ئه‌رێ هێرمسى چ دایه‌ كوردان؟

فاضل عمر

وه‌ختێ من چیڤانۆكێن ئێسۆپى وه‌رگێڕاین، چیڤانۆكه‌كێ سه‌رنجا من راكێشا، هینگێ من گومان هه‌بوو ئه‌ڤ چیڤانۆكه‌ كه‌ڤن بت و یا وه‌ختێ ئێسۆپى بت، هه‌روه‌سا بێهنا نه‌ژادپه‌رێسىیێ ژێ دهات، لێ وه‌كو پێگیرى ب وه‌رگێڕانا دروست من ئه‌و ژى وه‌رگێڕا.

پشتى، ب گۆره‌ى زانین و شیانێن خوه‌، من جڤاكا كوردستانى خواندى و ره‌وشا مه‌ و سه‌ره‌ده‌رىیا مه‌ دگه‌ل خوه‌ و ده‌رڤه‌ دیتى… و جۆره‌ ته‌رزه‌ك pattern (نمط) من د گۆتن و ره‌فتارێن پترییا كوردان دا دیتین، ئه‌و چیڤانۆكه‌ هاته‌ بیرا من.

دا چیڤانۆكێ بخوینین و بپرسین.

هێرمس و ئه‌ره‌ب

هێرمسى[1] پایتۆنا خوه‌ پڕى دره‌و و خیانه‌ت  و هه‌مى جۆره‌ خاپ و فێلێن خراب كر، و وه‌غه‌ره‌كا دنیایێ كر، ژ ڤر چۆ ور و هه‌ر جهه‌كێ چۆییێ هنده‌ك ژ متایێ خوه‌ پێ به‌خشى. وه‌ختێ گه‌هشتىیه‌ ئه‌ره‌بستانێ، پایتۆنا وى خراب بوو و ل وێ درێ ئاسێ بوو. وه‌ختێ ئه‌ره‌بان پایتۆنه‌ دیتى، هزركرن پایتۆنا بازرگانه‌كێ زه‌نگینه‌ و دێ بارێ وى زێڕ و زه‌به‌ر بن، ئه‌وان پایتۆنه‌ تالان كر و نه‌هێلان هێرمس وه‌غه‌را خوه‌ ل دنیایێ ته‌مام بكه‌ت، و هه‌ر گه‌له‌كى به‌هرا وى ژ متایێ خوه‌ بده‌تێ[2].

پرسیار ئه‌وه‌؛

  1. ئه‌رێ هێرمس نه‌گه‌هشتىیه‌ كوردستانێ؟ چونكى ئه‌م هند ساده‌ و ساویلكه‌ و دلپاك و سروشتى و خوه‌شباوه‌ر و خوه‌ڕستینه‌، دێ بێژى ئه‌م په‌ڕه‌كێ سپینه‌.
  2. یان گه‌هشتىیه‌ ناڤ مه‌ و ئه‌و متایێ پێشكێشى كوردان كرى؛ خوه‌نه‌ڤیان و خوه‌كێمدیتن و بنده‌ستى، و بێده‌وله‌تى ب تێگه‌هێ كورده‌وارىیێ و بێتفاقى، و هه‌مڕه‌شى…داینه‌ مه‌؟

به‌رسڤ بۆ هه‌وه‌

 

[1] هێرمس Hermes كوڕێ مه‌زنه‌خودایێ گریكان، زێوۆسىیه‌  Zeus. ئه‌و شانده‌ك و په‌یكێ بابێ خوه‌ بوو بۆ ناڤ مرۆڤان و بۆ ناڤ ئاهۆرایێن دى. هه‌روه‌سا فێلباز و سینۆرپارێزبوو. سه‌میانێ شڤان و دز و گۆڕ و بالیۆزان بوو. هه‌روه‌سا وه‌كو گه‌ڕیده‌یێ ناڤبه‌را ئه‌رد و ئاسمانان هاتىیه‌ ناسین و چاڤدێرێ رێك و رێڤینگان.

[2] http://mythfolklore.net/aesopica/oxford/521.htm

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.