ئەڤ پێنگاڤه‌ دێ هه‌وه‌ ژ كێشه‌یێن خێزانێ دوورئێخن

ئەڤ پێنگاڤه‌ دێ هه‌وه‌ ژ كێشه‌یێن خێزانێ دوورئێخن

وار – دهۆک :

د خێزان و ژیانا هه‌ڤپشكا هه‌ڤژینیێ دا، گه‌له‌ك كێشه‌ و نه‌خوه‌شى دهێنه‌ پێش و دبیت ژى د هنده‌ك خێزانان دا رۆژانه‌ ئه‌و كێشه‌ و نه‌خوه‌شییه‌ هه‌بن، ئه‌ڤ كێشه‌یه‌ ژى دبنه‌ سه‌ده‌ما وێ ئێكێ كو ڤیان و په‌یوه‌ندییا د ناڤبه‌را ژن و مێران دا لازاوبن و هێدى هێدى ڤالاهى و دووركه‌ڤتن د ناڤبه‌را وان دا زێده‌تر و به‌رفره‌هتر لێ بهێت. راسته‌ د خێزانێ دا دێ نه‌خوه‌شى و كێشه‌ هه‌بن، لێ نه‌زانینا هه‌ڤژینان بۆ سه‌ره‌ده‌ریكرنێ دگه‌ل وان كێشه‌یان، رۆژ بۆ رۆژێ كێشه‌ و نه‌خوه‌شیێن وان زێده‌تر لێ دهێن و كه‌رب و كین زێده‌تر د ناڤبه‌را وان دا په‌یدادبیت. د ڤان خالێن خوارێ دا دێ باس ل چه‌ند پێنگاڤه‌كان كه‌ین كو ب بجهئینانا وان، دێ هه‌ڤژین شێن ژ كێشه‌یێن خێزانى دووربن:
1ــ ده‌ما كێشه‌یه‌ك دكه‌ڤیته‌ د ناڤبه‌را ژن و مێران دا، زێده‌ى رادده‌ى تێكڤه‌دان و باسكرن لسه‌ر وێ كێشه‌یێ، دبیت ببیته‌ سه‌ده‌ما په‌یدابوونا كێشه‌یه‌كا مه‌زنتر یان ژى ژێكڤه‌بوونا ژن و مێران، ئه‌ڤجا ژبه‌ر ڤێ ئێكێ پێدڤییه‌ هه‌ڤژین ب گوفتوگۆیێ كێشه‌ و پرسێن خوه‌ چاره‌بكه‌ن و زێده‌ره‌ویێ د بابه‌تان دا نه‌كه‌ن.
2ـ- بسه‌ربرنا بێهنڤه‌دانا هاڤینێ: وه‌سا باشتره‌ ل دووماهییا هه‌فتیێ هه‌ڤژین پێكڤه‌ ده‌مێ خوه‌ ببه‌نه‌ سه‌رى، لێ هه‌كه‌ر ژن یان زه‌لام ژبه‌ر هاتنه‌ پێشڤه‌یا كاره‌كى، نه‌شیا وێ بێهنڤه‌دانێ د گه‌ل خێزانا خوه‌ دا ببه‌ته‌ سه‌رى، ئه‌ڤه‌ نابیت ببیته‌ كێشه‌ بۆ خێزانێ و بكه‌نه‌ نه‌خوه‌شى.
3ــ هەر ئێك ژ ژن و مێران ئارەزۆیێن تایبەت ب خوه‌ هه‌نه‌، ژبه‌ر ڤێ ئێكێ پێدڤى ناكه‌ت هیچ ئێك ژ وان ئاره‌زۆیێن خوه‌ بسه‌ر یێن ئالیێ به‌رانبه‌ر بسه‌پینیت.
4ــ پێدڤییە هه‌ڤژین راستگۆبن د گه‌ل ئێكدو دا، ئه‌ڤ ئێكه‌ ژى ل بیرا هه‌وه‌ نه‌چیت كو دبیت هه‌موو ده‌مان هزركرنێن هه‌وه‌ وه‌كو ئێك نه‌بن، ئه‌ڤجا ژبه‌ر ڤێ ئێكێ پێدڤییه‌ گونجاندن هه‌بیت د ناڤبه‌را ئاره‌زۆیێن هه‌ڤژینان دا.
ئه‌ڤه‌ ئه‌و پێنگاڤه‌نه‌ كو ب بجهئینانا وان، ژن و مێر دێ خوه‌ دووركه‌ن ژ هه‌ر نه‌خوه‌شى و كێشه‌یه‌كا خێزانى، و ل شوونا كو ئه‌و ب نه‌زانینى كێشه‌ و نه‌خوه‌شیێن خوه‌ به‌رفره‌هتر و مه‌زنتر لێ بكه‌ن، ب بجهئینانا ڤان پێنگاڤان به‌لكو ب به‌ره‌ڤاژى دێ كێشه‌ و نه‌خوه‌شیێن خوه‌ به‌ره‌ڤ كێمبوون و نه‌مانێ به‌ن و چو كه‌رب و كین ژى د ناڤبه‌را وان دا په‌یدا نابیت، و دێ خوه‌شترین ژیان بیته‌ به‌ختێ وان و هه‌رده‌م دێ تامێ ژ ده‌م و ژیانا خوه‌ بینن، ئه‌ڤجا ژبه‌ر ڤێ ئێكێ پێدڤییه‌، هه‌ر ده‌ما ژن و مێر تووشى كێشه‌یه‌كا خێزانى بن، ئێكه‌م تشتێ كو هزر لێ بكه‌ن، دڤێت چاره‌كرنا وێ كێشه‌یێ و خوه‌ دووركرن ژ به‌رفره‌هبوون و مه‌زنكرنا وێ كێشه‌یێ بیت.

بابه‌تێن ب ڤێ مژارێ ڤه‌ گرێدای