ئاڕێشه‌یێن بچووك كێشه‌یێن مه‌زن ژێ‌ په‌یدادبن

ئاڕێشه‌یێن بچووك كێشه‌یێن مه‌زن ژێ‌ په‌یدادبن

وار – دهۆک :

ژیانا هه‌ڤژینیێ‌ هه‌رده‌م نه‌ به‌هشته‌ و هه‌روه‌سا نه‌ دوژه‌هه‌ ژی، به‌لكو تێگه‌هشتن و ئێك دیتن بۆ هه‌ر كێشه‌یه‌كێ‌ و چاره‌كرنا وێ‌ به‌ری ببیته‌ ئاڕێشه‌، پتر ژیانا هه‌ڤژینیێ‌ ددومینت، هه‌روه‌سا هزرا پێكئینانا ژیانا هه‌ڤژینیێ‌ بێی تێگه‌هشتن و هه‌ڤنیاسین و د ئێكه‌م ئاڕێشه‌یا دكه‌ڤیته‌ د ژیانا وان دا هزرا ژێكڤه‌بوونێ‌ دكه‌ن، بیێ‌ كو بزانن ژیانا هه‌ڤژینیێ‌ پێدڤی ب ده‌لیڤه‌یێن لێبۆرینێ‌ هه‌یه‌ و هه‌روه‌سا پێدڤی ب سالێن درێژه‌ كو هه‌ر ئێك ل زه‌وق و شێواز و ره‌فتارێن یێ‌ دی شاره‌زا ببت، داكو په‌یوه‌ندییا وان موكم بت و لسه‌ر بنامه‌یه‌كێ‌ تێگه‌هشتنێ‌ مالا وان بمینته‌ ئاڤا. هه‌كه‌ر د ناڤا چیرۆك و سه‌ربۆرێن هه‌ڤژینینیا سه‌ركه‌ڤتی دا ده‌ربازبن، دێ بینن یێن د ناڤ گه‌له‌ك كاودانێن جودا دا ده‌ربازبین و ل داویێ‌ ژی هه‌ر سه‌ربۆره‌ك ژ كه‌سه‌ك بۆ كه‌سه‌كێ دی یا جودایه‌، لێ‌ هه‌كه‌ر گرێ‌ و ئالۆزی د ناڤبه‌را هه‌ڤژینان دا نه‌مان و ده‌رگه‌هێن دانوستاندنێ‌ دڤه‌كری بن، دێ‌ ژیانا وان ژی یا به‌رده‌وام بت، هه‌روه‌سا رۆتینێ‌ لسه‌ر فێری بووین بهێته‌ گوهۆڕین و هه‌ر ئێك ژ وان رێزێ‌ ل دیتن و بۆچۆنا یێ‌ به‌رانبه‌ر بگرت، دێ‌ ژ ئاڕێشه‌ و نه‌خوه‌شییان دووركه‌ڤن، ل ڤێ‌ داویێ‌ رێژه‌یا به‌ردانێ‌ به‌ره‌ڤ زێده‌بوونێ‌ ڤه‌ دچت، د گه‌له‌ك ره‌وشان دا هه‌ر ژ ده‌ستپێكا په‌یوه‌ندییا وان نه‌تێگه‌هشتن په‌یدا دبت و ل داویێ‌ دگه‌هیته‌ وی‌ رادده‌ی‌ كو ژیانا وان دكه‌ڤیته‌ به‌ر گه‌فێن ژێكڤه‌بوونێ‌، چیرۆكا ڤێ‌ چارێ‌ ژی قوربانیێن وێ دو گه‌نجن كو ب حه‌زا خوه‌ ژیانا هه‌ڤژینیێ‌ پێكنه‌ئینایه‌، به‌لكو ب ریێا خێزانێن وان بوو، هه‌ر ژ ده‌ستپێكێ‌ گرێیه‌كا ده‌روونێ‌ لنك ژنێ‌ هه‌بوو، ژبه‌ركو ئێك ژ مه‌رجێن وێ‌ ئه‌و بوو ژ ده‌ستپێكێ دڤێت دگه‌ل خێزانا هه‌ڤژینێ‌ خوه‌ نه‌ژیت و ماله‌كا جودا دڤێت. لدووڤ حه‌زا وێ‌ هه‌ڤژینی‌ شوقه‌ك بۆ كرێ كر و هه‌ر تشته‌كێ‌ پێدڤی بۆ ئینا و ماله‌كا لدووڤ حه‌زا وێ‌ بۆ دورستكر, شه‌هیانا خوه‌ كرن بیێ‌ ئاڕێشه‌ و هه‌موو تشت ب دورستی برێڤه‌چوون، لێ‌ هه‌ر ژ ده‌ستپێكێ‌ و به‌ری مه‌هه‌ك ب سه‌ر شه‌هیانا وان ڤه‌ ببورت، ئاڕێشه‌ د ناڤبه‌را وان دا په‌یدابوون، ئاڕێشه‌ ژی ژ ئه‌نجامێ هندێ‌ بوو كو هنده‌ك مرۆڤێن زاڤای دڤیا ژ باژاڕه‌كی دوور بهێن پیرۆزباهییا وی بكه‌ن و ژبه‌ركو رێ‌ یا دوور بوو هه‌ڤژینی داخواز ژ وان كر بۆ نڤستنێ‌ ل مالا وی بمینن، ‌ڤی تشتی ژی بارگرانییه‌ ئێخسته‌ سه‌ر ده‌روونێ‌ ژنێ و ب دلێ‌ وێ‌ نه‌بوو، ب چو ره‌نگان رازی نه‌بوو میهڤان ب شه‌ڤ ل مالا وێ‌ بمینن و ب جره‌ چۆ دگه‌ل هه‌ڤژینێ‌ خوه‌ و مێهڤانێن وی ژی هه‌ست ب هندێ كر و ب دلێ‌ وێ‌ نینه‌، له‌و داخواز ژ وان كر كو ده‌لیڤه‌یێ‌ بده‌نی بچنه‌ ئۆتێله‌كێ هه‌تا رۆژا دی ڤه‌دگه‌رنه‌ مالا خوه‌، ڤێ‌ ره‌فتارێ‌ ژ لایێ‌ هه‌ڤژینێ‌ ڤه‌ گه‌له‌ك تۆڕه‌یی بۆ زه‌لامی چێكرن، ژ بلی شه‌رمێ‌ و هه‌ستكرن ب كێماسیێ‌ ژی لنك وی په‌یدابوو، له‌و نه‌چاربوو ب هه‌ر رێیه‌كێ‌ میڤانیێن خوه‌ ببته‌ مالباتا خوه‌ و ژ كه‌ربان دا پشتا خوه‌ دا هه‌ڤژینا خوه‌ و پتر ژ سێ‌ حه‌فتییان ل مالا بابێ خوه‌ ما بیێ‌ به‌رسڤا ته‌له‌فونێن وێ‌ ژی بده‌ت، د ڤێ هه‌یامێ دا زه‌لامی گه‌له‌ك هزرێن خوه‌ كرن، بۆ دیاربوو هه‌كه‌ر د ئاڕێشه‌كا ب ڤی ره‌نگی دا نه‌شیا چو چاره‌یان بینت و هه‌ڤژینا خوه‌ رازی كه‌ت كو رێزێ‌ ل وی و میهڤانێن وی بگرت، د پاشه‌ڕۆژێ‌ دا دبت بكه‌ڤیته‌ د ئاڕێشه‌یێن مه‌زنتر دا و دێ‌ پێدڤی ب هاریكارییا هه‌ڤژینا خوه‌ هه‌بیت ده‌مێ‌ یا به‌رهه‌ڤ نه‌بیت هاریكارییا وی بكه‌ت، ئه‌و ژی یێ‌ به‌رهه‌ڤ نینه‌ ژیانا خوه‌ ب ڤی شێوه‌ی دگه‌ل وێ‌ ببۆرینت، له‌و ئێكه‌م بریاڕ هاتییه‌ دان داخازا به‌ردانێ‌ بوو، مه‌ وه‌ك رێڤه‌به‌رییا به‌رهنگارییا توندوتیژیێ‌ گه‌له‌ك هه‌ولدان هاریكارییا وان بكه‌ین پشتی ژنێ‌ داخوازا هاریكارییا مه‌ كری، لێ‌ زه‌لام یێ‌ رژدبوو كو به‌ردان پاشترین چاره‌یه‌ بۆ ئاڕێشه‌یا وان و به‌رهه‌ڤ نینه‌ ل هه‌ڤژینا خوه‌ ببۆرت پشتی ئێخستیه‌ د هه‌لوه‌سته‌كێ‌ شه‌رمین دا ل همبه‌ر مێڤانیێن وی، هه‌روه‌سا ژن ژی یا رژدبوو كو دڤێت ئاخڤتنا وێ‌ د مالێ دا برێڤه‌ بچت و نابت چو تشتان لسه‌ر بسه‌پینت. ب ڤی ئاوای پێكڤه‌ژیان د ناڤبه‌را وان دا تشته‌كی ب زه‌حمه‌ت بوو، له‌و مه‌ هاریكارییا وان كر و ژێكڤه‌بوون و هه‌ر ئێك چۆ سه‌ر ئاڤ و رزقێن خوه‌. ب ڤی شێوه‌ی چیرۆكا وان ب داوی هات، هێشتا ژیێ‌ وێ‌ نه‌بوویه‌ مه‌هه‌ك، ئانكو جاران ئاڕێشه‌یێن بچووك ژی كێشه‌یێن مه‌زن په‌یدادكه‌ن و سه‌ده‌م ژی ركۆیێ‌ و بڕیارێن شاشن.

بابه‌تێن ب ڤێ مژارێ ڤه‌ گرێدای