ئه‌رێ‌ خوه‌نیشاندان ده‌رمانێ‌ ده‌ردێ‌ كوردانن؟

غیاس خالد زێباری 

ل وه‌لاتێن دیمۆكراسی و جڤاكێن ره‌وشه‌نبیر، خوه‌نیشاندان تشته‌كێ‌ نۆرماله‌ و مافه‌كێ‌ سرۆشتیێ‌ وه‌لاتیانه‌ بۆ گه‌هاندنا ده‌نگێ‌ خوه‌ و دیاركرنا داخوازیێن خوه‌ بۆ ده‌ستهه‌لاتێ‌ و بۆچوونا خوه‌ لسه‌ر پرسێن نه‌ته‌وه‌یی و سیاسی و جڤاكی و كارگێری، ئانكو وه‌ختێ وه‌لاتی خوه‌نیشاندانان دكه‌ن، ئه‌و خوه‌نیشاندان دبنه‌ گڤاشتنه‌ك لسه‌ر ده‌ستهه‌لاتێ‌ و فاكته‌رێ‌ بجهئینانا ماف و داخوازیێن خوه‌نیشانده‌ران، لێ ئه‌گه‌ر ره‌وا و یاسایی بن.
خوه‌نیشاندانان هنده‌ك پرنسیپ و دسپلین هه‌نه‌، ژ وان ژى؛ خوه‌نیشاندان ئاشتیانه‌ بن و كارتێكرنێن نیگه‌تیڤ لسه‌ر سه‌روه‌ت و سامانێ‌ گشتی و تایبه‌ت نه‌كه‌ت و نه‌بنه‌ ئه‌گه‌رێ‌ تێكدانا ره‌وشا ئێمناهییا وه‌لاتی و وه‌لاتیان، ئه‌ڤ پرنسیپ و دسپلینه‌ ل وه‌لاته‌كى بۆ وه‌لاته‌كی جوداهی هه‌نه‌.

نهۆ ل هنده‌ك باژێر و باژاركێن هه‌رێما كوردستانێ‌، هنده‌ك كه‌سان ده‌ست ب خوه‌نیشاندانان كرییه‌ ب به‌هانه‌یا گیرۆبوونا مۆچه‌یێ‌ فه‌رمانبه‌ران. وه‌ك مه‌ گۆتی خوه‌نیشاندان مافه‌كێ‌ سروشتینه‌، لێ‌ ڤان خوه‌نیشاندانان مه‌به‌ستێن دیتر لپشت هه‌نه‌ و هه‌لگرێن چه‌ندین نیشانێن حیبه‌تیێنه‌..! چونكی ئه‌ڤ خوه‌نیشاندانه‌ پشتی پرسا سه‌رۆكاتییا هه‌رێما كوردستانێ‌ و په‌یدابوونا ناكۆكیان د ناڤبه‌را پارتیێن كوردستانێ‌ و دابه‌شبوونا وان سه‌ر دو به‌ره‌یاندا (پارتی) ژ لایه‌كی و (گۆڕان، یه‌كێتی، یه‌كگرتوو و كۆمه‌ل) ژ لایه‌كێ‌ دیترڤه‌ دیار دبن. ڤان خوه‌نیشاندانان مه‌به‌ستێن سیاسی لپشت هه‌نه‌ و گیرۆبوونا مۆچه‌یی و چاكسازیان كرینه‌ په‌رده‌ نه‌خاسمه‌ بۆ دژایه‌تیكرنا پارتی دیمۆكراتی كوردستان و بجهئینانا مه‌به‌ستێن هنده‌ك لایه‌نێن سیاسی ب تایبه‌تى بزاڤا گۆڕان. ئه‌گه‌ر مه‌به‌ستا وان مۆچه‌ بن، هه‌می كه‌س و لایه‌ن ره‌وشا ئابوورییا هه‌رێما كوردستانێ‌ دزانن كو سه‌ره‌رایی بڕینا مۆچه‌ و بۆدجه‌ی ژ لایێ‌ حوكمه‌تا ئیراقێ‌ بۆ ده‌مێ‌ نێزیكی دو سالان و ئه‌گه‌رێن سه‌ره‌كیێن ڤێ‌ چه‌ندێ‌ ژی ئاشكرانه‌. ئه‌گه‌ر مه‌به‌ست چاكسازی بن، پێدڤیبوو خه‌لكێ‌ سه‌رانسه‌رێ‌ هه‌رێما كوردستانێ‌ به‌ری ده‌هـ پازده‌ سالان د رێكا رێكخراوێن جڤاكێ‌ سڤیل و خوه‌نیشاندانێن ئاشتیانه‌دا كڤاشتن لسه‌ر ده‌ستهه‌لاتێ‌ كربان بۆ كرنا چاكسازیان، ژ لایه‌كێ‌ دی شه‌رێ‌ دژی مه‌زنترین هێزا تیرۆرستییا جیهانی (داعش)ێ كو بوویه‌ ئه‌گه‌ر بارێ‌ هه‌رێما كوردستانێ‌ زۆر گرانتر ببیت.

