ئێكبوون هێڤێنێ‌ سه‌رهلدانا كۆبانێ‌ یه‌

فارۆق یووسڤ سلێمان :

دبێژن: ده‌مێ‌ مرۆڤ ل مه‌زنیێ‌ و سه‌ركێشیێ‌ دگه‌ڕت، دڤێت سه‌رده‌ریكێ‌ خوه‌ بلند بكه‌ت. كۆبانێ‌ سێیه‌م باژێرێ‌ كوردییه‌ ل رۆژئاڤا, نێزیكی 384 گوندان بخوه‌ڤه‌ دگریت, نێزیكێ‌ 500 هزار مرۆڤان تێدا دژین, جیوپۆلیتیكا وێ‌ زۆر گرنگه‌, هه‌ڤسنۆره‌ دگه‌ل ده‌وله‌تا توركیا, ژ 15 ئیلۆنێ‌ وه‌ره‌ بوویه‌ ئارمانجا رێكخراوا تیرۆرستییا داعش, ل هه‌مان ده‌م ژى، بوویه‌ سومبۆلا به‌رخودانێ‌ و هیمایه‌كێ‌ پیرۆز د جه‌رگێ‌ هه‌ر كورده‌كێ‌ خودان وژداندا، ئه‌و پێدڤی ب پشته‌ڤانییا هه‌موو لایه‌كی هه‌یه‌، ب تایبه‌تى ئه‌و پێدڤى ب كۆده‌نگی و ئێكرێزی و ئێكهه‌له‌وه‌ستییا ملله‌تێ‌ كورده‌, لێ‌ دگه‌ل هندێ‌، دڤێت هنده‌ك خال لسه‌ر پیتان بهێنه‌ دانان, ئارمانجێن حزباتی و نه‌ته‌وایه‌تیێ‌ ژێك بهێنه‌ جوداكرن, نابیت چو لایه‌نه‌ك كۆبانێ‌ بۆ خوه‌ بكه‌ن چه‌كه‌ك بۆ سه‌پاندنا سیاسه‌ته‌كا به‌رته‌نگ و دوور ژ بنه‌مایێن دیمۆكراسیه‌ت و پێكڤه‌ژیانێ‌, ئانكو ماده‌م هه‌موو لسه‌ر پاراستن و به‌رگریێ‌ ژ كۆبانێ‌ كۆده‌نگ و ئێكهه‌لوه‌ستن, دڤێت د دانا بریارا چاره‌نڤێسێ‌ رێڤه‌برنا كۆبانێدا ژی هه‌ڤپشكبن، هه‌ر لایه‌نه‌ك لدووڤ قه‌باره‌یێ‌ خوه‌ بلا پشكداربیت, پارتێن بچووك به‌رێن ژ خوه‌ مه‌زنتر هه‌لنه‌گرن, پێدڤییه‌ هه‌موو لایه‌ن ناكۆكیێن خوه‌ لسه‌ر مله‌كی دانن و خوه‌ڕاگری و قۆڕتالكرنا كۆبانێ‌ لسه‌ر ملێ‌ دی دانن, پاش هه‌كه‌ ره‌وش باشبوو، بلا ب رێیێن دیمۆكراسی خوه‌ ژ ئێكدو داقوتن و كاربكه‌ن بۆ جێبه‌جێكرنا ئارمانجێن خوه‌ یێن نه‌ته‌وه‌یی. جارێ‌ ب پله‌ ئێك، هاریكارییا كۆبانێ‌ وه‌كو ئه‌ركه‌كێ‌ نه‌ته‌وه‌یی لسه‌رملێن هه‌رێما كوردستانێ‌ دكه‌ڤیت، چونكه‌ دڤێت دیتن و بۆچوونێن هه‌ر كورده‌كى ئه‌وبن برایێ‌ خوه‌ سه‌ربێخه‌، ئه‌ڤجا سته‌مكار بیت یان سته‌ملێكری بیت, و هه‌رێما كوردستانێ‌ ب پره‌نسیپێ مه‌ هه‌مووان بۆ هه‌وه‌یه‌ و هه‌وه‌ ژی بۆ خوه‌یه‌، سه‌ره‌ده‌ری دگه‌ل رۆژئاڤایێ‌ كوردستانێ‌ كر, نۆكه‌ژی هه‌رێم ب تایبه‌تی سه‌رۆكاتییا هه‌رێمێ‌ به‌رده‌وامه‌ لسه‌ر هاریكاری و پشته‌ڤانییا كۆبانێ.
