ئەرێ مام ، خال ، باپیر یەعنی چ ڤیانا وان یا چاوایە .؟

ئەرێ مام ، خال ، باپیر یەعنی چ ڤیانا وان یا چاوایە .؟

 

دلــۆڤــان ئــەمــجــەد بــارزانــی

ئەز نزانم ڤیان و حەژێکرنا (خال ــ مـام ــ باپیر) یا چاوایە چونکێ من نەدیتی نە و نزانم ژێ بێ بەهربوومە چونکێ رژێما بەعسا فاشیستا ژناڤچوییا عیراقێ نەهێلان ئەڤان عەزیزێن خوە ببینم وەکی خەلکی و هەڤالێن خوە سەبرا خو ب وانا بینم .
دەمێ ئەزێ بچیك هەڤالێت من ل قوتابخانێ باسێ باپیر و مام و خالێت خوە دکرن ئەز دا چمە مال بێژمە دایکا خوە و بابێ خوە ئەرێ بو هەمی کەسا و هەڤالێت من خال و باپیر و مام هەنە من نینە یێت من کێڤە چوونە گەلەك عاجز دبووم بۆچی خال و مامێن وان دیاریا بو دکرن دەمێ ل قوتابخانێ دەردچن من چ نینە بومنیش بکرن.
لێ من نەدزانی کو ئەزێ ب ئاخفتنێت خوە یێ برینێت دایكا خوە و بابێ خوە نوی دکەمە ڤە ئاگرێ د دلێ وان دا هەلدکەمەڤە ب چاڤێن تەژی رووندك و حەزرەتڤە دا هێفکەنە من و بێ دەنگ مینن من نەدرانی کا بێدەنگیا وان یا چی یە من نەدزانی کو بۆچی بەرسڤا من نادەن بو من نابێژن .

هەتا ئەز مەزن بوی هنگی من زانی کۆ چ هەڤالێت من هندی من مام و خال نەبوون ئەز گەلەك پەشیمان بووم من شەرم ژ دایك و بابێ خوە دکر کا من ئەو چەند جاران ئێشاندن و بریندارکرن من زانی کو ئەز خودانێ (٦)شەش مام و باپیرەکێ باش و (۲) دوو خال و باپیرەکێ دی یێ دایکێ بوون لێ مخابن رژێما بەعس هەمی ژناڤ بربون بەرەف عەرەبستانێ بربون ، ب راستێ برنا شەش کورا دگەل بابی کارەساتەکا زورا مەزن و دل ب ئێشە لێ یا ژ هەمیێ ئەز د ئێشاندم ئەو بو نە حکومەتا عیراقێ نە حکومەتا کۆردستانێ و نە چ لایەنێن سیاسیێن هەرێما کوردستانێ پسیارا حالێ دایکا خودانا شەش کورێن جینوسایدکری و دگەل هەڤژینێ وێ کو دبنە (۷) حەفت نەدکر هەر چنەبا بلا پیچەك دلێ وێ دابا ڤە و قەدرێ وێ گرت با داپیرا من شێرە ژن بوو خودانا زورترین ئەنفالێت جینوسایدکری بوو ل دەڤەرا بارزان ، لێ چبکەین کوردان چجاران خوشی نەدیتینە ب تایبەتی بارزانیان هەر یێن هاتینە ئەنفالکرن و جینوسایدکرن ، ئاوارەبوون و دەربەدەر کرن ، کۆمکوژکرن و ب ساخی بن ئاخکرن ، بێ سوچ و سەبەب بتنێ گونەها وان ئەو بو کو کوردن و بارزانی نە .
ئەرێ بارزانی بوون گونەهەکا هندا مەزنە کو ب ڤی شێوەی بهێنە سزادان و کوستن و ژناڤبرن و جینوسایدکرن ..؟
ئەرێ کوردبوون گۆنەهەکا هندا مەزنە کو دەولەتێن جیران هەمی هەولا ژناڤبرنا وان بدەن و نەهێلن چ خوشیا د ژیانێ دا ببەن و ب ئازادی و سەربەستی وەکی هەرکەسەکێ د جیهانێ دا بژین ..؟

ـ ئەز نزانم ڤان شوڤینیا چ ژمە کوردان دڤیا و دڤێت ژی بۆچی بەلا خوە ژمە ڤەناکەن ما ئەو نزانن کو کورد بن دەستیێ قبول ناکەن ، ما ئەو نزانن کو کوردان شەرێ کەسی نەکریە بەس بن دەستی ژی قەبول نەکریە و قبول ژی ناکەن ، ما وان نەدزانی کورد خەلاس نابن روژ بو روژێ زێدەتر و خورتر دبن لسەر ئازادکرنا کوردستانێ .

