ئەو وه‌لاتێن پترین خیانەتا هه‌ڤژینیێ لێ هه‌ی

ئەو وه‌لاتێن پترین خیانەتا هه‌ڤژینیێ لێ هه‌ی

وار – دهۆک :

دیاره‌ د په‌یوه‌ندیێن ژیانا هه‌ڤژینیێ دا خیانه‌ت ب تنێ د ئێك ده‌رازینك ڕا ده‌ستپێدكه‌ت و دبیت ژى هه‌ر ئێك ژ هه‌ڤژینان خیانه‌تا هه‌ڤژینیێ ب جۆره‌ك ژ سه‌ره‌ده‌ریێ ڤه‌ گرێبده‌ت.
داكو هه‌ڤژین بزانن كا سه‌ده‌مێن سه‌ره‌كیێن سه‌رهلدانا خیانه‌تا هه‌ڤژینێ د ناڤبه‌را ژن و مێران چنه‌، دڤێت هه‌ڤژین ئاماژه‌یێ ب كێماسیێن ژیانا خوه‌ یا هه‌ڤژینیێ بده‌ن، ئانكو چو ژ ئالیێ په‌یوه‌ندییا د ناڤبه‌را وان ژن و مێران دا و چو ژ ئالیێ په‌یوه‌ندییا ده‌ربڕینا سۆزداریێ د ناڤبه‌را وان دا.
بێ گومان ده‌ما ژن یان زه‌لام هه‌ست ب ڤالاهییه‌كا د ژیانا خوه‌ یا هه‌ڤپشك دا دكه‌ت و وى/وێ ئه‌و باوه‌رییه‌ هه‌یه‌ كو هه‌ڤژینا/ێ نه‌شێت وێ ڤالاهیێ د ژیانا وان دا پڕبكه‌ت، ئه‌ڤجا ژبه‌ر ڤێ ئێكێ ئه‌و تووشى ژ رێ ده‌ركه‌ڤتنێ دبیت. د ڤى ده‌مى دا دڤێت رۆلێ كه‌سێ سێیێ ژ ئالیێ گڤاشتن و دروستكرنا په‌یوه‌ندیێ لبه‌ر چاڤ بهێته‌ وه‌رگرتن، كو كه‌سه‌ك دێ په‌یدابیت و ژ هه‌مان خالا لاواز ڤه‌ یا د ناڤبه‌را وان هه‌ڤژینان دا دێ ده‌ستپێكه‌ت، له‌و ژى پیلانێن خوه‌ بكاردئینیت و په‌یوه‌ندییه‌كا نوو دروست دبیت.
ڤه‌كۆله‌ر و بسپۆرێن جڤاكناسیێ دیاركرییه‌ كو بنه‌مایێ سه‌ره‌كیێ خیانه‌تێ د په‌یوه‌ندییا سۆزدارى و ره‌فتارێ دا ڤه‌دگه‌ریته‌ڤه‌ بۆ په‌روه‌رده‌یا خێزانى و دابونه‌ریت و كولتۆر و ره‌وشه‌نبیرییا خێزانى و مه‌رجێن سه‌رده‌مێن به‌رى پێكئینانا هه‌ڤژینیێ و باوه‌رییا وى كه‌سى.
هەرچەندە كۆمه‌ك ژ هه‌ڤژینان خیانه‌تێ ب تۆلڤه‌كرنێ دهه‌ژمێرن، ئانكو ده‌ما ژ خیانه‌تا هه‌ڤژینا/ێ خوه‌ هایدار دبیت، بێى وێ ئێكێ كو پێشتر هزر د ڤى كارى دا كربیت، لسەر بنەمایێ بڕیاردانا بله‌ز و نالۆژیكییانە ب مه‌ره‌ما تۆلڤه‌كرنێ به‌ره‌ڤ خیانه‌تێ دچیت.
خالا گرنگ ئەوە كو دڤێت هه‌ڤژین گرنگیێ ب ئالیێ ده‌روونى و سۆزدارییا ئێكدو بده‌ن نه‌ك ب تنێ ئالیێ سه‌رڤه‌یى و دارایى، ژبه‌ركو ب به‌روڤاژى وێ ئێكێ سۆز و وەفادارى كێم دبیت و ئالییان ب ئاقاره‌كى دگه‌هینت كو ب ساناهى مل ب په‌یوه‌ندیێ د گه‌ل كه‌سێن دى دا ببه‌ت و خیانه‌تا هه‌ڤژینیێ سه‌رهلده‌ت.
بسپۆڕێن ده‌روونناسیێ ژى وه‌سا دبینن كو ”هنده‌ك كه‌س هه‌نه‌ ب دلمرادى ژیانا هه‌ڤژینیێ پێكنائینن، ئه‌و ژى ب هێجه‌تا وێ ئێكێ كو ناخوازن ڤێ به‌رپرسیاره‌تیێ ب ستوویێ خوه‌ ڤه‌ بگرن، یان ئه‌و كه‌سێن كو جاره‌كێ ژیانا هه‌ڤژینیێ پێكئیناین و بزاڤێ دكه‌ن كو په‌یوه‌ندیێ د گه‌ل وان كه‌سان دا گرێبده‌ن كو خێزاندارن”.
ل گۆره‌ى ئاماره‌كێ كو دەزگه‌هێن راگه‌هاندنێ یێن جیهانى به‌لڤكرییه‌، ل 10 وه‌لاتان د جیهانێ دا پترین خیانه‌تا هه‌ڤژینیێ دهێته‌ تۆماركرن و ژ سه‌رجه‌مێ وان 10 وه‌لاتان، تایلەند ل رێزا ئێكێ دهێت كو زێده‌ترین خیانه‌تا هه‌ڤژینیێ تێدا دهێته‌ تۆماركرن. كو ل گۆره‌ى وێ ئامارێ، رێزبه‌ندییا وان 10 وه‌لاتێن پترین خیانه‌تا هه‌ڤژینیێ لێ هه‌ى، ئه‌ڤێن خوارێنه‌:
تایلەند ب رێژه‌یا 56%ێ ئێکەمین وه‌لاتە بۆ خیانەتا هه‌ڤژینیێ
دانیمارک ب رێژه‌یا 46%ێ
ئەلمانیا ب رێژه‌یا 45%ێ
ئیتالیا ب رێژه‌یا 45%ێ
فەرەنسا ب رێژه‌یا 43%ێ
بولگاریا ب رێژه‌یا 40%ێ
نەرویج ب رێژه‌یا 40%ێ
ئیسپانیا ب رێژه‌یا 39%ێ
فیلەندا ب رێژه‌یا 39%ێ
بریتانیا ب رێژه‌یا 36%ێ

بابه‌تێن ب ڤێ مژارێ ڤه‌ گرێدای