسێ پێشه‌كارێن وێ، تۆنی واتسۆن، مێلیگۆانین و ئه‌نتۆنی و قوته‌یبه‌ عه‌بدوللا. هه‌مبه‌ری وێ تیما زاخۆ زێده‌تر شیانێن خۆ مه‌زاختن ژبۆ هندێ هێرشێن یاریكه‌رێن دهۆكێ براوه‌ستینن باشترین یاریكه‌رێ وێ یێ ئه‌مریكی بوو ئه‌وژی تۆماس كلین بوو، به‌لێ شاره‌زاهییا وان شیان تیما خۆ به‌ره‌ڤ پێشكه‌ڤتنا سێیێ ببه‌ن ب(29-16) خالان. د چارێكا چارێدا راهێنه‌رێ زاخۆ باش دزانی كو ئه‌ركێ وان بوو نێزیكبوونا خالان یابزه‌حمه‌ته‌ له‌ورا هه‌ر ژ ده‌ستپێكێ پلانێن یارییا بله‌ز و شووتكرنێ دا كر و شیان دڤێ چارێكی دا ب ئاسته‌كێ باش بزڤڕنه‌ یاریێ، هه‌مبه‌ری وێ راهێنه‌رێ دهۆكێ ژبۆ پاراستنا یاریكه‌رێن خۆ ده‌لیڤه‌ دا پرانییا یاریكه‌ران بوو پشكداریێ، دڤی چارێكێ دا خودانێن ئه‌ردی پێشكه‌ڤتن ب(20-14) خالان، به‌لێ ئه‌نجامێ دووماهیی ب سه‌ركه‌ڤتنا قاره‌مانێن وه‌رزێ بووری تیما یانه‌یا دهۆك بدوماهی هات و شیا بجووداهییا 14 خالان دێربیێ پارێزگه‌هێ بده‌ستخۆڤه‌بینن.

بابه‌تێن ب ڤێ مژارێ ڤه‌ گرێدای