ئه‌رێ فه‌ره‌ زاڕۆیێ خۆ نه‌چاركه‌ین داخوازا لێبۆرینى بكه‌ت؟

ئه‌رێ فه‌ره‌ زاڕۆیێ خۆ نه‌چاركه‌ین داخوازا لێبۆرینى بكه‌ت؟

وار – دهۆک :

ئه‌گه‌ر زاڕۆیێ هه‌وه‌ دگه‌ل برایێ خۆ ب شه‌ڕ چوو، یاریێن هه‌ڤالێ خۆ راكرینه‌ یان ب ناڤه‌كێ خراب گازى هه‌وه‌ كریه‌، ئایا دڤێت وى نه‌چار بكه‌ن كو داخوازا لێبۆرینێ بكه‌ت؟
پڕانییا دایكوبابان بزاڤێ دكه‌ن زاڕۆیێن خۆ فێرى داخوازكرنا لێبۆریێ بكه‌ن. چونكه‌ هزر دكه‌ن كو ئه‌ڤه‌ باشترین رێ بۆ چاره‌سه‌ركرنا كارێ شاشه‌ یێ كو ئه‌نجامدده‌ن. نه‌چاركرنا زاڕۆى كو ڤیان ب داخوازكرنا لێبۆرینێ نینه‌، چو پێنه‌ڤێت كو هزره‌كا باش نینه‌.
ئارمانج ژ داخوازكرنا لێبۆرینێ
ئه‌گه‌رێ داخوازكرنا لێبۆرینێ، نیشاندانا هه‌ستێ پرۆشمانیا ژ كریاره‌كێ یه‌ كو ب رێیا وێ ب كه‌سه‌كێ كو زیان ڤێكه‌ڤتى یان هه‌وه‌ ئه‌و توره‌كریه‌، یه‌.
ب ڤێ چه‌ندێ ئه‌گه‌ر زاڕۆیێ هه‌وه‌ كو ژ كریارا خۆ هه‌ست ب پوشمانیێ ناكه‌ت، نه‌چار ب داخوازكرنا لێبۆرینێ نه‌كه‌ن، د رێیا په‌روه‌رده‌كرنا خۆ هه‌وه‌ سه‌رنه‌كه‌ڤتیانه‌ كار كریه‌.
گۆتنا ببۆره‌ و داخوازكرنا لێبۆرینێ د زاڕۆیێ كو هه‌ستا پوشمانیێ نینه‌، گوهۆڕینێ دروست ناكه‌ت. هه‌ر وه‌سا چو هاریكارییا چاره‌سه‌ركرنا وێ ژى ناكه‌ت.
خووشك یان برا یان هه‌ڤالێ كو داخوازا لێبۆرینێ ژێ هاتییه‌ كرن ژى ل پشت ئاخڤتنێن زاڕۆیێ كو نه‌چار ب داخوازكرنا لێبۆرینێ هاتییه‌كرن، هه‌ستا پوشمانییا وى نابینیت.
نه‌چاركرنا زاڕۆیان ب داخوازكرنا لێبۆرینێ ئه‌نجامێن به‌رۆڤاژى هه‌نه‌
ئه‌گه‌ر ده‌مێ داخوازكرنا لێبۆرینا زاڕۆیه‌كى پشتى كریاره‌كا شاش ل وى ببۆرن و ژ شاشییا وى ببۆرن، هه‌وه‌ په‌یامه‌كا شاش بۆ ڤه‌گۆهاستیه‌. ئه‌ڤ كاره‌ دێ وان فێركه‌ت كو پشتى ئه‌نجامدانا هه‌ر كاره‌كێ شاش ب گۆتنا “ببۆره‌”، هه‌تا ئه‌گه‌ر ژ نیڤا دلى ژى ئه‌ڤ گۆتنه‌ نه‌گۆتبیت، ب ساده‌یى دشێن ره‌فتارا خۆ چاره‌ بكه‌ن. ئه‌ڤ كاره‌ ب شاشى ڤه‌ زاڕۆیى فێردكه‌ت كو ب لێبۆرینه‌كێ دشێت بۆ ره‌فتارا خۆ بهانه‌یه‌كێ ببینیت و وێ بده‌ته‌ قه‌بوولكرن.
