ئەگـەر راستـە کورد کافر بن، ئەز مەزنترین کۆردم

ئەگـەر راستـە کورد کافر بن، ئەز مەزنترین کۆردم

دلۆڤان ئەمجەد بارزانی

دیسان شەر، شەر ژی دژی کوردان بۆ نەهێلان و ژناڤبرن و بنبرکرنا کوردان. کورد هەر کوردە چ ل رۆژئاڤا بیت ، چ ل رۆژهەلات بیت ، چ ل باکور بیت، چ ل باشور بیت بێ جوداهی (کۆردستان ئێکە نابیتە دو) . ئەگەر هەر کوردەکێ ل کیرا جیهانێ ژی بهێتە ئێشاندن و بریندارکرن و شەهیدکرن ئەم ل ڤێرە هەست پێ دکەین و غەمبارین هەر تاکەکێ کورد وەسا هزر دکەت ، چونکێ ئەم کورد خودان هەستێن بلندێن کوردایەتیێ نە و ئەم پیرۆزترین نەتەوەینە ل سەر روویێ عەردی . ــ نها ژی دەولەتا تورکیا یا فاشست و دکتاتور یا رادبیت شەرێ کوردان دکەت ل کوردستانا رۆژئاڤا ب رەنگەکێ دویر ژ مرۆڤایەتی و هەر تشتەکێ ب دڕندەترین رەنگ یێ خەلکێ بێ گونەهێ سڤیل دکەنە ئارمانج زارۆك، ئافرەت، دانعەمر بێ جوداهی نێ راستە شەرە بەس دڤێت عەسکەر دگەل شەرڤانان بیت نەك زاروك و ئافرەت و دانعەمران ژی. یا ژ هەمیێ نەخوشتر رێکێ ژی نادەنە خەلکێ سڤیلێ کوردستانا رۆژئاڤا ئاوارەبنە هەرێما کۆردستانێ یان ژی هەر جهەکێ دیێ کوردان . ــ نها ژی ب رەنگەکێ ئاشکەرا یێ دبێژن ئەمێن شەرێ کافران دکەین د رۆژنامەیان دا و سۆشیال میدیایێ دا . ــ تویتێ رۆژنامەیا یەنی یاکیت یا تورکی د مالپەرێ خوەدا نڤیسیە (هەرن بێژنە کافران ، لەشکەرێ محەمەدی ڤەگەریایە) . یەعنێ ئەوێ مە کوردان ب کافر دادنێن ب ئاخفتنێت وان زالم و فاشستا کوردبوون ب رامانا کافربوون دهێت ، هەر ئەو بتنێ نینە عەرەبان ژی ل دەمێ شەرێ چەکدارێن دەولەتا ئیسلامی یا عیراق و شامێ یا ب ناڤێ داعش ، بەشەك ژ عەرەبێن فاشست دگۆت (الاکراد اعداء اللە) ب رامانا (کورد دۆژمنێت خودێ نە). ئەڤ دەولەتێن جیرانێن نەیارێن کوردان گەلەك ئاخفتنێت دی یێن ژڤان خراپتر ب کوردان گوتینە ، لەوما دێ بێژم ئەگەر کورد بوون کافر بوون بیت ، ئەز مەزنترین کافرم. هەروەسا وەکی ئەو دبێژن ئەگەر کورد کافرن (ئەم کورد شانازیێ ب کافر بوونا خوە دکەین) . بلا بزانن سەرکەفتن هەر بو کوردانە و دێ کورد سەرکەڤن چونکێ مە کوردان زۆلم و زۆرداری ژ کەسی نەکریە. مە کوردان شەر ب چ دەولەت و هێزان نەفرۆشتیە ، ب تنێ ئەمێ بەرەڤانیێ ل ئاخ و وەلات و ملك و مال و نامیس و کەرامەتا خوە دکەین. ئەرێ ئەڤە گونەهە  نەخێر.. خودایێ مەزن ژی پشت و پشتەڤانێ مللەتێ کوردە ، چ دەولەتەکا موسلمان ژی وەکی کوردان ب راست و درستی پەیرەوا دیانەتی ب دروستی ناکەت کو بێ جوداهی دگەل هەر ئاینەکێ دی دژین و جانێ ئێك رێزی و ئێکگرتن و ئێك قبوولکرنێ یا هەی د ناڤ کوردستانیان دا ل هەر جهەکێ لێ بن. ــ نێلسون ماندێلا دبێژیت:(ئەگەر تە بڤێت تورکا بناسی ئێك دەمژمێر ببە کورد). ئەڤ ئاخفتنە زۆرا راستە و د جهێ خوەدایە چونکی کەس وەکی کوردان دۆژمنێن خوە ناناسن تایبەت ئەڤێن جیران . ــ ئێك ژ مەلایێن بێ علمێ تورکیا فاشست بۆ خەلکی دئاخڤیت و دبێژیت:(ئەز جارەکا دی داخازێ ل هێزێن تورکیا دکەم کوردان ب دیل نەگرن، داخازێ دکەم برینداران ئازاد نەکەن ، هەر دجهێن خوەدا بکۆژن ، ئەم دحازرین دلۆڤانیێ ب ماری دا ببەین ، ئەم دحازرین دلۆڤانیێ ب دوپشکی دا ببەین ، حازرین دلۆڤانیێ ب گۆرگ و گیانەوەرێن دی دا ببەین ، بەلێ نابیت دلۆڤانیێ ب کوردان دا ببەن ، د شاخ و باژێر و هەر جهەکێ هەوە کوردەك دیت دەستەسەر بکەن و خودێ شاهدە دڤێت بکوژن). ئەڤە ئاخفتنێت وی نەزانێ زالمن، ئەرێ ئەڤەیە ئیسلامەتی و موسلمانیی یێ دبێژیت ل هەر جهەکێ هەوە کوردەك دیت دەستەسەر بکەن و بکۆژن خودێ پێ شاهدە ، ئەرێ د دینێ ئیسلامێ دا هاتیە کەسێن بێ گونەهـ بهێنە کۆشتن، یێ دبێژیت خودێ پێ شاهدە، ئەرێ ئەڤ نەزانە ژ دەف خودێ هاتیەڤە وەسا ب پشت راستی ڤە دئاخڤیت . ــ مەرەما ڤان هەر کورد بیت دڤێت بهێتە ژناڤبرن و کۆشتن ئارمانجا وان ژناڤبرنا کوردانە ب ئێکجاری لێ ئەو خەونە دبینن . ئەڤ کەسانە زۆر زۆر د خەلەتن د دینی نەگەهشتنە ، مخابن بۆ ڤێ عەقلیەتێ ، مخابن بۆ ڤان کەس و دەولەتێن ڤان هزرێن وەسا خەلەت دکەن و ڤان تشتێن بێ بنەما پەیرەو دکەن . د دوماهیکێ دا دێ بێژمە ڤان کەسان وەرن بخوە ژ کوردان فێری مرۆڤایەتیێ و ئێکرێزیێ بن ، وەرن بخوە ژ کوردان فێری پەیرەوکرنا ئایین و مەزهەبان بن ، وەرن بخوە ژ کوردان فێری دلۆڤانیێ و راست و درستیێ بن ، وەرن بخوە ژ کوردان فێری پێکڤە ژیان و ئاشتی یێ بن.

بابه‌تێن ب ڤێ مژارێ ڤه‌ گرێدای