ئاییندەیا رۆژئاڤایێ کوردستانێ د گۆتنەکا سیاسی دا

سه‌عد مه‌لا میكائیل

بھارا عەرەبی پایزا عەرەبی بوو، پرۆژەیا ھەلوەشینا شکۆ و دامالینا گەلەک حکومەت و دەستھەلاتدارێن عەرەبان بوو. وەلێ ئەم دکارن ب بھارا کوردان بناڤ بکەن، دەستکەفتێن ھەرە مەزنین بھارا عەرەبی دروستبوونا دەلیڤەکی بوو بۆ پارچەکی کوردستانێ کو بکارن ب ئاوایەکی فەرمی و دیموکراسیانە ئاڤابکەن. ئەو دەلیڤا بھارا عەرەبی دایە رۆژءاڤایێ کوردستانێ د دیرۆکا ھەرچار پارچێن کوردستانێ ھەڤشێوەیا وێ نەبوویە، بەلێ مخابن پشتی ھەفت سالان ژ شۆرەشا گەلێ سوریێ ئایندەیا کوردێن رۆژئاڤا بەرب وێرانیێ دچیت و چ تیرۆشکێن سەرخوەبوون و ئازادیێ خوەیا نینە.
سیاسەتا شاش و تاکڕەو و بێ گوھدانە کەساتیێن کورد ژ ناڤخوە و پارچێن دن یێن کوردستانێ نەشیان ئاییندەیەکا ژھەژی بۆ رۆژئاڤا ب ئافرینن، وەک خوەیایە سیاسەت خواندنا دەم و تێڕامان و پێشبینیێن بەری رویدانێنە، سیاسیێن ژێھاتی و وێرەک ئەوە دەمی بنیاسیت و خوەدی خواندنا سیاسیا بەروەخت رویبدەن بیت.
بەلێ ب نێرینا مە پەیەدە کو خوە کریە رێڤەبەر ب سەر رۆژئاڤا نەشیا خواندنا دەم و کاودانێن سیاسی بکەت و تنێ پشت ب ھێز و سەربازیەتێ گرێدان و یاریا سیاسی پشتگوە ئاڤێتن، ئەڤەژی پتر ل بن باندۆرتیا پەکەکەێ بوویە، پەکەکە گڤاشتنەکا سەربازیا بھێز کرە سەر و پەیەدە و ھەسەدە، رۆژئاڤا کرە قوربانی ئایدۆلۆژیا خوە، گرنگی ب ھێزا سەربازی دان بێی کو مفای ژ سیاسەتا دبلۆماسی و ئیداری ببینن.
گۆتنەکا پێدڤی و خواندنەکا سیاسی !
نێچیرڤان بارزانی سەرۆکێ جڤاتا وه‌زیرێن ھەرێما کوردستانێ بەریا سێ سالان د پانێلەکی دا ل زانکۆیا ئەمریکی گۆت ( ئەگەر دەستھەلاتا رۆژئاڤایێ کردستانێ خوە ژ سیاسەت و ئایدۆلۆژیا پەکەکێ دەربازنەکەن، تورکیا دێ ڤێ یەکێ کەتە بەھانە دێ ھێرشی رۆژئاڤا کەت). ھەلبەت ئەڤ گۆتنا بارزانی ژ ڤالاتیێ نەھات، بەلکو دویربینی و خواندنا وی بوویە ل سەر رشێوازێ رێڤەبرنا رۆژئاڤا. ھەرچەندە وی دەمی بەرپرسێن تەڤدەمێ ل کەنالێن خوە ئێرشی بارزانی کرن و بەرێز (سالح موسلیم)ی گۆت کو ئاگەھیێن شاش گەھشتنە دەست نێچیرڤان بارزانی و ئەڤ گۆتنا وی ب ئاقارەکا دی یا سیاسی و حزبی دا برن، لێ ئەڤرۆ واقعە کو ئاییندەیا رۆژئاڤا گەلەک تاری و لێلە، وەک دیار پشکەک ژ ئاخا وان ژ لایێ تورکیا ڤە ھاتیە داگیرکرن و ئاییدەیا دەڤەرێن دن و رێڤەبەریا وان ژی نەدیارە.
پەکەکە و تەڤدەمێ رۆژئاڤا کرە قوربانی دروستکرنا ناڤچەیەکی ئارام ژبۆ شۆرەشەکا چەکداریا پارتیزانیا دەم بسەر ڤەچووی کو ب پەرچوو ژی نکاریت ژ باکور و رۆژئاڤا ژی کیانەکی کوردی یێ ئازاد دروست بکەن، باجا وێ فکرێ ژی کورد و کوردستان ددەت.