دبیت زاڕۆیێن كو نه‌چار ب داخوازكرنا لێبۆرینێ دبن، بتنێ بۆ دووربوون ژ پێشهاتێن لدووڤدا ڤى كارى بكه‌ن. گه‌له‌ك یا گرنگه‌ كو زاڕۆ هایدار ببن كو ره‌فتارێن وان كه‌سێن دى ئازار دده‌ن. هه‌تا ده‌مێ كو داخوازا لێبۆرینێ دكه‌ن. گۆتنا ببۆره‌ ب برایى یان خووشكێ ب ئه‌گه‌رێ شكاندنا یارییا وى، هاریكارییا دروستبوونا وێ یاریێ ناكه‌ت. یان داخوازكرنا لێبۆریێ ژ هه‌ڤالێ وى بۆ ڤێ چه‌ندێ كو ئه‌و ب نه‌زان گازیكریه‌، ب گۆتنا داخوازه‌كا لێبۆرینێ دروست نابیت.
هنده‌ك جاران دایك و باب تا ده‌مێ كو زاڕۆیى داخوازا لێبۆرینێ نه‌كریه‌، هنده‌ك ئیمتیازاتان ژێ وه‌ردكرن و رێ ناده‌نه‌ زاڕۆیێ خۆ كو بۆ یاریا خۆ ڤه‌گه‌ریت. لێ ئه‌ڤ كارێ هه‌وه‌ زاڕۆیى فێردكه‌ت كو داخوازاكرنا لێبۆرینێ ل شوونا چاره‌كرنێ بۆ كه‌سێ توره‌بوویى، بتنێ بۆ ره‌ڤین ژ ئاریشه‌یێ یه‌.
ل چو ژى دڤێت زاڕۆیان فێرى داخوازكرنا لێبۆرینێ بكه‌ن؟
هه‌ر مرۆڤه‌ك دڤێت ژ قۆناغێن جودایێن وه‌رارێ ببۆریت تا مه‌زن دبیت. ئه‌ڤ قۆناغێن وه‌رارێ ژ وه‌رارا جه‌سته‌سى، ره‌گه‌زى، ده‌روونى و جڤاكى پێكدهێن. ئه‌گه‌ر قۆناغێن شیرخواریێ دنینه‌ لایه‌كى، زاڕۆ ژ سێ سالیێ تا هه‌فت سالیێ و پێدا، ژ هه‌فت سالیێ تا یاودى سالیێ د قۆناغا زاڕۆتیێ دا دژیت. ژ سێ تا هه‌فت سالیێ واته‌ سالێن به‌رى قوتابخانێ، زاڕۆى هزرێن هه‌ستكرنێ هه‌نه‌، هزرێن كوور نینن و د كارێن خۆدا یێ بێ لۆژیكه‌.
زێده‌بارى ڤێ چه‌ندێ، خۆ ب مه‌لبه‌ندێ زانینێ دزانیت و هزر دكه‌ت كو هه‌موو دڤێت مل كه‌جێ وى بن و هه‌موو تشتان یێن خۆ دزانیت. خالا گرنگتر ئه‌ڤه‌ كو زاڕۆ، باش و خرابان ب شێوه‌یێ كورتكرى لبه‌رچاڤ وه‌ردگریت و كارێن كو ئه‌نجامدده‌ت، شاش نادانیتوو لێ ژ ژیێ شه‌ش سالیێ، دگه‌ل بۆرینا ده‌مى دێ باش و خرابیێ زانیت و لۆژیك، كێم كێمه‌ د هزر و ره‌فتارێن وى دا دروست بیت. د سالێن زاڕۆتیێ دا، زاڕۆ هه‌موو تشتان مه‌زنتر ژ راده‌یێ وێ یێ راسته‌قینه‌ لبه‌رچاڤ وه‌ردگریت و ب گۆتنه‌كا دى، هه‌موو تشت د هزرا زاڕۆیاندا مه‌زن بووینه‌، ب ڤێ چه‌ندێ دایكوباب ژى دڤێت بوانن كو د ڤى ژى دا، زاڕۆیان گه‌له‌ك نه‌ئێشینن و ده‌ستخۆشیێ لێ نه‌كه‌ن چونكه‌ گه‌له‌ك یا زیانبه‌خشه‌.
