ئەو رێیێن په‌یوه‌ندییا هه‌ڤژینیێ شـاد دهێلن

ئەو رێیێن په‌یوه‌ندییا هه‌ڤژینیێ شـاد دهێلن

وار – دهوك :

پشتى ده‌ربازبوونا چه‌ند ساله‌كان ب سه‌ر گرێدانا په‌یوه‌ندییا دو خوه‌شتڤییان دا، گه‌له‌ك ژ خه‌لكى هه‌ست ب هاتنه‌ خوارا ئاستێ ڤیانا خوه‌ دكه‌ن، چو چاره‌یه‌كا سحرى ژى نینه‌ بۆ نه‌مانا هه‌ستێ بێزاریێ د حه‌زژێكرنێ دا، لێ هنده‌ك ره‌فتار و كریارێن بچووك هه‌نه‌ كو دێ بنه‌ هاریكار بۆ مانا ڤیان و حه‌زژێكرنێ ب به‌رده‌وامى د ناڤبه‌را هه‌ڤژینان دا.
دوبارەبوونا ژیانا رۆژانە و گڤاشتنێن ژیانێ ژ دیارترین سه‌ده‌مێن تێكدانا په‌یوه‌ندییه‌كا حه‌زژێكرنا گه‌رمن. هه‌تا نوكه‌ ڤه‌كۆله‌ر و شاره‌زایێن بوارێ په‌یوه‌ندیێن ژن و مێران، نه‌شیاینه‌ چاره‌سه‌رییه‌كا بله‌ز ببینن بۆ مانا په‌یوه‌ندییا خوه‌شتڤییان ب گه‌رمى، لێ به‌رچاڤ وه‌رگرتنا ڤان پێنج رێیێن ل خوارێیه‌، هاریكاربن بۆ مان و به‌رده‌وامییا په‌یوه‌ندییا خوه‌شتڤییان ب گه‌رمى و رۆمانسى ڤه‌، گۆڤارا برگیتە یا ئه‌لمانى پێشنیارا ڤان رێیان كرییه‌، ئه‌و ژى ئه‌ڤێن ل خوارێنه‌:
پێكڤه‌ گه‌شتكرن:
شکاندنا رۆتین و دوبارەبوونا ژیانا رۆژانە گه‌له‌ك پێدڤییە، ب تایبەت هه‌كه‌ر ده‌مێ پێكڤه‌ مانا وان هه‌ر دو خوه‌شتڤییان د رۆژه‌كێ دا كێمبیت، ئه‌و ژى ژبه‌ر پێدڤیێن ژیانێ، شاره‌زا وه‌سا دبینن؛ هه‌لبژارتنا جهه‌كى بۆ گه‌شتكرنێ هند گرنگ نینه‌ هندى كو گه‌شتكرن ده‌رچۆنه‌كه‌ ژ رۆتینا رۆژانه‌ و پێكڤه‌ مان بۆ هه‌یامه‌كا درێژ.
گرنژینا پێكڤه‌:
دبیت هنده‌ كه‌س وه‌سا بزانن ئه‌ڤه‌ تشته‌كێ چونه‌یه‌، لێ ئه‌ڤه‌ راست نینه‌، پێكڤه‌ گرنژین په‌یوه‌ندییا حه‌زژێكرنێ د تێن و گۆر دئێخیت، ژبلى وێ ئێكێ كو گرنژین هه‌ستێ خوه‌شیێ ب مرۆڤان دبه‌خشیت، ئه‌ڤه‌ ژى ژ بال شارەزایێن چارەسەریێ ب گرنژینێ ڤه‌ هاتییه‌ پشتراستكرن، گرنژین سه‌ده‌مه‌كێ ب هێزه‌ بۆ ده‌رخستنا هۆرمونێ ئەندرۆفین، کو هۆرمۆنێ تایبەته‌ ب هەستکرن ب ئاسۆدەیی و خوه‌شیێ ڤه‌.
پێكڤه‌ روونشتن:
بێگومان ئه‌ڤ پێنگاڤه‌ كاره‌كێ گه‌له‌ك دروسته‌، دیاركرنا ده‌مه‌كى بۆ روونشتنێ دگه‌ل هه‌ڤپشكا/ێ ته‌، رامانا وێ ئێكێ دگه‌هینیت كو تو گرنگییه‌كا تایبه‌ت ب وێ/وى دده‌ى، هه‌ر چه‌ند‌ گڤاشتن و نه‌خوه‌شیێن ژیانێ ل ڤێ ئێكێ رێگربن ژى، شاره‌زایێن په‌یوه‌ندییا هه‌ڤژینیێ پێشنیارا وێ ئێكێ دكه‌ن كو رۆژانه‌ هه‌وه‌ ده‌مه‌كێ دیاركرى هه‌بت بۆ خوارنێ، یان هه‌ر چو نه‌بیت بۆ قه‌هوه‌ ڤه‌خوارنه‌كێ، كو ب ڤێ پێنگاڤێ دێ هوون پتر نێزیكى هه‌ڤ بن و د وى ده‌مى دا دێ ده‌رگه‌هێ پتر دانوستاندنێ و گوهداریكرنا بۆچۆنێن هه‌ڤدو بۆ هه‌وه‌ ڤه‌بیت.
