ئاڤاكرنا باوه‌ریێ‌ د په‌یوه‌ندییا هه‌ڤژینیێ دا

ئاڤاكرنا باوه‌ریێ‌ د په‌یوه‌ندییا هه‌ڤژینیێ دا

Capture

وار – دهۆک :

خویایه‌ په‌یوه‌ندییا هه‌ڤژینیێ‌ ئێكه‌ ژ وان په‌یوه‌ندیێن هه‌ره‌ گرنك و كاریگه‌ر د قادا ژیانا مروڤینیێ‌ دا, په‌یوه‌ندیه‌كا هه‌ستیاره‌, له‌و پووته‌دان ب ڤێ ئێكێ‌ كاره‌كه‌ ئالیێن په‌یوه‌ندیدار به‌ره‌ڤ ژیانه‌كا خوه‌ش و به‌خته‌وه‌ر دبه‌ت، هه‌كه‌ر رێچكه‌یا ساخ و دروست بگریت. لێ‌ مخابن نها وه‌كی ئه‌م دبینین د ناڤ جڤاكێ‌ مه‌ دا گه‌له‌ك هه‌ڤژین تووشی نه‌خوشییا كریزا نه‌باوه‌ریێ‌ بووینه‌ و هه‌رده‌م د ژیانه‌كا له‌ق و لوق دانه‌, هه‌تا هنده‌ك جاران تووشی كاره‌ستان دبن، ژ وانا ژێكڤه‌بوون، كو ژ ڤه‌رێژا نه‌باوه‌ریێیه‌‌ مینا دره‌و و خیانه‌ت و سه‌ردابرن و چه‌ند سه‌ده‌مێن دى. ل ڤێرێ ئه‌م ناچینه‌ د ناڤ ڤان خالان دا، ژبه‌ركو بابه‌تێ‌ مه‌ ئاڤاكرنا باوه‌رریێیه‌.
باوه‌ری و راستگۆیی ستوونێن سه‌ره‌كیێن هه‌ر په‌یوه‌ندیه‌كا راست و دروستن، نه‌خاسمه‌ په‌یوه‌ندییا هه‌ڤژینیێ، له‌و په‌یداكرن و ئاڤاكرنا ڤێ‌ باوه‌ریێ‌ پێدڤی ب پێگیریكرنا چه‌ندین ره‌فتارانه‌، ژ وان:
1ــ په‌رده‌لادان لسه‌ر نهێنییان، ئانكو نهێنى نه‌بن و هه‌موو تشته‌ك ب ئاوایه‌كێ رۆن و زه‌لال بن، ژبه‌ركو راستگۆیى بنه‌مایێ‌ ڤێ‌ ئێكێیه‌.
2ــ نه‌زڤرین بۆ ده‌مێن بۆری كو دبنه‌ سه‌ده‌مێن چه‌ند بارودۆخێن نه‌ساخله‌م.
3ــ راوێژكرن د هه‌ر بیاڤه‌كێ ژیانێ دا، خوه‌ هه‌كه‌ر ژ بسپۆرییا لایه‌نه‌كی ژ وان نه‌بیت.
4ــ پووته‌دان و رێزگرتنا هه‌ڤپشك و نه‌شكاندنا ئێكدو.
5ــ پشكداریكرن د خوه‌شی و نه‌خوه‌شیێن ئیكدو دا د هه‌ كاره‌كی دا.
6ــ پێكڤه‌ په‌یوه‌نددیكرن دگه‌ل وان كه‌سێن ل ده‌وروبه‌رێن وان.
7ــ خوه‌دووركرن ژ په‌یڤا ئه‌ز یان تو و تاك سه‌ریده‌ریكرن، به‌لكو هه‌ر چاوا بیت، دڤێت ئاراسته‌یێ‌ ئه‌م ئه‌مانێ‌ بیت.
8ــ گوهــ لێكگرتن و لێكبۆرین و نه‌دانه‌ پالا توهمه‌تان ب ئێكدو ڤه‌ د هه‌ر كاودانه‌كی دا.
9ــ گراننه‌كرنا بارێ ئێكدو، نه‌خاسمه‌ زه‌لام ب هێجه‌تا وێ‌ ئێكێ‌ كو به‌رپرسێ‌ ئیكێیه‌، به‌لكو پێكڤه‌ كاربكه‌ن و بارێ ئێكدو سڤكبكه‌ن.
10ــ نه‌كێمكرنا ئێكدو و هاندانا دو ئالى بۆ پتر ده‌ستڤه‌ئینانا ده‌ستكه‌ڤتێن ژیانێ،‌ نه‌خاسمه‌ به‌خته‌وه‌ریێ.
له‌و دبێژین ئه‌ڤ چه‌نده‌ دڤێت لسه‌ر بنیاته‌كێ‌ ساخله‌م بهێته‌ ئاڤاكرن، نه‌كو هه‌ر رازیكرن بیت ب رێیێن خاپاندن و سه‌ردابرنا هه‌ردو ئالییان ب هه‌ر به‌هایه‌كی بیت بێی هزر د ئه‌نجام و پاشه‌رۆژا ڤێ‌ ئێكێ دا‌ بهێته‌كرن كو هه‌ر په‌شیمانی حه‌سره‌تكێشانه‌ و دبیته‌ سه‌ده‌ما وێ‌ ئێكێ رێیا باوه‌ریێ‌ بهێته‌گرتن و تووشی ئاڕێشه‌ و لێپرسینا ببن كو ئه‌ڤه‌ ژی زه‌نگه‌كا خه‌ته‌ره‌.

بابه‌تێن ب ڤێ مژارێ ڤه‌ گرێدای