WAAR-دهوك:
یانەیا ئەیاکس ئەمستردام یا ھولەندی دەربازبوو قۆناغا داوییێ ژ ڤاڤارتنێن چامپیونز لیگێ، پشتی سەرکەڤتن لسەر مێڤانا خۆ یانەیا پاوک سالۆنیکا یا یونانی تۆمارکری ب سێ گۆلان بەرامبەر دوو گۆلان ژ چارچووڤێ یاریێن دویێ یێن قۆناغا سێیێ . ل خۆلەکا 23 پالوگیانێس گۆلا پێشکەڤتنێ بۆ پاوک تۆمارکر، ل خۆلەکا 31 کاپتنێ ئەیاکسێ دوسان تادێچی دەلیڤەیا گۆلا وەکھەڤییێ ژ دەستدا دەمێ پەنەلتییەک بەرزەکری، لێ بەری بداوی ھاتنا نیڤا ئێکێ ب دوو خۆلەکان ھەمان یاریکەر ڤەگەریا و ژ پەنەلتییەکا دی گۆلا راستڤەکرنا ئەنجامی ئینا، ل خۆلەکا 79 ھەڤالێ وی نیکولاس تالیاڤیگوی گۆلا دووێ و پێشکەڤتنێ تۆمارکر، ل خۆلەکا 85 دادڤانی پەنەلتییەکا دی بۆ خودانا یاریگەھێ ھژمارت و د ئەنجامدا تادێچی گۆلا سێیێ ئینا، و لدەمێ زێدەکری پالوگیانێس ڤەگەریا و گۆلا دویێ بۆ پاوک تۆمارکر لێ یاری بسەرکەڤتنا ئەیاکسێ ب 3-2 گۆلان بداوی ھات.
