ئۆجەلان داخوازا ئاشتیێ دکەت!

ئۆجەلان داخوازا ئاشتیێ دکەت!

ژیوار عەبدولجەبار

ئەڤ مانشێتە پشتی ڤەگەریانا محەمەد ئۆجەلان، برایێ عەبدوللا ئۆجەلانێ رێبەرێ زیندانکری یێ پەکەکێ ل گەلەک مەدیایان ھاتە دیتن. ل ڤێرێ ئەگەر ئەم بابەتێ کا نامە ب دروستی ژ ئۆجەلانی یە یان نە، کا ئۆجەلان ھێژ ساخە یان نە، نامەیێن وی گەر ئەو بخۆ دنڤیسیت ژی ل بن کارتێکرنێ نە یان نە بدەینە ئالیەکی، دێ شێین ھندەک خالێن دی بەرچاڤ وەرگرین.

– ئاشتی! ئەگەر پەیاما پەکەکێ نەبتنێ ب درووشم بەلکو ب کریار ئاشتی یە، دەمێ ٣٥ سالانە گەریلایێن وێ ل چیا چ دکەن؟

– ئاشتی! ئەگەر پەیاما پەکەکێ ئاشتی یە، ما دێ نامە بۆ پارتیا دیمۆکراتیک یا گەلان، ھەدەپێ ھێتە ھنارتن؟! یان بۆ قەرەیلان و بایک و کالکانی؟ پەرلەمانتارێن ھەدەپێ ل قەندیل و مەتین و گارەی نە یان گەریلا؟

-ئەگەر پەیاما پەکەکێ ئاشتی یە و دژی شەری یە، بۆچی بۆ وەرگرتنا ھندەک چەکی و لاوازکرنا ھەرێما کوردستانێ، نوکە ئامادە یە دگەل حەشدێ، دگەل پاسداران، دگەل ئەسەدی، گەر نەچار ببیت دگەل تورکیا ژی رێک بکەڤیت، تنێ دگەل ھەرێما کوردستانێ نەبیت؟

– ئەگەر پەیاما پەکەکێ ئاشتی یە! بۆچی ئۆجەلان دبینیت ئێکگرتنا کوردان زەحمەتە؟

بەڕێز ئاپۆ، ئەگەر پەیاما تە ژ دل بۆ ئاشتیێ یە، دشیای داخوازا ڤەکێشانا گەریلایان ژ سنۆرێن ھەرێما کوردستانێ بکەی، چونکی تو وەک سیاسیەکێ شارەزا، باش دزانی، نوکە نە پەکەکێ و نە ژی ھەرێما کوردستانێ شیان ھەنە خۆ ل بەر ھێزا سوپایێ تورکیا بگریت، گەر ھێرشێ بکەت!

ئەگەر پەیاما تە ژ دل بۆ ئاشتیێ یە، دشیای بێژییە ھەدەپێ ل شینا دیڤەلانکا پەکەکێ بیت، بزاڤێن ناڤبەینکارییا تورکیا و سەرکرداتییا پەکەکێ بکەت!

ئەگەر پەیاما تە ژ دل بۆ ئاشتیێ یە، دشیای داخواز بکەی ھەموو شەرڤانێن رۆژئاڤایێ کوردستانێ دگەل پێشمەرگەیێ رۆژ بچنە د چارچووڤەیێ ھێزەکا نەتەوەیی یان نشتیمانی یا نە حزبی دا!

دەربارەی پاقژکرنا جادەیان ژی، ئەز بێژم بەری ھوین شەری ببەنە جزیرێ و سوورا ئامەدێ، جادە گەلەک ژ نوکە پاقژتر بوون، ھەدەپە ژی گەلەک ب جەماوەرتر بوو و بۆ ئاشتیێ، دەنگێ جەماوەری ژ دەنگێ گەریلایان بلندترە!

بابه‌تێن ب ڤێ مژارێ ڤه‌ گرێدای