ئیلھام ئەحمەد داخوازا دەڤەرا دژەفرینێ دکەت

ئیلھام ئەحمەد داخوازا دەڤەرا دژەفرینێ دکەت

WAAR-دهۆك:

سەرۆکا جێبجێکار یا مەسەدێ داخواز ژ ئەمریکا کر کۆمکوژییا ل باکۆرێ سوورییێ براوەستینیت و دەڤەرەکا دژەفرینێ یا ل ژێر کۆنترۆلا نێڤدەولەتی رابگەھینیت.
ئاژانسا رۆیتەرز یا نووچەیان دیار کر؛ ئیلھام ئەحمەد، سەرۆکا جێبجێکا یا جڤاتا سووریایا دیمۆکراتیک، مەسەدێ ل ئەمریکا یە و د کۆمبوونێن د گەل کۆنگرێسمەنێن ئەمریکا دا داخواز کر ئەمریکا ژ ھەلوەستا خوە یا ڤەکێشانا پاشگەز ببیت و رێ ل کۆمکوژییا تورکیا دخوازیت بکەت بگریت و د گەل جڤاکا نێڤدەولەتی دا دەڤەرەکا دژەفرینێ کو ژ ئالییێ ھێزێن نێڤدەولەتی ڤە بھێت برێڤەبرن، ل سەر سنۆرێ باکۆرێ سوورییێ و تورکیا ئاڤا بکەن.
ل گۆری رۆیتەرزێ؛ ئیلھام ئەحمەدێ راگەھاندییە کو تورکیا دخوازیت ب سەدان ھزار کەسان ژ وەلاتییێن باکۆرێ سوورییێ بکوژیت، لەورا ژی گەر ئەمریکا وێ کۆمکوژییێ رابگریت، ھەسەدە دێ بەردەوامییێ دەت کار و ھەماھەنگییا د گەل ئەمریکا دا.
ڤان ھۆلن، سیناتۆرێ ئەمریکی، پشتی کۆمبوونا د گەل ئیلھام ئەحمەدێ د کۆنگرەیەکێ رۆژنامەڤانی دا راگەھاند: پێدڤییە ئەڤ کۆمکوژییە بھێت راوەستاندن و ئەو پشتراست ببن داعش ناڤەگەریت، لەورا ژی ئەو کار ل سەر کۆمکرنا زێدەتر یا ئیمزایان ژ بۆ سەپاندنا سزایێن گران ل سەر تورکیا دکەن.
لێنزئ گراھام، سیناتۆرێ ئەمریکی یێ ناڤدار یێ بەری نھا ژی دژی بریارا ترامپی،گۆت: ئەو بەرپرسیارییا ڤەگەریانا داعشێ ب تەمامی بۆ تورکیا ڤەدگەرینن و ئەو نھا کار ل سەر دەڤەرەکا بێچەک د ناڤبەر تورکیا و ھەسەدێ دا دکەن کو ھێزێن نێڤدەولەتی برێڤە ببەن.

بابه‌تێن ب ڤێ مژارێ ڤه‌ گرێدای