به‌ختیار زێباری
جاره‌كێ به‌رپرسه‌كێ حكومه‌تێ ل سه‌ر ئاستێ بلند ب سه‌ره‌دان هاته گوندێ مه، گوندێ مه نیزیكى 300 ماڵان بوو، ل گوندى دووپشكه‌كێ ب كچه‌كا وى یا بچووك ڤه‌دا، ژبه‌ر كو چ بنگه‌هێن ساخله‌مییێ ل گوندى نه‌بوون، ره‌وشا كچا وى گه‌له‌ك تێك چوو و ئه‌و گه‌له‌ك تووره‌بوو، هه‌ر چه‌وا بیت كچا وى گه‌هانده دكتۆره‌كی ل ده‌رڤه‌ى گوندى، وى به‌رپرسی پشتى ئه‌و دیمه‌ن دیتى، بریار دا كو بنگه‌هه‌كێ ساخله‌مییێ ل گوندێ مه بهێت دروستكرن، ئه‌ز دروستى نزانم لێ هزردكه‌م ئه‌و سالا 2006ێ بوو، گۆتى ئه‌ڤه 13 ساڵ چوون و هه‌تا نوكه 5 كه‌س ل گوندێ مه ب سەدەما پێڤه‌دانا دووپشكى مرىنە و هێشتا مه بنگه‌هەکێ ساخله‌مییێ ژى نینه! هندى ئه‌م دكه‌ین و دبێژین، نه‌ده‌نگێ مه‌دگه‌هیت وى به‌رپرسی و نه ژى جاره‌كا دى ئه‌و دهێته گوندێ مە.
ئه‌ڤه نموونه‌یەكه وه‌لاتییه‌كی بۆ من ڤه‌گێرایه..
ل هه‌رێما كوردستانێ دو ده‌ستهه‌لات هه‌نه، ئێك دبێژنێ ده‌ستهه‌لاتا بلند كو ژ به‌رپرسێن ئێكێ وه‌كه (سه‌رۆك، سه‌رۆك حكومه‌ت، وه‌زیر و بریكار..) پێك دهێت، ده‌سه‌لاتا دویێ ئه‌وا دبێژنێ ده‌ستهه‌لاتا نێزیك ژ خه‌لكى یان ژى بێژین (ده‌ستهه‌لاتا نزم) كو ئه‌و ژى هه‌ر ئێك ژ (پارێزگار، جێگرێن وى، رێڤه‌به‌رێن گشتی یێن فه‌رمانگه‌هان، رێڤه‌به‌رێن فه‌رمانگه‌هان و به‌رپسێن پشكان) یێن سنۆرێ پارێزگه‌هێ ب قه‌زا و ناحیه ڤه، ب خوه ڤه دگریت، دناڤبه‌را ڤان دو ده‌ستهه‌لاتان دا تشته‌ك هه‌یه دبێژنێ وه‌لاتى، ئه‌وێن كو رۆژانه مامه‌له و كارێن وان دچن به‌رده‌ستێن وان دو ده‌ستهه‌لاتان.
ئه‌گه‌ر ئێكێ بیانى گه‌ر خوه بۆ ئێكه‌م جار ژی بهێته هه‌رێما كوردستانێ و بۆ ده‌مه‌كێ كێم گوهێ خوه بده‌تە خه‌لكى دێ هه‌موو ئاریشه‌یێن خه‌لكى زانیت. ژ بلى كو ئه‌و دێ ئاریشه‌یان زانیت، تشتێ سه‌یر ئه‌وه گه‌ر پرسیارا ده‌مێ وان ئاریشه‌یان بكه‌ت دێ وێ ژی زانیت كو هنده‌ك ئاریشه ل هه‌رێمێ هه‌نه ژیێ وان 27 ساڵه، ئه‌رێ گه‌ر وه‌سا هزر بكه‌ین مرۆڤه‌كی 27 ساڵان نەخوەشە ڤه‌گرتى یه و تا نها چاره‌سه‌رییا خوه نه‌كرییه! ئه‌رێ تۆ بێژی گه‌ر نەخوەشییا وى چه‌ند یا سڤك ژى بیت ئه‌و ساخ بمینیت، ژبلى مرنا وى ئه‌رێ ل وان سالێن ئه‌و نه‌خوەش، تو هزر دكه‌ی وی چه‌ند كه‌سێن دى ژى یێن نێزیكى خوه نه‌خوەش كربن، یان هه‌ر چنه‌بیت ببیته بارگرانی، ئاریشه ژى ب خوه هه‌ر نەخوەشییه ده‌ما نه‌هێته چاره‌كرن دێ مه‌زن بیت و دێ تشتێن دروست ژى لاواز كه‌ت، ژبه‌ر كو گه‌ر ته د مال دا دو به‌فر گر هه‌بن ده‌ما ئێك خراب دبیت و تو چێنه‌كه‌ی، بێگومان تو دێ بارێ یا دی ئه‌وا دروست گران كه‌ى و ره‌نگه دێ وێ ژى ب ده‌ردێ یا ئێكێ ڤه‌به‌ى.
ئه‌رێ مانه جهێ پرسیارێ یه؛ ته وه‌زاره‌ت هه‌بیت، ته ئیدارەیا پارێزگه‌هێ هه‌بیت، ته رێڤه‌به‌رێن گشتى هه‌بن و هێشتا بهێین خار.. ته رێڤه‌به‌رێن فه‌رمانگه‌هان ژى هه‌بن و هێشتا ئاریشه‌یێن ته هه‌لاویستى مابن و چاره‌نه‌بن! ژ وێ سه‌یرتر ته ئاریشه هه‌بن و وه‌زاره‌ت نه‌زانیت یان ژى سه‌رۆكێ حكومه‌تێ نه‌زانیت یان ژى جهێ ل ده‌رڤه‌ى سنورێ پارێزگه‌ها ته نه‌زانیت و هنده ساڵه تو مژوولى ئاریشه‌یێ ڤه‌شێرى دا تو بمینى، ئه‌و ئێشا 27 ساله هه‌ی ب رێیا گه‌له‌ك ڤایرۆسان په‌یدابوویه، لێ ڤایرۆسێ هه‌رێ مه‌زن بێده‌نگبوون ل سه‌ر ئاریشه‌یان و نه‌گه‌هاندنا وان بوویه، ئه‌گه‌ر ده‌ستهه‌لاتێ دڤێت ئاریشه‌یێن خه‌لكى چاره‌بكه‌ت، ب دیتنا من دڤێت دو تشتان بكه‌ت، ئێك؛ یان دڤێت ل سه‌ر ئاستێ بڵند بهێن و دگه‌ل خه‌لكى بئاخڤن و ئێكسه‌ر ئاریشه‌یان چاره‌بكه‌ن، یا دویێ؛ ژى دڤێت ئه‌و كه‌سێن كۆ مه ب ده‌سه‌تهه‌لاتا نزم یان ژى ده‌ستهه‌لاتا خارێ ناڤكرى، بهێن گۆهەرین یان ژى فێربكه‌ن كو ئه‌و هاتینه دانان بۆ گه‌هاندنا ده‌نگێ خه‌لكى نه‌ك نڤاندنا ئاریشه‌یێن خه‌لكى.