ل سالا 2012ێ، سه‌رۆكێ‌ هه‌رێمێ‌ گشت لایه‌ن و پارت و رۆناكبیرێن رۆژئاڤا ل هه‌ڤلێرێ كۆمكرن و داخواز ژێ كر د ناڤبه‌را خوه‌دا رێبكه‌ڤن و ئێكده‌نگ و ئێكهه‌لوه‌ست بن د هه‌موو بواره‌كیدا, لێ‌ جهێ‌ داخه‌كا مه‌زن بوو پێگیری پێ‌ نه‌هاته‌كرن. هه‌رێما كوردستانێ‌ 3000 چه‌كدارێن رۆژئاڤا مه‌شقدان و چه‌كداركرن بۆ رۆژه‌كا وه‌كی ئه‌ڤرۆ ل كۆبانێ‌، ل شنگارێ‌ ژی به‌رگریێ‌ ژ كوردستانێ‌ بكه‌ن، لێ‌ ئه‌وژی نه‌هاته‌ قه‌بوولكرن، دبیت ل بڕیار خوه‌ لێڤه‌ببن و ژ نوو بچنه‌ كۆبانێ‌، زێده‌باری هنارتنا چه‌ك و ته‌قه‌مه‌نیێ‌ ب رێیا ئاسمانی, دیسا سنۆرێ‌ هه‌رێمێ‌ ل به‌رامبه‌ر پتر ژ 250 هزار په‌نابه‌ران هاته‌ڤه‌كرن و هه‌تا ئه‌ڤرۆ ژی حوكمه‌تا هه‌رێمێ‌ ب خزمه‌تا وان رادبیت، ئه‌وژی ل پێشچاڤ نه‌هاته‌ وه‌رگرتن. هاریكاریێن مرۆڤایی و له‌شكری بۆ كۆبانێ هاتینه‌كرن, سه‌رۆكاتییا هه‌رێمێ‌ ب شێوه‌یه‌كێ‌ به‌رده‌وام هه‌ولداینه‌ ده‌وله‌تێن زلهێز بێنه‌ده‌نگ بكه‌ت ژبه‌ر كو ئه‌ڤ كانتۆنه‌ مافێ‌ كوردانه‌، داكو هاریكارییا وان بهێته‌كرن, هه‌تا لێدانا داعشێ‌ ژى لسه‌رده‌ستێن هه‌ڤپه‌یمانان ل كۆبانێ‌ و ده‌ردۆرێن وێ‌، ب هه‌ڤكاری و ئاگه‌هییا هه‌رێما كوردستانێ بوویه‌.
