ئه‌ڤساله‌ 85 هزار كارمه‌ندێن كه‌رتێ تایبه‌ت ژ كارى هاتینه‌ ده‌رئێخستن

ئه‌ڤساله‌ 85 هزار كارمه‌ندێن كه‌رتێ تایبه‌ت ژ كارى هاتینه‌ ده‌رئێخستن

Capture

وار – كوردۆ رۆژهات :

ژبه‌ر دروستبوونا‌ قه‌یرانا‌ دارایى ل هه‌رێما كوردستانێ، ژ ده‌ستپێكا ئه‌ڤ ساله‌ هه‌تا نوكه‌، ‌كۆمپانیا و كارگه‌هێن كه‌رتێ‌ تایبه‌ت 85 هزار كارمه‌ندێن خوه‌ ره‌وانه‌ی‌ مال كرینه‌، ئانكو ژ كارى ده‌رئێخستینه‌، و پێشبینى ژى دهێته‌كرن كو هه‌تا دووماهییا ئه‌ڤ ساله‌ ئه‌ڤ رێژه‌یه‌ بگه‌هیته‌ 120 هزار كارمه‌ندان.
یاسین مه‌حموود ره‌شید، ئاخڤتنكه‌رێ ئێكه‌تییا‌ وه‌به‌رهێنه‌رێن‌ كوردستانێ بۆ مالپه‌رێ خه‌ندان راگه‌هاند، ”دروستبوونا‌ قه‌یرانا‌ دارایی‌ كاریگه‌رییا‌ خراب‌ لسه‌ر كۆمپانیا و كارگه‌هێن‌ كه‌رتێ‌ تایبه‌ت ل هه‌رێما‌ كوردستانێ دروستكرییه‌، ب ئاوایه‌كى كو ژ ده‌ستپێكا ئه‌ڤ ساله‌ هه‌تا نوكه‌ ب نه‌چارى 85 هزار كارمه‌ندێن خوه‌ ره‌وانه‌ی‌ مال‌ كرینه‌”.
ناڤهاتى ئه‌و ئێك ژى ڤه‌نه‌شارت كو وى ترس ژ ڤێ ره‌وشێ هه‌یه‌، كو وه‌ها گۆت: ”من ترس هه‌یه‌ ژ ئه‌گه‌رێ‌ به‌رده‌وامبوونا‌ ڤێ قه‌یرانێ كو هه‌كه‌ر هه‌تا دووماهییا ئه‌ڤ ساله‌ به‌رده‌وام بیت، دێ رێژه‌یا كارمه‌ندێن كه‌رتێ تایبه‌ت یێن ژ كارێ وان دهێنه‌ ده‌رئێخستن، گه‌هیته‌ 120 هزار كارمه‌ندان”‌.
دروستبوونا‌ قه‌یرانا‌ دارایی‌ ل ‌هه‌رێما‌ كوردستانێ ژ مه‌ها ئادارا ئه‌ڤ ساله‌ ڤه‌ ده‌ستپێكرییه‌، ئه‌ڤه‌ ژى ژبه‌ر راوه‌ستاندنا بودجه‌یا‌ هه‌رێما‌ كوردستانێ ژ بال نووری‌ مالكی‌ سه‌رۆك وه‌زیرێن‌ كاربڕێكه‌رێ‌ ئیراقێ ڤه‌، كو ئه‌و ژى ب تنێ مه‌هانه‌ مووچه‌یێ فه‌رمانبه‌رێن‌ حوكمه‌تێ ژ ڤێ بودجه‌یێ850 ملیار دینار بوون، له‌و ژى حوكمه‌تا‌ هه‌رێمێ ژ وى ده‌مى هه‌تا نوكه‌ ب داهاتێ‌ نه‌فت‌ و ناڤخوه‌، مووچه‌یێ‌ فه‌رمانبه‌ران دابین دكه‌ت كو ژبه‌ر ڤێ قه‌یرانێ مووچه‌ ژى ل ده‌مێ خوه‌ یێ دیاركرى ناهێنه‌دان و گیرۆدبن و هه‌موو پڕۆژه‌یێن‌ كه‌رتێ تایبه‌ت ژى راوه‌ستیاینه‌.
ئه‌ڤ ئێكه‌ د ده‌مه‌كى دایه‌ كو هێشتا خه‌لكێ كوردستانێ ب دروستى باوه‌رى ب كه‌رتێ تایبه‌ت نه‌ئینایه‌ كو دێ شێن ب گره‌نتى د ڤى كه‌رتى دا كاركه‌ن و هه‌تا نوكه‌ ژى ده‌سته‌به‌ركرنا جڤاكى ب دروستى نه‌هاتییه‌ بجهئینان كو خودان كار پێگیریێ پێ بكه‌ن و لدووڤ قانوونا كارى مافێن كارمه‌ند و كرێكاران بپارێزیت و د رۆژه‌كا هۆسا ژى دا مافێن كارمه‌ندێن كه‌رتێ تایه‌بت د پاراستى بن كو ب ئێك بڕیار ژ كارێ وى نه‌هێته‌ دوورئێخستن، ئه‌ڤجا ژبه‌ر ڤێ ئێكێ ژى هه‌تا نوكه‌ ل هه‌رێما كوردستانێ، چ دوما خودانێن كۆمپانیا و كارگه‌هێن كه‌رتێ تایبه‌ت بخوازن، دشێن كارمه‌ندێن خوه‌ لسه‌ر كارى ده‌ربێخن و وان كارمه‌ندان‌ ژى چو ژێ ناهێت، ژ بلى كو رێیا مال بگرن و جاره‌كا دى بۆ خوه‌ ل كارى بگه‌ڕن، له‌و ژى ده‌رئێسختنا ڤان 85 هزار كارمه‌ندێن كه‌رتێ تایبه‌ت تشته‌كێ حێبه‌تى نینه‌.

بابه‌تێن ب ڤێ مژارێ ڤه‌ گرێدای