ئه‌و سه‌رۆك هه‌رێمێ دشێت بێلایه‌نى سه‌رۆكاتیێ بكه‌ت

رێڤینگ هرۆری  :

پرۆژه‌یێ دەستووری، شێوه‌یێ حوكومرانیێ و پۆستێ سەرۆكاتیێ ل كوردستانێ، ل ڤان رۆژان تێنە گەنگەشەكرن، شێوەیێ هەلبژارتنا سەرۆكێ كوردستانێ ل پەرلەمانی بیت یان لناڤ خەلكی بێته‌ هەلبژارتن. وه‌ختێ ئەم تەماشەی سیستەمێن حوكومرانیێ بكەن ل زۆر وەلاتێن دونیایێ، چی پەرلەمانی و سەرۆكاتی و كۆماری یان پاشاتی بن، ب دیتنا من؛ ئەڤە هەمی لسەرئاستێ پێگەهەشتنا كۆمەلگایێ هەر وەلاتەكی دمینیت كا تا چی راددە دەستوورێن وەلاتێن خوە پەیرەو دكەن و شیابن دەزگایێن خوە یێن دەستهەلاتداریێ بۆ بەرژەوەندییا وەلات و وەلاتییان هەلبژێرن، ئەوێن دبنە دەستهەلاتدار وەك وەلاتی خوە بهەژمێرن. ئەم بەحسا كوردستانێ بكەین كو ئەم ژی بەشەكن ژ كۆمەلگایێ رۆژهەلاتی و ب خوە ژی مرۆڤێ كۆمەلگایێ رۆژهەلاتی، تا نوكە نەشیاینە خوە ژ قەیدێن پێڤەگرێدانێ (تبعیه‌) رزگار بكەت، ڤێجا ئەڤ پێڤەگرێدانە چی یا تاكەكەس و گرۆپان بیت بۆ دەستهەلاتداران لسەر بنیاتێ بەرژەوەندیێن خوە یێن تایبەت یانژی یا دەستهەلاتداران بیت بۆ هندەك وەلاتێن دی، ئەڤ راستییەكە ئاستێ سەربخوەییا هزركرنا جڤاكێ سەردەمی دناڤا مەدا یا لاوازە، ئەڤەژی وەلمە دكەت كو هەرچی شێوه‌یێ دەستهەلاتداریێ مە هەبیت، دێ لسەر بنیاتێ لهەڤهاتنەكا سیاسی و بەرژەوەندیێن كەس و لایەنان بیت، هەر وەكی ل كوردستان و ئیراقێ ئەڤچەند سالن ئەم دبینین سیستەمێ پەرلەمانی و سەرۆكاتی و هەلبژارتن، لێ هەرتشت وەك شانویەكێیە و چو به‌هایەك بۆ دەنگێن خەلكى نینە، ژبلی سیستەم لسەر بنیاتێ لهەڤهاتنێن (توافقی) یێن سیاسی و حزبی و تاییفەگەری و بەلكی ناوچەگەری ژی، ژبلی بەرژەوەندیێن كەسوكی تێ رێككەڤتن، دەستهەلاتدار ژی خوەسەپێنەر، ئەم كورد ژی تاكو نهۆ نەشیاینە خوە ژ ڤان قەیدان رزگار بكەین.
ل ڤی دەمی، سیستەمێ سەرۆكاتیێ بۆ مە كوردان فەرە، یانی دڤێ مە لێڤگەرەك نەتەوەیی هەبیت، ژبەر كو ئەم هێژ د شەڕ و شۆڕشانداینە و وەلاتێ مە پەرچە و داگیركرییە و ترسێن مەزن لسەر مە هەنە، پێگەهشتنا مە یا هزری و سیاسی ژى، هێژی لسەر بنیاتەكێ دروست ئاڤا نەبوویە، بەلكی زێدەتر یا حزبی و ناوچەگەری و لایەنگرییەكا دووڤەلانكییە، لەو ژی دڤێت مە كەسەك هەبیت ل دەمێ قەیران و ناكۆكییان بشێت ترازییا هێزێ راگریت، ئەڤەژی ل ڤێ قوناغێ د كەساتییا سەرۆك بارزانی دا دیاردبیت، ژبەر:
• مەسعوود بارزانی، د ژیوارەكیدا پەروەردە و ژیایە، بوویە بەشه‌ك ژ ژیانا هەر كوردەكی، یان ئازارێن هەر كوردستانییەكی بەشەكن ژ ژیانا وی، مەبەستا من، زارۆكەكێ نەفیكری بوویە، قوتابییەكێ هزر نەتەوەیی بوویە، گەنجەكێ شۆرشگێر بوویە، وەلاتییەكێ بێ ماف و دەربدەر بوویە، سەركردەیه‌كێ پێشمەرگە بوویە، نڤێسكارەكێ راستگو بوویە، كەساتییەكێ چاڤنەترس بوویە و… هتد. گومان ژی تێدا نینە یێ بەرنیاسە لناڤ جیهانا ئەڤرۆ، ب راستگویی و دلۆڤانی و حسابەك بۆ تێته‌كرن، لەو ئەو دشێت د هەر كەسی بگەهیت د ڤی وەلاتیدە.