دڤێت په‌یه‌ده‌ سیاسه‌تا خوه‌ بگوهۆریت و باش بزانیت كو خه‌لكه‌ك لدووڤ گازییا كۆبانێ‌ هاتییه‌ده‌نگ، نه‌ك ژبه‌ر په‌یه‌دێ‌, ژ لایێ دبلۆماسیڤه‌ خوه‌ پێشبێخیت و په‌یوه‌ندیێن خوه‌ به‌رفره‌هتر لێ‌ بكه‌ت، دگه‌ل پارت و لایه‌نێن كوردی پتر رۆلى بده‌تێ‌ و وان پشكدار بكه‌ت د پرۆسێسا سیاسیدا ل رۆژئاڤا كوردستانێ‌, ب هه‌مان شێوه‌ دگه‌ل پارچه‌یێن دیترێن كوردستانێ‌ ب تایبه‌تی هه‌رێما كوردستانێ‌ وه‌كو هێله‌كا سۆر بیت بۆ سه‌ره‌ده‌ریێ‌ دگه‌لدا, و هه‌ولبده‌ن ئه‌ڤ ده‌ستكه‌ڤتێن قۆربانی بۆ داین ل هه‌رێمێ بهێنه‌ پاراستن و پشته‌ڤانیێ‌ لێ‌ بكه‌ین، نه‌ك دناڤا هه‌رێمێدا‌ ده‌ستێ‌ خوه‌ درێژبكه‌ن بۆ سه‌ر پۆلیس و وه‌لاتیێن وێ‌, دڤێت هه‌ڤكار و دانوستاندنان دگه‌ل ئۆپۆزسیۆنا سووریێ‌ بكه‌ت و مافێن كوردان د ستراتیژییه‌تا واندا جێگیر و زه‌لال بكه‌ت، هه‌روه‌سا په‌یوه‌ندیێن خوه‌ دگه‌ل رژێما سووریێ‌ قوت بكه‌ت، ئه‌گه‌ر بۆ ده‌مه‌كی یان كاودانه‌كی مفا ژ رژێما سووریێ‌ هاتبیته‌ وه‌رگرتن، لێ‌ ئه‌ڤ ده‌مه‌ دخوازیت هه‌لوه‌سته‌كێ‌ دیتر وه‌ربگریت، چونكو كه‌سه‌كێ‌ ژ كوردان پتر كورد و به‌رژه‌وه‌ندییا كوردان نه‌ڤێت. ئه‌ڤه‌ هند رۆژ بوون جڤینێن پارت و لایه‌نێن رۆژئاڤا ل دهۆكێ ب ئاماده‌بوونا سه‌رۆكاتییا هه‌رێمێ‌ دهاتنه‌كرن كو خوه‌شبه‌ختانه‌ گه‌هشته‌ رێككه‌ڤتنه‌كا دیرۆكى، ب دیتنا من؛ وێ رێككه‌ڤتنێ پشت ل دژمنی شكاندییه‌ و تورك و ئیران و ئیراق ژى نه‌ره‌حه‌تكرینه‌ ب تایبه‌تی ده‌مێ ده‌نگوباسێ‌ چێكرنا له‌شكره‌كێ ئێكگرتى ژ هه‌موو پارچه‌یێن كوردستانێ‌ بۆ پاراستنا ئاخا كوردستانێ‌ هاتییه‌ بیستن, ژبلی خوه‌شكرنا دلێ‌ هه‌موو كوردێن دلسۆز نه‌ك ئه‌و لایه‌نێن لسه‌رئێكزێده‌كرنان لسه‌ر كوردان دكه‌ن كو برای دژی برای هاندده‌ن و گه‌له‌كێ‌ دده‌نه‌ ب پیچه‌كێ‌ كو ئه‌و یه‌ك دچیته‌ د خانه‌یا نه‌حه‌زێن كورداندا دژی ملله‌تێ‌ وان.
پرسیار ژ هێتله‌ری هاتبووكرن؛ بێ‌ به‌هاترین مرۆڤ لجه‌م ته‌ كینه‌؟ به‌رسڤ ئه‌ڤه‌بوو: ئه‌وێن هاریكارییا من كری دژی گه‌ل و وه‌لاتێن خوه‌. دڤێت هه‌ردو جڤاتێن نوونه‌رییا رۆژئاڤایێ كوردستانێ دكه‌ن، داگیرانان بۆ هه‌ڤدۆ بكه‌ن، و هه‌ردو كوردینێ‌ بكه‌ن نه‌ك حزباتییا به‌رته‌نگ، پاش ل دوماهیێ‌ بلا سندۆقێن ده‌نگدانێ‌ دادوه‌ربن د ناڤبه‌را هه‌موو پارت و لایه‌نێن رۆژئاڤادا و گه‌لێ‌ كورد بڕیارده‌رێ‌ ئێكلاكه‌رێ‌ ڤێ‌ چه‌ندی بیت.

[email protected]

بابه‌تێن ب ڤێ مژارێ ڤه‌ گرێدای