سەرخمەراتی شێوازێ ئیدارەدانا رۆژئاڤا گەلەک ژ سەرکردەێن کورد ھەولێن خوە دان ژ بۆ سەرراستکرنا سیاسەتا شاش و تاکڕەویا پەیەدێ، ل سەر ھەموویان جەنابێ سەرۆک بارزانی بوو کو ھەلێن جددی دان و شیا ل ٢٢ ئۆکتۆبەرا سالا ٢٠١٤ ل دھۆکێ تەڤ ئالیێن رۆژئاڤا بگەھینە لھەڤکرنەکا نشتیمانی – کوردی، کو ب رێکەفتنا دھۆک ھات ناسکرن. بەلێ مخابن تەڤدەم ل ژێر باندۆرتیا پەکەکێ ئەڤ لھەڤکرن بن پێ کرن و دەست ب سیاسەتا خوە یا تاکڕەو کرەڤە. پشتی وێ ریکەفتنێ ئەز ل ئامەدێ باکورێ کوردستانێ بووم، پشکداری چڤینەکە کوردی بووم کو ھند بەرپرس و ئالیگرێن ھەدەپە کو بالێ سیاسیێپەکەکێ یە ل ور ئامادە بوون، مژارا رۆژئاڤا و یەکنەبوونا کوردا مژارا چڤینێ بوو، بگشتی گۆتنا وان تەنێ دروست کرنا بەھانەیان بوون ل سەر جیھانا دەرڤە و پارتێن کوردی کو نە ژ رەنگێ وان. من ژی پسیارەک ئاراستەی وان کر کو نھاژی ھەر جھێ پرسێیە، ئەرێ بۆچی ھوین قەبوول دکەن عەرەبەک ب جل و بەرگ و عەگالێ خوە پشکداربیت د رێڤەبرنا کانتۆنان و ببیتە جیگر ئان ھەڤسەرۆکا کانتۆنەکی، لێ قەبوول ناکەن برایەکی ھەوەی کورد ژ (ئەنەکەسێ) بھێتە جھێ وی، چما ئەنەکەسە داخوازیا زێدەتر ژ پشکداریێ کریە ؟ بەسڤا وی ھەر ئەڤە بوو کو ئەنەکەسە خائینە، بەلێ ئەو عەرەبێ مافی ناسناما وەلاتیبوونێ ژی پێ ژھەژی نەددیت نەخائینە!لەو ئەڤ ھزر و ئایدۆلۆژیا تو چەند وەلاتپارێز و کوردپەروەر بی لێ ئەگەر ژ فەلسەفە و ئایدۆلۆژیا وان نەبی تو خائینی گەلەک مەترسیدارە!
ئەڤ بویەر و کاودانێن ل رۆژئاڤا و باکور ژی ھەیە نەجھێ رەزامەندیا پرانیا کورد و وەلاتێن ئیقلیمی و نیڤدەولەتیە ژی، وەک خوەیایە ل داوی کارڤەدان ئەمریکا دامەزرێنەرێ پەیوەندیا (پەیەدە – ئەمریکا) بەرێز (جەمیل بایک) خستە لیستا داخوازکریان. ب نێرینا مە زندی کرنا تیرۆرزما پەکەکێ ژلایێ ئەمریکا مینا بزاڤەکی تێ ژبۆ پتر نێزیک بوونا ئەمریکا ل تورکیا و خوە دویری رۆژئاڤا بکەت، دبیت ژی مەرەما ئەمریکا دویرئێخستنا باندۆرا پەکەکێ بیت ل سەر رۆژئاڤا کوردستانێ.
نۆکە ھند گھۆرین کەتیە د سیایەتا پەیەدە و ھەست ب ھند مەترسیان دکەن، لەو بەرێز (ئالدار خەلیل) ھەڤسەرۆکێ دەستەیا جیبەجێکار یا تەڤدەمێ دبێژت کوردان پێتڤی ب بەستنا کۆنگرا نەتەویی ھەیە. ئەڤ ھزرە ل دەف سەرکردێن پەکەکە و تەڤدەمێ ژبۆ بەستنا کۆنگرەی پشتی داخویانیا جێگرێ وەزیری دەرڤە یێ روسیا (میخائیل بۆگدانۆڤ) جددی تر خوەیا دبیت کو گۆت بوو (مافێ کوردانە دەست د دارێتنا دەستورا سوریێ ھەبیت و مافێ وان تێدا جێگیر بیت، بەلێ وی ژی دلگرانیا خوە ئینا زمان دبێژت، مخابن تشتێ د نھا دا دیار کوردێن سوریێ د ناڤ خوە دا پارچەنە، ئەرێ کی نوینەراتیا کوردێن سوریێ دکەت؟ مە دڤێت کورد وەکی شاندەکی پشکدار بیت… لێ مخابن ھەتا نھاژی کورد د ناڤ خوە دا پارچە بوینە و ئێکگرتی نین).
ئەڤە و دوماھیک پەیاما بەرێز سەرۆک بارزانی کو پشتی ئازادکرنا بەرێز (ئاپۆ) بەلاڤکری دبێژت بلا شۆرەشگێرین مە دزیندانا دوژمنان بن نە دگرتیگەھێن لایەنێن کوردی. داخوازا کارێ دەستەجەمعی ژ پارتێن رۆژئاڤا خواست.
نھاژی نەدرەنگە ئەگەر لدویف داخویانیا بارزانی بچن، چونکی ھێشتا پێگەھا سیاسیا رۆژئاڤا د ململانێ و ھەڤرکیێن وەلاتێن جیھانی دا بھێزە و دناڤ ھەڤکێشەیان دامایە و دکارن ب ھەڤرا ئەلندەکا نوی ھەلینن. سەرکردایەتیا سیاسیا کوردی فەرە ب سەر ئاریشە و ناکۆکیێن خوە دەربازببن، کوردستانێ بەرھەڤ بکەن بۆ وان گھۆرینێن کو قرارە ل داھاتیەکا نێزیک رویبدەن ب ئێکگرتنەکا سیاسی ل ھەرچار پارچێن کوردستانێ بەرھەڤ بکەن.

بابه‌تێن ب ڤێ مژارێ ڤه‌ گرێدای