• ئەز ب خوە زۆر جاران دگەل ڤی كەسایەتی روونشتیمە و شاهدێ هندەك گوتنێن وی مە، بالا من كێشایە چی لناڤ شۆرشێ ل سالێن هەشتیان یان ل ڤێ دوماهیێ، پشتی 2003ێ ل بەغدایێ، دو میناكان بەرچاڤ دكەم، ئێك؛ جارەكێ بۆ مە بەحسا (مجلس الحكم) كر یاكو ژ لایێ حاكمێ ئەمریكی پۆل برێمه‌ر ڤە هاتییه‌ دانین، پشتی رۆخانا سه‌دامی، گۆت: برێمه‌ر دگەل مە كۆمبوو، بەحسا دانانا (مجلس الحكم) كر و دێ هێتە دانان وەك دەستهەلاتەك سەمبۆلی یان وەكی وی دگۆت كارتوونی و بێ دەستهەلات، كەك مەسعود گۆت: هەمی حازربوون و كەسێ دەنگنەكر، گۆت من گۆتێ برێمه‌ر ئەز مەسعود بارزانی مە، چوجاران د ژیانا خوەدا ئەم فێرنەبووینە د دەستهەلاتەك كارتوونیدا جهێ خوە بگرین، ئەڤە ئەز چۆمە هەولێرێ، ئەگەر تە ڤیا من ببینی، جهێ من ل وێرێیە، و براستی ژی وەكر. دو؛ جارەكە دی، ل دەمێ هەلبژارتنان دگەل مە كادرێن پارتیێ كۆمبوو كو ل وی دەمی هندەك لایەنان ل بەری رۆژێن دەنگدانێ پارە و دیاری بۆ خەلكی دبرن، داكو دەنگێن وان بۆ خوه‌ بكێشن، دیسا كەك مەسعود گۆتە مە: دا بۆ هه‌وە بێژم، هندە سالن وە هندە وەخت هەبوو، هوین سەردانا خەلكی بكەن و هاریكارییا وان بكەن، ئەز پێ بزانم هوین ژ نوو ڤە بچنە مالێن خەلكی و دیارییا بۆ ببەن، دێ هه‌وە سزادەم، گۆت: بلا پارتی بدۆرینیت، من نەڤێت كەساتییا مرۆڤێ كورد بشكێنن و فێری چاڤشكاندنێ ببیت، بۆ من ئەڤ گۆتنە زۆرا مەزن بوو.
• ئەگەر ئەوژی نەشیابیت خوە ژ هەمی قەیدێن جڤاكی خلاس كربیت، لێ پشتراستم ئەو ژ هەر كەسەكێ دی زێدەتر كەساتییەك كوردستانی و نەتەوەییە و گونجایە بۆ ڤێ قوناغێ.
• هەلبژارتنا پۆستێ سەرۆكاتیێ لناڤ خەلكی، گەلەك د جهێ خوەدایە، ژبەر كو پەرلەمانتەر نوونەرێن حزبانە، حزب ژی ب پێكهاتن رەفتاران دكەن، پرۆژەیێن وان یێن حزبایەتی زێدەترن ژ یێن نیشتمانی، ئەگەر لناڤ خەلكی بیت، بەلكی زۆر كەسان ژبەر هندەك ئەگەران دەنگدا بیت پەرلەمانتارێ حزبەكێ، لێ یا سەرۆكاتیێ دێ جیاواز بیت و باوەر دكەم سەرۆك بارزانی دناڤ خەلكێ كوردستانێدا ژ هەر كەسی زێدەتر دێ شانسێ خوە هەبیت.
• دیسان ژی، پێداگیری لسەر ڤێ خالێ نە ب تەنێ گرێدایی پارتییە، بەلكەى ل خولەكا دى یا هەلبژارتنان كەسەكێ دی ببیت سەرۆكێ كوردستانێ، هەر وەك بووینە سەرۆك حوكمەت و پەرلەمان، مرۆڤ هیڤی دخوازیت ل ڤی وەلاتی رۆژەك بێت ل ده‌رڤەی بازنه‌یێ حزباتیێ كەسێن نیشتیمانپەروەر بشێن رێبەرییا مە بكەن.
• ئەز ب خوە وەك وەلاتی و پێشمەرگەیەك، نوكە ب بەرژەوەند دبینم كو شێوازەكێ یاسایی هەبیت دیسان سەرۆك بارزانی ل ڤێ قوناغا بێت ژی بۆ ڤی پۆستی بێت هەلبژارتن، باوەر دكەم ب تنێ ئەوە یێ كورداتیێ بێ حزباتی دكەت و یارییان ب سیاسەتێ ناكەت.

بابه‌تێن ب ڤێ مژارێ ڤه‌ گرێدای