جارەکا دی ئەو رۆژا رەش و شوم هاتەڤە رۆژەکا وەکی ئەڤرو بو (۳۱ــ۷ــ۱۹۸۳)ێ بو کو عەسکەرێن رژێما بەعسا عیراقی یا ژناڤ چویی ب سەروکاتیا دکتاتور (صدام حسێن) سەر ب مللەتێ بارزان داگرت ، هێشتا رۆژ ب درستی دەرنەکەفت بۆ بلبـلان ئاواز نەخاند بوون ، سپێدەهیەکا گەلەك زوو بو گۆلا خوە نە خەملاند بو ، بێ دەنگی بو هەمی دخەو بوون د خەوا شیرین دابوون ، کەوان هێش ل سەرێ چیایی ئاواز ب مێرخاس و عەگیدێن بارزانا من نە خاند بو ، لێ وێ سپێدەهیێ چیایێ شرینێ گەلەکێ ب خەم بوو .
لێ مخابن ڤان هۆڤان هەمی ژ خەو راکرن و ب زۆری ژ مال دەرئێخستن و مالێن وێران و خراپکرن هەمی زەلام ژێ گرتن و بتنێ زاروك و ئافرەت هێلان هەمی کرنە د زیلان دا ب درندەترین رەنگ ل مال دەرئێخستن .
دایك و ئافرەت و زارۆك کەتنە قیژیان و گازی دکرن دێ کێڤە بەن و دێ چلێ کەن ، گازی دکرن دگوتن کورێ من ، باب ، برا ، مام ، خال ، باپیر ، پسمام ، خارزا ، خوشتڤیێ من ، رحا من ، هەڤال و هوگرێ من دێ کیڤە چن ئەڤ عەرەبێن شوڤێنی دێ وە بەرەف کێش مەمللەکەتی و جەهنەمێ ڤەبەن .
لێ مخابن وان ژی نەدزانی کادێ بەرەڤ کێش جەهنەمێ ڤەبەن .
یا ژ هەمیێ نەخۆشتر ئەو بو کەسی نەدزانی کا ب چ سەبەب ئەڤان بێ گونەهـ و مێرخاسان ب زوری دگەل خوە د بەن و بەرەف مرنێ ڤە دێ بەن ب زۆری دێ رحاوان کێشن بێ هندێ کو خودایێ مەزن بریارا مرنا وان دابیت بێ گونەهـ بێ سەبەب ئاخ ئەڤە چیا دلهەژین و غەمگینە دلێ مەهەما سوت و پارچە پارچە کر .
دڤێ روژێ دا رەشاتی و خەم و کوڤانان ب سەر بارزانا من دا گرت چ ژ رەگەزێ (نێر) نەهێلان بەس ئافرەت و زاروك مان هەی دنیایێ چ خەمەکا گرانە دایك مەجبور مان وەکی زەلامان کاربکەن دا پاریەکێ نانی بو زاروکێن خوە پەیدا بکەن زکێ برسی پێ تێر بکەن هەمی شول دکرن مل ب ملێ زەلامان .

ــ ئەڤە (۳٦) سال دەرباز دبن ژ سەر ڤێ کارەساتا دژی مرۆڤایەتیێ کو (۸۰۰۰) هەشت هزار بارزانی ژ رەگەزێ نێر بەرەف بیابان و سحرایێن گەرمێن عەرەبا برن .
ئەڤ مێرخاس و عەگیدە فێری گەرماتیا سحرایێت عیراقێ نەبوون .
دناڤ دار بەرو مازیان بەرەف بیابانێتآ هشك و بێ ئاڤ .
ل بن سێبەرا خوەشا چیایێ شرینێ بەرەف گرکێن توزێ و غەبارا عەرەبان برن .
ل ناڤ ژینگەهێ جوانێ کۆردستانێ بەرەف پیساتیێن عیراقێ برن .
ل جیاتی دەنگێ کەوان و ئاوازێن چوچکان دەنگێ نەخوشێ عەرەبا و حێشتران گوهـ لێ د بوو .
ل جیاتی سێبەرا دار بەرو کەزان و مازیان لبن سێبەرا دار قەسپان را برن .

هندی بێژم ب دۆماهیك ناهێت نزانم چ بو هنگو بێژم ب چ زمان و پەیڤ ب بەژن و بالا و مێرخاسی و جوانیا هنگۆ بێژم ئەم ب پەیڤ و دیرۆك و هەمی ڤە قەردارێت وەینە دێ چاوا وە ژبیرکەین .
دەمێ ئەز وان دایك و بۆکێن سالێ دبینم جەرگ و دلێ من سووزیت کۆ هێشتا بێ هیڤی نەبوونە ژ نەبونا هنگو .
هەر چاڤەرێ هاتنا هەوەنە چاڤێن وان هەر ێیل سەرێ رێکێ کا دێ کەنگی بەرەف مال ڤە هێن و بارزانا لاندکا شێران .

هێشتا بۆکێن سالێ عەڤریێ بۆکێنیێ ل سەرسەر و چاڤێن خوە رانەکریە هەریا چاڤەرێ خوشتڤیێ خوە کو بهێت وێ عەڤریێ راکەت .

ــ لێ نزانن کو ئەڤە دکتاتۆر و هۆڤ بوون ڤانا کەس و کارێن مە یێن ژبن تۆزا دەشتێ بەزرکری ب ساخی و بێ گۆنەهـ یێن کۆمکوژ و بن ئاج و بێ سەر و شوین کرن ب جارەکێ ئارمانج و هیڤیێن وان دگەل وان بن ئاخ کرن ڤان دڕندان دڤیا کوردان ب گشتی و بارزانیان ب تایبەتی نەهێلن و ب ئێکجاری ژناڤ ببەن لێ وان نەدزانی کو بارزانی ژ نڤشێ رۆژێ و ئاگری نە ژ تەریقا نەقشەبەندی نە وەسا ب ساناهی ژناڤ ناچن چونکی گەلەك ژ مرنێ مەزنترن .

ــ ئەڤە (۳٦) سی و شەش سالێن پری حەزرەت و کوڤان دەربازبوون لسەر ئەنفالکرنا بارزانیان هێشتا ژی ئەم هەرێ چاڤەرێ هاتنا وان و بی هیڤی نەبووینە نزانین کا ل کیژ مەملەکەتی نە ل کێرێ کومکوژ و جینوسایدکرنە .

دلــۆڤــان ئــەمــجــەد بــارزانــی

 

بابه‌تێن ب ڤێ مژارێ ڤه‌ گرێدای