ئێزدی کوردێن رەسەنن و ڤیان دەخیل نوونەرا ئێزدیانە

کامیران قاسم – ئەلمانیا :

 

بەرسڤه‌ك بۆ میر تەحسین بەگ

 

پێداچوونەك لسەر دیدارا میرێ ئێزدیان ل رۆژا 17/10/2014 ل دەمژمێر 8:30 ئێڤاری ل پرۆگرامێ (نقطة‌ نظام) لسەر کەنالێ (العربیه‌)، لێ مخابن هەلویستێ میرى گەلەك نەباش بوو و راستی نەئینا زمان،
میر تەحسین بەگ میرێ ئێزدیێن جیهانێ، ل دەستپێکا پەیڤا خوه‌ بیێ سلاڤ، ب دەستپێکەکا نەرێكوپێك و یەكسەر دەست ب بەرسڤدانێ کر، ب وەلامێن نەبەرپرسیارانە و دوور ژ راستیێ، لسەر بارێ نەتەوایەتییا مە ئێزدیان گۆت: ئێزدی ئۆل و نەتەوە ئێزدینە. لێ ئه‌و یه‌ك دوورە ژ راستیێ .نەتەوه‌یا مە ئێزدیان کوردێن رەسەنن ل په‌ى وان ڤەکۆلینێن زانستی و مەرجێن نەتەوایەتیێ ژ ئالیێ زمان، مێژوو، خاك و رێورسمێن کۆمەلایەتی، سەرەرایی قەول، بەیت، دوعا و درۆزێن مە ئۆلا ئێزدیان ب زمانێ کوردینە و ژێدەرێن مێژوویی راستییا نەتەوایەتییا کوردی یا ئێزدیان پشتراستکرییە، ڤەکۆله‌ر دبێژن: ئۆلا ئێزدیان تاکە ئۆلا نەتەوه‌یا کوردە ب زمانێ کوردى.
لسەردەمێ رژێما بەعس یا دکتاتۆرى، مخابن دوبارە نەتەوه‌یا مە ئێزدیان، ژ لایێ هنده‌ك بەرپرسێن ئۆلا مە ئێزدیانڤە، ژ نەتەوه‌یا کوردی بۆ نەتەوه‌یا ئەرەبی هاتبوو گوهارتن، پشتی سەرهلدانا پیرۆز ژى ل بهارا 1991 و دامەزراندنا بنگەهێ لالش یێ رەوشەنبیری و کۆمەلایەتی ل دهۆکێ ل 12/05/1993ێ، ئێك ژ ئارمانجێن سەرەکیێن بنگەهێ لالش خوه‌یاکرن و دیارکرنا نەتەوه‌یا کوردی یا ئێزدیان بوویه‌، زۆر کار و پێنگاڤێن مێژوویی هاتن ئاڤێتن ژ لایێ رەوشەنبیر و ڤەکۆله‌رێن ئێزدی و بیانیڤە. دەمێ رژێما بەعس زانی پیلانا وان دهێتە هەلوەشاندن، ل سالا 1997 ئەز وەك بەرپرسێ پەیوەندیان ل بنگەهێ لالش، ل وی سەردەمی نامەیەکا تایبەت ژ ئالیێ ئێك ژ بنەمالا میرێ ئێزدیان بۆ بنگەهێ لالش شاند، تێدا گۆتبوو: هوون وەك بنگەهێ لالش دبێژن ئێزدی کوردن، و گۆتبوو: ئەم وەك بنەمالا میر و ئێزدیێن لژێر دەستهه‌لاتا رژێما بەعس، دبێژن ئێزدی عەرەبن، د وێ نامه‌یێدا لسەر نەتەوایەتییا ئێزدیان بۆ مە بنگەهێ لالش پێشنیازکربوون؛ بلا ئەم نەبێژن ئێزدی نەتەوه‌یا عەرەبن، و هوون ژى ل بنگەهێ لالش نەبێژن ئێزدی نەتەوه‌یا کوردن، بلا ئەم هەردو لقەلەم بدەین كو نەتەوه‌یا ئێزدیان ئۆل و نەتەوه‌ ئێزدی نە، لێ مە وەك بنگەهێ لالش قەبوولنەکر و مە گۆت: ئەم کوردین، مە گۆتە وان: سەرۆك مەسعود بارزانی ژی گۆتییە “یان مللەتەك بناڤی كورد نینه، یان رەسەنترین كورد ئیزیدینه” .
پشتی هندەك سیاسەتمەدارێن ئێزدیێن سەرب پارتێن کوردستانیڤە یێن دژی پارتی دیمۆکراتی کوردستان، خۆه‌ ل دەوروبەرێن میرێ ئێزدیان خوه‌جهكرى، پیلانێن خوه‌ مەشاندن و میر خاپاند و تووشی شاشییا مەزن کر. یا ژ هەمیێ مەزنتر، پشتی خۆشکا ڤیان دەخیل ب دەنگێ ئێزدیان بوویە ئەنداما پەرلەمانێ ئیراقێ و بەرگرییەکا باش و گەش ژ مافێن ئێزدیان ل شنگالێ کرى و دەنگێ وێ گەهشتییە هەمی دونیایێ كو جهێ رێزێیە لجەم پرانییا مە ئێزدیان، مخابن تەحسین بەگ گۆت: ڤیان دەخیل نوونەراتییا من و ئێزدیان ناکەت، ب تنێ نوونەراتییا خوه‌ و پارتی دیمۆکراتی کوردستان دکەت، ئه‌ڤ دیتنا میرى، جهێ سەرسۆرمانێیە كو میرێ مللەتەکی ب ڤی رەنگی ل خەلکێ خوه‌ مەیزەبکەت!. بەلێ میرێ ئێزدیان، ئەم دبێژن: ئەم کورد و کوردستانینە، ژبەر كو ئێزدی کوردن، ل دەستپێکا شۆڕشێن بارزان، دایکا مە مەیان خاتوون-ێ نامەیەك بۆ شێخ ئەحمەد بارزانی شاندبوو و تێدا پشتەڤانی و پشتگری وەك میرەکا کوردێن ئێزدی ل سەرهلدانێن بارزان کربوو، بەلێ میرێ مە ئێزدیان، تە ب خوه‌ ل دەستپێکا شۆڕشا ئەیلۆلا مەزن پەیوەندی ب شۆڕشێ و بارزانیێ نەمر کربوو و تەڤایا ئێزدیان بووینە پێشمەرگەهێن وێ شۆڕشێ مل ب ملێن هه‌وەڤه‌ خەباتکرییه‌، گەلۆ مانە ژبەر ئەم ئێزدی کوردبوون و ئەصلێ کوردانە، ئەرێ میرێ مە تو دزانی ب هەزاران ئێزدی لناڤ بزاڤا رزگاریخوازییا کوردی شەهیدبوونە، ئەرێ میرێ مە تو دزانی ب سەدان وار و گوندێن مە هاتنە تالانکرن و ێرانکرن ژبەر كو ئەم کوردبووین. ئەز وەك کامیران قاسم کوڕ و نەبی و برایێ شەهیدێ کورد و کوردستانێ مە، داخوازێ ژ میرێ مە ئێزدیان دکەم لێبۆرینەکا بلەز ژ مللەتێ خوه‌ یێ ئێزدی و کوردی بکەت لسەر وان بۆچوونێن شاش و نەراست و دوور ژ حەقیقەتێ. بەلێ میرێ مە ئەم ئێزدی کوردێن رەسەنن و عەصلێ کوردانە.

بژیت ئێزیدخان، بژیت کورد، بژیت کوردستان.

بابه‌تێن ب ڤێ مژارێ ڤه‌ گرێدای