ئەگەر ئەز ل سلێمانیێ بام

کارزان فەقی

ل بیرا منە بەریا 3 سالان سەرۆکێ لیستا پارتی ل پەرلەمانێ کوردستانێ د دیدارەکا خوەیا تیلەڤزیۆنێ دا ل ل ھەمبەر پەرلەمانتارەکا گۆرانێ گۆت: د داوی کۆمبوونا جڤاتا نشتیمانیا گۆرانێ پلان ھاتیە دارشتن کو ئەندامێن گۆرانێ وەھا تێبگەھینن ئیدی ئاڤێ گەلەک برێژن و گلۆپا گەلەک ھەلبکەن، ژ بۆی کو بێ ئاڤی و بێ کارەبی د ناڤا ھەرێما کوردستانێ دا پتر ببیت و دەنگێ نەرازیێ وەلاتیان ل ھەمبەری حوکمەتێ زەقتر ببیت، وی دەمی ژبۆ گەلەک ژ خەلکێ ھەرێمێ ئەڤ گۆتنا (ئۆمێد خۆشناو) جھێ باوەرکرنێ نەبوو، ب تایبەت بۆ کەسێن نە پارتی، لێ نھا چو گومانەکا من ل سەر ئاشکراکرنا ناڤەرۆکا وێ کۆمبوونا جڤاتا نشتیمانیا گۆرانێ نەمایە، چونکی بورھان مەجیدێ سترانبێژێ بزاڤا گۆرانێ بخوە ئەو گۆتن پشتراستکر و گۆت: ب ھلکرنا گلۆپێن زێدە و رژتنا زێدەیا ئاڤێ ئەز دژاتیا حوکمەتێ دکەم. ئەڤێ گۆتنا وی د ناڤ سۆشیال مەدیا دا گەلەک دەنگڤەدا، رەنگە ژبۆ پتریا خەلکێ کوردستانێ ئەڤ کریارێن ئەندام و رەوشەنبیرێن گۆرانێ بەرگەکێ سیاسی ھەبیت، لێ د بیاڤی پەروەردە و ھزرکرنێ دا مەترسیێن ڤێ سیاسەتێ و بەرنامەیا ڤێ حزبێ گەلەک مەزنە، ھزرا وێ ئێکێ بکە حزبەک شیابیت ھزرا ھونەرمەندەکی ب ڤی رەنگی تیرۆر بکەت کو زێدەمەزاختنا ئاڤێ و کارەبێ کریارەکە دژی حوکمەتێ؛ نھا ئاستێ ئەندامێن ئاسایی و کەسێن ئومی و نەخواندەڤان د ناڤا وێ حزبێ دا ب چ ئاوایەکی یە؟ گەر ل پێش تیڤیان ب ئاشکەرا بھێتە گۆتن کو زیان گەھاندن ب مال و سامانێ مللەتەکی تشتەک نۆرمال و جھێ دەستخوەشیێ یە، نھا د کۆمبوونێن ڤەشارتیێن وێ حزبێ ب چ ئاوای پلانێ بۆ ڤی مللەتی و دژی کارنامەیێن حوکمەتێ دھێتە دارشتن؟ پرسیارا جەوھەری ئەڤەیە، ئەڤە چ ئەقلیەتە ب ڤی رەنگی بریارێ بدەت کو ھلکرنا گەلەک گلۆپان و زێدە رژتنا ئاڤێ کریارەکە ب دژی حوکمەتێ دھێتە کرن؟ تێناگەھم ئەڤ میتۆدا بزاڤا گۆران کار پێ دکەت ژ کێڤە ھاتیە کو ھەردەما ئەو شیان زیانێ ب مللەتی بگەھینن وی دەمی حوکمەت خەتابارە و ئەو دەستەلات دێ شکیێت؟ ئەز نھا ب درستی گەھشتم وێ باوەریێ کو چما گۆڕان ھەلبژارتن بۆ ھەلبژارتنێ ئاستێ وێ یێ جەماوەری کێمتر دبیت، ل ھەمبەر دا پارتی د ھلبژارتنان دا سەرکەفتنێن مەزنتر ب دەست د ئیخیت. نھا ل کوردستانێ مە حوکمەتەک ھەیە و سەرۆکێ وێ حوکمەتێ نێچیرڤان بارزانی یە، ئەگەر کارەبا نەبوو و ئا‌ڤ کێمبوو؛ حوکمەت کێماسیان بۆ خوە ڤەدگەرینیت و نابێژیت فلان حزب کارەبا و ئاڤا مە ددزیت، لێ سەیر ئەوە حزبەک ژی ھەیە ھەکە کارەبا باش بیت و ئاڤ ژی مشە بیت، کێماسیان بۆ ئەندام و ھونەرمەند و رەوشەنبیرێن خوە ڤەدگەرینیت، چونکی وەکو پێدڤی نەشیانە گلۆپان زێدە ھلکەن و گەلەک ئاڤێ ب ھەروە ببەن لەورا خەلک بوویە خوەدی کارەب و ئاڤێ. تەماشەی ڤێ جوداھیێ بکەن، حزبەک کارنامەیا وێ یا ھەلبژارتنان دابینکرنا کارەبا و ئاڤێ و خزمەتگۆزاریان بیت، حزبەک دی ھەبیت ب پێچەوانەڤە ھزر بکەت و نەھێلانا ئەو کارەبا و ئاڤا ھەیی ژی بەرنامە و پلانا وێ بیت!! بینن ھزرا خوە ھونەرمەند بیت و سترانێن وی دەبارەی خەما ئاخ و کوردستانێ بیت، لێ ب ئاشکەرا بێژیت من زارۆیێن خوە وەھا پەروەردە کرینە کو ب زۆر مەزاختنا ئاڤێ و کارەبێ دژاتیا حوکمەتێ بکەن! دڤێت پەیاما ھونەرێ وی بەر ب کیژان ئاستی بربیت؟ یان ئەو زارۆیێ وەھا ھاتیە پەروەردەکرن، دەما ل ژێر پەروەردەیا بورھانێ سترانبێژ ئەو زارۆ مەزن دبن، مەترسیێن وان ل سەر جڤاکی چەند مەزنە؟ ب ھەموو باوەریان ئەز دبێژم، گۆڕان و ئەندامێن گۆرانێ ناھێلن خەلکێ کوردستانێ ب گشتی و ئەندامێن پارتی ب تایبەتی ژ حوکمەت و حزبا خوە توورە ببن، چونکی دەما ئەز حزبەکێ دبینم ب ناڤێ حزبا مەدەنی ھاتیە گۆرەپانا سیاسی و د ناڤەرۆکدا ھەموو تشتە ب تنێ مەدەنی نینە، بێ دودلی دزانم ئەو تیرۆرا فکریا وان ل ھەمبەر حوکمەتێ ل سنورێ سلێمانیێ کری دێ حوکمەتێ بھێزتر کەت نەک دێ ژناڤبەت، ھەر ئەڤە ژی وەکریە بزاڤا گۆران بەر ب داویێ ڤە بچیت، چونکی ل رەخەکی ناکۆکیێن ناڤخوە ل سەر پارە و دابەشکرنا داھاتێ کۆمپانیێن وان و تاپۆکرنا گرتێ زەرگەتە ھەیە، ل رەخەکێ دی بیرمەندێن وان گەلەک ئاڤێ و کارەبێ ب ھەروە دبەن ژبۆی کو خەلکێ کوردستانێ بێ ئاڤ و کارەبا بن، ئەڤێ ژی ژبیر بکەن، گۆڕان ل ئالیەکێ دبێژیت: شەرمزاریە مرۆڤ مالێ حزبان بخۆت، لێ ئەو ب نھێنی مەھانە ٢٥ دەفتەرێن دۆلاری ژ ئێکەتیێ وەردگرن، تەماشەی ڤێ ھزرکرنێ بکەن: بۆ کارزانەکێ وەکی من شەرمزاریە ل ھەمبەر ڤێ گۆتارا خوە ٢٥ ھزار دیناران ژ دەزگەھەکێ وەشانێ وەربگرم، لێ ژ بۆ گۆڕان نۆرمالە بێی کو چ گۆتاران ژی بنڤێسیت مەھانە ٢٥ دەفتەرێن دۆلاری ب نھێنی ژ ئێکەتیێ وەربگریت. نھا ژی باش دزانم بزاڤا گۆڕان باوەری و پشتەڤانی ژ بۆ حوکمەتا ھەرێمێ زێدەتر کریە، چونکی ھەردەما گازندەیێن خەلکی کوردستانێ ل ھەمبەر حوکمەتێ زێدە دبن، ژ نشکەکێ ڤە، بورھان مەجیدێن گۆرانێ ئاشکەرا دبن و باوەریا من و خەلکی ب چاکسازیێن حوکمەتێ زێدەتر دکەن، بورھان مەجیدێ ھونەرمەندێ گۆرانێ ئەز گەھاندم وێ باوەریێ کو کێم ئاڤی و کێم کارەبایا ھەرێمێ سووچێن حوکمەتێ نینن، بەلکو حوکمەت شیایە ل گۆرەی پێدڤیێن خەلکی کارەبا و ئاڤێ بەرھەم بینن، لێ گۆران و ئەندامێن وێ ب پلان و بەرنامە زێدەتر ژ پێدڤیێن خوە ئاڤێ و کارەبێ د مەزێخن، لەورا مە ئاریشەیا کێم ئاڤی و کێم کارەبا نشتیمانی ھەیە، بێگومان ئەڤە نە ب گۆتنا من، بەلکو ل دووڤ گۆتنا رەوشەنبیر و ھونەرمەندێن بزاڤا گۆرانێ بخوە، لەورا ئەگەر ئەز ل سلێمانیێ بام، داچمە دەف دوکانا ھونەرمەند بورھان مەجیدی و بێژمێ، ب دزینا ئاڤ و کارەبا خەلکی؛ نە ب تنێ ھەوە دەستھەلات نەگھوری؛ بەلکو ھەوە بزاڤا گۆران ژی کرە حزبەکێ بچووک بچووک

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.