چه‌وا رێڤه‌به‌ریا داخوازكرنا لێبۆرینێ بكه‌ین
بێ كو نه‌چارییه‌ك د كارى دا بیت، زاڕۆیێ خۆ فێرى داخوازكرنا لێبۆرینێ بكه‌ن. د ئه‌نجامدا ب ڤێ كریارا ب پشته‌ڤانیێ، زاڕۆیێ هه‌وه‌ ب ڤیان به‌رانبه‌ر كارێ خۆ یێ شاش دێ داخوازا لێبۆرینێ كه‌ت. ل ڤێره‌ دێ چه‌ند رێكاران بۆ رێخۆشكرنا زاڕۆیان ب داخوازكرنا لێبۆرینێ دیار كه‌ین.
1- زاڕۆیێ خۆ فێربكه‌ن كو چاوا داخوازا لێبۆرینێ بكه‌ت
ل شوونا ڤێ چه‌ندێ كو بێژنێ داخوازا لێبۆرینێ بكه‌ت، وى فێربكه‌ن كو چاوا و ل چ ده‌م دڤێت ڤى كارى ئه‌نجامبده‌ت. رۆله‌كى وه‌ك نموونه‌ بۆ بگێرن و وى فێرى شێوه‌یێ داخوازكرنا لێبۆرینێ بكه‌ن. بێژنه‌ وى كو داخوازكرنا لێبۆرینێ، ب ڤێ واتایێ یه‌ كو ” ئه‌ز بزاڤێ دكه‌م كو ڤى كارى دوباره‌ نه‌كه‌م چونكه‌ من نه‌ڤێت ته‌ توره‌ بكه‌م”
2- وى فێرى چاره‌سه‌ركرنێ بكه‌ن
هاریكارییا زاڕۆیێن خۆ بكه‌ن كو هه‌ستا پوشمانییا خۆ زێده‌تر ژ په‌یڤان ژى دیار بكه‌ت. بۆ نموونه‌ ئه‌گه‌ر ئێك ژ یاریێن برایێ خۆ شكاندییه‌، رێ بده‌نێ ژ پاره‌یێ خۆ مفاى وه‌رگریت و بۆ وى یارییه‌كا نوو بكریت. و یان ژى ئه‌گه‌ر خووشكا خۆ توره‌ كریه‌، بێژنه‌ وى یارییا وێ دڤێت رۆژه‌كێ بده‌ته‌ ده‌ستێ وێ. ئه‌ڤ جۆره‌ چاره‌سه‌ركرنه‌، زاڕۆیى فێردكه‌ت كو چاوا دڤێت به‌رپرسیارییا ره‌فتارێن خۆ وه‌رگریت.
3- ده‌رباره‌ى هه‌ستێن وى كه‌سێ كو توره‌ بوویى دگه‌ل باخڤن
ده‌مێ كو ئه‌و ئارام بوو، ده‌رباره‌ى ڤێ چه‌ندێ كو چاوا ره‌فتارا وى كارتێكرنێ ل سه‌ر كه‌سێن دى دكه‌تـ دگه‌ل وى باخڤن. گۆتارخواندنێ دانه‌ لایه‌كى و ل شوونا وێ، هنده‌ك پرسیاران ژێ بكه‌ن و بزانن كو ئایا دشێت دیار بكه‌ت كو چاوا ره‌فتارا وى كه‌سێن دى توره‌ دكه‌ت و وان دئێشینیت.
4- ستراتیژیێن جهگر بكار بینن
ده‌مێ كو زاڕۆیێ هه‌وه‌ كه‌سه‌كێ دى ئازار دایه‌ یان توره‌ كریه‌ (ب گۆتن یان جه‌سته‌یى)، وى فێربكه‌ن كو جارا بهێت چاوا دڤێت ب جۆره‌كێ دى ره‌فتارێ بكه‌ت. ب ڤێ رێ جارێن بهێت دێ شێت ره‌فتارێن خۆ باشتر كونترۆلبكه‌ت. گێرانا رۆلى هاریكارییا زاڕۆیێ هه‌وه‌ دگه‌ت كو رێكێن جهگر بۆ هه‌بوونا ره‌فتارێن باشتر ل ئاینده‌یى دا فێر ببیت.
ژێده‌ر: ninisite.com

بابه‌تێن ب ڤێ مژارێ ڤه‌ گرێدای