ئارمانجێن هه‌ڤپشك:
ئارمانجێ هه‌ڤپشكێن دو خوه‌شتڤییان، په‌یوه‌ندییا د ناڤبه‌را وان دا ب هێزتر دئێخیت، د ناڤ وان ئارمانجێن هه‌ڤپشك ژى دا پێكڤه‌ بڕیاردان بۆ جگاره‌كێشانێ یان گرنگیدان ب باغچه‌یێ مالێ یان كاركرن بۆ نووژه‌نكرنا مالێ، ئه‌ڤ ئارمانجێن هه‌ڤپشك بیاڤێ زێده‌تر دده‌نه‌ خوه‌شتڤییان داكو گوفتوگۆیا زێده‌تر د ناڤبه‌را وان دا هه‌بیت، وه‌كو ئه‌ندامێن ئێك تیمێ دێ ل وان هێت، كو پێكڤه‌ به‌ره‌ڤ ئارمانجه‌كا هه‌ڤپشك گاڤێ دهاڤێژن و هه‌ر ده‌ما شاشى یان رێگرییه‌ك ژى د وێ ئارمانجێ دا هاتییه‌ پێشییا وان، دێ ئه‌و هه‌ردو پێكڤه‌ كار بۆ چاره‌سه‌ركرنا وى بارى دكه‌ن و ئه‌و ئێكدو سووچدارێن وان شاشییان نابینن.
دەست ئێخستنا لناو دەستێ ئێكدو:
ده‌ما دو خوه‌شتڤى ده‌ستێن خوه‌ دكه‌نه‌ د ناڤ ده‌ستێن ئێك دا، ڤێ ئێكێ رۆله‌كێ كاریگه‌ر هه‌یه‌ د په‌یوه‌ندییا د ناڤبه‌را وان دا، ئه‌ڤ كریاره‌ پارێزگاریێ ژ په‌یوه‌ندییا له‌شییا د ناڤبه‌را وان دا دكه‌ت، هه‌ر وه‌كو نێزیكییا د ناڤبه‌را وان دا ب تێنتر لێ دكه‌ت، ده‌ست ئێخسته‌ د ناڤ ده‌ستێن ئێك دا ب سیمبۆلا رۆمانسییه‌تێ د ناڤبه‌را خوه‌شتڤییان دا دمینیت، هه‌كه‌ر ژیێ وان خوه‌شتڤییا چه‌ند ژى ژێ ده‌ربازببیت. ئه‌ڤجا ژبه‌ر ڤێ ئێكێیه‌ گرنگه‌ خوه‌شتڤى بزاڤێ بكه‌ن پترییا جاران ده‌ستێن خوه‌ بكه‌نه‌ د ناڤ ده‌ستێن ئێك دا كو ب وێ ئێكێ دێ تر هه‌ست ب ئارامى و پاراستنێ ژى كه‌ن.
ماچا گەرم:
ماچێ، کاریگەرییەکا سحری هەیە بۆ ب گەرمی مانا نێزیكبوونا زێده‌ترا دو خوه‌شتڤییان، هه‌ر ئێك ژ وان تاما ئالیێ دى دكه‌ت، گڤاشتنێن ژیانێ ژى ژبیردكه‌ن، شاره‌زایێن په‌یوه‌ندییا هه‌ڤژینیێ وه‌سا دزانن كو ماچ فاكته‌ره‌كێ ب هێزه‌ بۆ ده‌رخستنا هۆرمۆنێن ئاسۆدەیی و خوه‌شیێ د له‌شێ مرۆڤى دا، ئه‌ڤه‌ ژبلى وێ ئێكێ كو مفا بۆ ساخله‌مییا مرۆڤان ژى هه‌یه‌. ئه‌ڤجا دڤێت خوه‌شتڤى ژبیرنه‌كه‌ن پێدڤییه‌ ئه‌و ڤێ ماچا گه‌رم د ناڤبه‌را خوه‌ دا بهێلن و ب وێ ئێكێ په‌یوه‌ندییا د ناڤبه‌را خوه‌ ژى دا هه‌ر ب گه‌رم و خوه‌شى ببه‌نه‌ سه‌رى.

بابه‌تێن ب ڤێ مژارێ ڤه‌ گرێدای