ئه‌و فاكته‌رێن هه‌ڤژینێ ته‌ پێ بێزار دبیت

ئه‌و فاكته‌رێن هه‌ڤژینێ ته‌ پێ بێزار دبیت

Capture

وار – هه‌ڤال جانگیر :

كۆمه‌كا كارڤه‌دانان هه‌نه‌ كو زه‌لامان پێ خوه‌ش‌ نینه‌ د هه‌ڤژینێن وان دا هه‌بن، ژبه‌ركو ژ ئه‌نجامێ هنده‌ك ره‌فتار و كریاران، كارڤه‌دانێن نه‌رێنى په‌یدادبن كو زه‌لام پێ بێزار و تووڕه‌ دبن. د ڤێره‌ دا دێ ئاماژه‌یێ ب وان كارڤه‌دانان كه‌ین كو لده‌ف ژنان ڤه‌ په‌یدادبن و دبنه‌ سه‌ده‌ما بێزاربوونا زه‌لامێن وان:
1ــ شكاندنا زه‌لامى لبه‌ر چاڤێن كه‌سێن دى: هه‌ر چه‌نده‌ زه‌لامێ ته‌ ژ ته‌ قه‌بوول دكه‌ت كو پێشنیاران بده‌یه‌ وى یان ژى تڕانه‌یان پێ بكه‌ى، لێ لبه‌ر چاڤێن كه‌سێن دى، قه‌بوول ناكه‌ت، له‌و دڤێت بزانى كو لبه‌ر چاڤێ چو كه‌سان، بزاڤا وێ ئێكێ نه‌ده‌ى كو پێشنیاران ئاراسته‌ى هه‌ڤژینێ خوه‌ بكه‌ى یان ژى تڕانه‌یان پێ بكه‌ى، داكو هه‌ست ب شكه‌ستنا خوه‌ ژ بال ته‌ ڤه‌ ل پێش چاڤێن كه‌سێن دى نه‌كه‌ت و ژ وێ ئێكێ بێزاربیت.
2ـ ئاشكرا كرنا نهێنییان: ره‌نگه‌ باسێ گه‌له‌ك تشتێن گرێداى ب ره‌فتار و كریارێن زه‌لامێ خوه‌ ڤه‌ لده‌ف هه‌ڤالێن خوه‌ بكه‌ى، لێ نابیت نهێنیێن وى ئاشكرا بكه‌ى، ژبه‌ركو دبیت وێ ئێكێ ترس و خه‌ته‌ر بۆ ژیانا هه‌ڤژینییا هه‌وه‌ هه‌بیت و دبیته‌ سه‌ده‌ما وێ ئێكێ كو ژیانا هه‌وه‌ پڕى نه‌خوه‌شى و دلمانێ بیت و ل دووماهیێ ژى خێزانا هه‌وه‌ به‌ره‌ڤ هه‌ڕفینێ ڤه‌ بچیت.
3ـ چاڤدێریكرنا زاڕۆیان: گه‌له‌ك جاران هه‌ڤژین لسه‌ر په‌روه‌رده‌كرنا زاڕۆیێن خوه‌ تووشى ناكۆكییان دبن، لێ رێیێ ل هه‌ڤژینێ خوه‌ نه‌گره‌ و بلا ئه‌و ب خوه‌ رێیا په‌روه‌رده‌كرنا زاڕۆیێن هه‌وه‌ ب پشكدارییا ته‌ هه‌لبژێریت.
4ــ بجههێلانا وى ب تنێ: چوونا ده‌رڤه‌ بۆ ده‌مه‌كێ درێژ دگه‌ل هه‌ڤالێن خوه‌ و ب‌ تنێ ب جههێلانا وى د مال دا، ئه‌ڤ ئێكه‌ دێ هه‌ڤژینێ ته‌ بێزار كه‌ت، ئه‌ڤجا ژبه‌ر ڤێ ئێكێ نه‌هێله‌ ته‌نهایى هه‌ڤژینێ ته‌ بێزار بكه‌ت.
5ــ هه‌ڤبه‌ركرن: ڤه‌به‌ركرنا هه‌ڤژینێ ته‌ دگه‌ل كه‌سێن دى، دێ وى تووشى تووڕه‌یی و بێزاریێ كه‌ت و نابیت چو جاران هه‌ڤژینێ خوه‌ ب كه‌سێن دى هه‌ڤبه‌ر بكه‌ى و ئه‌و ژى ب هه‌مان ئاوا.

بابه‌تێن ب ڤێ مژارێ ڤه‌ گرێدای