ئه‌گه‌ر كه‌س دروستییا ره‌وشا ئابوورییا هه‌رێما كوردستانێ‌ نه‌زانیت، پێدڤیبوو خه‌لكێ‌ پایته‌ختێ‌ ره‌وشه‌نبیری خه‌لكه‌كی دیتر لسه‌ر هۆشیاركربا…! و جهێ‌ هندی لسه‌ر گیرۆبوونا مۆچه‌ی خوه‌نیشاندان كربان، بلا خوه‌نیشاندان دژی وان حزب و كه‌س و لایه‌نان خوه‌نیشاندان كربان یێن هه‌تا نهۆ جورئه‌ت نه‌دایه‌ خوه‌ ئێك رۆژ چه‌كی هه‌لبگرن و بچنه‌ به‌رۆكێن شه‌رێ‌ تیرۆرستان بۆ پاراستنا هه‌رێما كوردستانێ‌. ژ لایه‌كێ‌ دی، به‌رده‌وامییا خوه‌نیشاندانان، دێ‌ بیته‌ ئه‌گه‌رێ‌ تێكدانا ره‌وشا ئێمناهییا هه‌رێما كوردستانێ‌ و گه‌ف لسه‌ر پاشه‌رۆژا وێ، چونكی خه‌لكه‌كێ‌ زۆر، دێ ڤان خوه‌نیشاندانان بده‌لیڤه‌ زانن داكو كه‌رب و كینا خوه‌ یا كه‌سی به‌رامبه‌ر هنده‌ك كه‌س و لایه‌نان ده‌ربكه‌ن و كارێن سۆتن و كوشتن و وێرانكرنێ‌ په‌یدا بن و ناكۆكیێن د ناڤبه‌را هه‌ردو به‌ره‌یاندا دێ‌ گوورتر بن، ره‌نگه‌ ژى مه‌به‌ستا هنده‌ك لایه‌نان ئه‌ڤچه‌نده‌ بیت …!.
له‌و دبێژین خوه‌نیشاندان ده‌رمانێ‌ ده‌ردێ‌ خه‌لكێ‌ كوردستانێ‌ نینن. د ڤان كاوداناندا ل جهێ‌ ڤان خوه‌نیشاندانێن تێكده‌رانه‌، پێدڤییه‌ كه‌سانێن ره‌وشه‌نبیر و سازیێن راگه‌هاندنێ‌ ب هزره‌كا دووربین یا نه‌ته‌وه‌یی و نیشتیمانی ڤێ‌ ره‌وشێ‌ بخوونن دوور ژ خوه‌نیشاندانێن به‌رژه‌وه‌ندییا هنده‌ك لایه‌نان و د كه‌نالێن دیتر ڕا كڤاشتنێ‌ لسه‌ر ده‌ستهه‌لاتێ‌ بكه‌ن بۆ زڤراندنا دادوه‌ریێ‌ و هاڤێژتنا گاڤێن پراكتیك بۆ چاكسازیان، داكو ئه‌ڤ داخوازییه‌ تنێ‌ د به‌رژه‌وه‌ندییا گه‌ل و وه‌لاتیدا بن، نه‌ك هنده‌ك لایه‌نێن سیاسی ده‌ستكه‌ڤتان پێ‌ دابین بكه‌ن.

بابه‌تێن ب ڤێ مژارێ ڤه‌ گرێدای