ئه‌گه‌ر دایك بوو ژنباب .. باب ژى دبیته‌ زڕباب

ئه‌گه‌ر دایك بوو ژنباب .. باب ژى دبیته‌ زڕباب

وار – دهۆک :

هه‌لبه‌ت ئه‌ڤ مانشێتا بابه‌تی گۆتن و پێشینا مه‌زنانه‌ و ره‌نگه‌ رۆژانه‌ مه‌ گوهـ لێ‌ ببیت و ده‌مێ‌ دبێژیت: هه‌كه‌ر دایك بۆ زڕدایك، باب ژی دبیته‌ زڕباب، لێ‌ قه‌ده‌را ژیانێ‌ یا وه‌هایه‌ كو ل هه‌ڤژیناتیا د نێڤبه‌را زه‌لام و ژنێ‌ دا ئێك به‌رى ئێكێ‌ مالئاڤاهیێ‌ دكه‌ت و ژبلی كو هنده‌ك جاران ب روویدان و كاره‌ساتان هه‌ردو ب هه‌ڤ ڕا دچنه‌ به‌ر دلوڤانییا خودێ‌ مه‌زن یان بێ‌ سه‌روشوون دبن. ل ده‌ما‌ كو ژن به‌رى زه‌لامی مالئاڤاهیێ‌ بكه‌ت و نه‌مازه‌ خودان زاڕۆ بن، دێ‌ بینین كو زه‌لام نه‌چار دبیت بۆ خوه‌ هه‌ر زوو ل هه‌ڤژینه‌كا دی بگه‌ریت و ئێكا دی بینیت تاكو شیرازێ‌ مالا وی تێك نه‌چیت و سه‌رپه‌رشتییا مال و زاڕۆیێن وی بكه‌ت، ژبه‌ركو ئه‌و شیان و سه‌رپه‌رشتی و ب خودانكرنا زاڕۆیان پتر د شیانا ژنێ‌ دایه‌ و دكاریت سه‌ره‌ده‌ریێ‌ ب رێڤه‌برنا مالێ‌ بكه‌ت و گه‌له‌ك جاران ئه‌ڤ ژن ئینانا دووێ‌ دبیته‌ سه‌ده‌ما گله‌ و گازنده‌یێن خه‌لكه‌كێ‌ ده‌وروبه‌ر و نه‌مازه‌ كه‌سوكارێن خێزانا ئێكێ،‌ پێدڤى بوو رێز ل ژنا چۆیی گرتبا و زوو ب زوو ‌ڤی زه‌لامی ژن نه‌ئینابا، ژبه‌ركو هه‌ر هیچ نه‌بیت ب ساڵان دگه‌ل ژیایه‌ یان بێهنا خوه‌ درێژكربا تاكو زاڕۆیێن وی مه‌زن ببن، ژبه‌ركو مه‌زنان گۆتییه‌ هه‌كه‌ر دایك بۆ زڕدایك، باب ژی دبیته‌ زڕباب و دێ‌ نه‌خوه‌شییان بۆ زاڕۆیێن ژنا به‌رێ‌ دروستكه‌ت و زه‌لام ژی دێ‌ خوه‌ لێ‌ بێده‌نگ كه‌ت، هه‌ر چه‌نده‌ هه‌كه‌ر ئه‌ڤ جۆره‌ سه‌ره‌ده‌رییه‌ ژی هه‌بن، مرۆڤ دكاریت بێژیت كو ب رێژه‌یه‌كا هه‌ره‌ كێم‌ د ناڤ جڤاكی دا هه‌نه‌، بێگومان هنده‌ك جاران ژن ژی ل ده‌ما كو هه‌ڤژینێ‌ وێ‌ دچیته‌ لبه‌ر دلوڤانییا خودێ‌ مه‌زن، ئه‌و ژی دوباره‌ بۆ خوه‌ شوو دكه‌ته‌ڤه‌ و نه‌مازه‌ هه‌كه‌ر ئه‌و ژنه‌ د ژییه‌كێ‌ بچووك دا بیت و مافه‌كێ‌ وێ‌ یێ‌ ره‌وایه‌ ژی، لێ‌ ل نك زه‌لامی ژیێ‌ بچووك و مه‌زن گرنگ نینه. ب هه‌ر حال ئه‌رێ‌ راسته‌ ل ده‌مێ‌ دایك دبیته‌ زڕدایك باب ژی دبیته‌ زڕباب؟ باشه‌ بۆچی ئه‌و دبیته‌ زڕباب؟ ئه‌رێ‌ ئه‌و چ سه‌ده‌من كو باب سه‌ره‌ده‌رییا به‌رێ‌ دگه‌ل زاڕۆیێن خوه‌ بگوهۆڕیت؟ هه‌كه‌ر ئه‌م هنده‌كێ بزڤرینه‌ڤه‌ بۆ سه‌ر ڤێ‌ پرسێ،‌ دێ‌ بۆ مه‌ دیار بیت كو هیچ ده‌مه‌كێ‌ باب نابیته‌ زڕباب و هه‌ر بابێ‌ ئه‌سلییه‌ و هه‌مان مۆرال هه‌یه‌، لێ ره‌نگه‌ ئه‌و سه‌ره‌ده‌ریێن به‌رێ‌ كو دگه‌ل خێزانا به‌رێ‌ و زاڕۆیان دكر بهێنه‌ گوهۆڕین، ئه‌ڤه ‌ژی دزڤریته‌ڤه‌ بۆ وێ‌ ئێكێ‌ كو هه‌ر ده‌ما‌ ژیێ‌ مرۆڤی مه‌زن بوو، پتر سه‌ره‌ده‌ریا وی نه‌رمتر لێ‌ دهێت و گه‌له‌ك سه‌ربۆر ژی دیتینه‌. دیسان پێدڤییه‌ ئه‌ڤ زه‌لامه‌ بگونجیت دگه‌ل ژنا نوو، ژبه‌ركو د ناڤ خێزانه‌ك و سروشته‌كێ‌ دی دا هاتییه‌ و تا بكاریت دگه‌ل بارودۆخێ‌ مال و ژیانا خوه‌ بگونجیت، هه‌روه‌سا ره‌نگه‌ ئه‌ڤ زاڕۆیه‌ هه‌ولبده‌ن هه‌مان سه‌ره‌ده‌رییا كو دگه‌ل دایكا خوه‌ ئا ئه‌سلی كری، هه‌مان سه‌ره‌ده‌رى دگه‌ل زڕدایكێ‌ بكه‌ن و زڕدایك ژی لێ‌ قه‌بیل ناكه‌ت، ژبه‌ركو ئه‌و ڤیانا دایكا به‌رێ‌ هه‌یی ئه‌وا نوو نابیت، ئه‌ڤه‌ راستیه‌كه‌ و دڤێت دانپێدان پێ بهێته‌كرن و د ناڤ جڤاكێ‌ مه‌ دا هه‌رده‌م ئه‌ڤ ژنه‌ ب چاڤه‌كێ‌ دی به‌رێ‌ خوه‌ دده‌ته‌ ڤان زاڕۆیان یان دبێژنێ‌ نه‌ڤسی، فه‌ره‌ ئاماژه‌یێ‌ پێ‌ بده‌ین كو پێدڤییه‌ هه‌كه‌ر ژنێ‌ ب دل زه‌لامێ‌ خوه‌ ڤیا، فه‌ره‌ زاڕۆیێن وی ژی بڤێن، ڤێجا بلا یێن چه‌ندین ژنێن به‌رێ‌ وێ‌ بن، ژبه‌ركو ئه‌ڤ زاڕۆیه‌ د باب دا دێ‌ بنه‌ خووشك و برایێن زاڕۆیێن ژنا نوو، ئاها د ڤێ‌ ناڤبه‌رێ‌ دا ئالۆزی دكه‌ڤنه‌ د ناڤبه‌را زاڕۆ و خێزانا نوو و باب دمینته‌ حه‌یری كو ژ ئالییه‌كێڤه‌ زاڕۆ جه‌گه‌را وینه‌ و ژ ئالیێ‌ دووێ‌ خێزانا وى‌ یا نوویه‌ و دڤێت دگه‌ل بگونجیت، ئاها ل ڤێرێ‌ دێ‌ هه‌ولده‌ت پتر نه‌رماتیێ‌ دگه‌ل خێزانا نوو بكار بینیت و هه‌رده‌مێ‌ ئه‌ڤ نه‌رماتییه‌ هاته‌ بكارئینان، دێ‌ بینین خه‌لك ب ره‌نگه‌كێ‌ دی هزر د سه‌ره‌ده‌ریكرنا وی دا دكه‌ن و دێ‌ بێژنێ‌ ئه‌ڤه‌ ژی بۆ زڕباب، ژبه‌ركو دایك زڕدایكه‌، خوه‌ هه‌كه‌ر ئه‌م ب دروستی بچینه‌ د ناڤ ڤی بابه‌تی دا، ئه‌و زاڕۆیێن ژ دایكا نوو دا په‌یداببن، دبنه‌ خووشك و برایێن زاڕۆیێن ژنا به‌رێ، ژبه‌ركو ژ ئێك باب په‌یدادبن، له‌و فه‌ره‌ هه‌ردو لا گه‌له‌ك دهوشیار بن لسه‌ر سه‌ره‌ده‌ریكرنا هه‌ڤ د ناڤ خێزانی دا و ب ئێك چاڤ به‌رێ‌ خوه‌ بده‌نه‌ زاڕۆیێن خوه‌ و تاكو ئه‌ڤ رسته‌ لسه‌ر نه‌هێته‌ گۆتن و ب ئارامی و ته‌ناهی ژی پێكڤه‌ بژین و بكارن خێزانه‌كا‌ ساخله‌م ئاڤا بكه‌ن و ئه‌ڤ زاڕۆیێن پاش دایك مایی ب ره‌نگه‌كێ‌ راست و دروست و ساخله‌م بهێنه‌ په‌روه‌رده‌كرن و ژبلی ئه‌ركێ‌ وێ‌ دایكا نوو یه‌ كو ب ره‌نگه‌كێ‌ رێكوپێك سه‌رپه‌رشتییا وان زاڕۆیان بكه‌ت، لێ‌ د هه‌مان ده‌م دا خێره‌كا مه‌زنه‌ ژی، ژبه‌ركو هنده‌ك زاڕۆیێن سێوی ب خودان دكه‌ت.

بابه‌تێن ب ڤێ مژارێ ڤه‌ گرێدای