ئاوایێن بكارئینانا ژنێ وه‌كو كه‌رسته‌یێن بازرگانی دگه‌ل سه‌رده‌مى زێده‌بووینه‌

ئاوایێن بكارئینانا ژنێ وه‌كو كه‌رسته‌یێن بازرگانی دگه‌ل سه‌رده‌مى زێده‌بووینه‌

Capture

وار – بێوار زێباری :

دگه‌ل هه‌ر پێشكه‌ڤتنه‌كێ، ئاوایه‌كێ‌ نوو یێ‌ فرۆتنا ژنان به‌رچاڤ دبیت و رێڤه‌به‌رییا به‌رهنگاربوونا توندوتیژیێ دبێژیت؛ دڤێت ئه‌و كچ بچیته‌ دادگه‌هێ‌ بۆ تۆماركرنا سكالایه‌كێ‌، داكو مافێ‌ وێ‌ به‌رزه‌نه‌بیت لدۆر ڤى بابه‌تى، مه‌ ئه‌ڤ راپۆرته‌ به‌رهه‌ڤكر.
كچه‌ك ب ناڤێ هێرۆ سه‌ید كاكه‌ دبێژیت: ”بێگومان ژن ستوونه‌كا سه‌ره‌كییه‌ بۆ بۆ ئاڤاكرنا خێزان‌ و جڤاكى, له‌و دڤێت رێز ل هه‌ستێن وێ‌ بهێته‌گرتن, ژبه‌ركو ئه‌ركه‌كێ‌ مه‌زن سه‌ر ملێن وانه‌، چو ل ناڤ مالێ بیت یان ژده‌رڤه‌ى مالێ و دبیت مافێن وان هاتبنه‌ ژناڤبرن و چه‌ندین سه‌ده‌م ژی بۆ ڤێ ئێكێ هه‌نه‌ وه‌كو دابونه‌ریت و ئاستێ‌ په‌یوه‌ندییا د ناڤبه‌را خێزانێ‌ دا و جڤاكى ب گشتی و یا عه‌شیره‌تێ‌ ب تایبه‌تی و بارێ‌ ئابووری و ئاستێ‌ ره‌وشه‌نبیری و خوانده‌ڤانیێ و بۆ چاره‌سه‌ركرنا ڤان ئاڕێشه‌یان، دڤێت جڤاكێ‌ مه‌ دووڤچوونێ‌ بۆ بكه‌ت و ڤه‌كولینێن زانستی ل هه‌ر ده‌ڤه‌ره‌كێ‌ بهێنه‌كرن و سمینار ژی بهێنه‌ گێران و مفا لێ‌ بهێنه‌ وه‌رگرتن و دڤێت كه‌سێن شاره‌زایێ‌ جڤاكی یان هه‌ر جهه‌كێ‌ په‌یوه‌ندیدار رۆلێ‌ خوه‌ ببینین، دا ئه‌ڤ ژنه‌ ژ ڤان كاودانێن نها دروستدبن بهێنه‌ پاراستن و نه‌بنه‌ قوربانێ‌ وان ئاڕێشه‌یان”. مامۆستا مه‌حموود باشقالی گۆت: ”ئه‌ڤه‌ ژ ئه‌نجامێ‌ وێ‌ چه‌ندێیه‌ كو هه‌تا نوكه‌ د جڤاكێ‌ مه‌ دا هنده‌ك كه‌س ژنێ وه‌كو مروڤ نابینن، به‌لكو وه‌كو كه‌رسته‌یه‌كى دهێته‌ فرۆتن و ‌گوهارتن. ئه‌ڤه‌ ژى تشته‌كێ گه‌له‌ك خرابه‌ و پێدڤییه‌ ب رێیا رێكخراوێن تایبه‌تمه‌ند ئه‌ڤ نه‌ریته‌ ژناڤبچیت و ب رێیا گۆتارا ئاینی ژى پێدڤیه‌ داكۆكى لسه‌ر ڤێ‌ خالێ بهێته‌كرن، ژبه‌ركو ژئالیێ ئاینی ژى ڤه‌ تشته‌كێ گونه‌هه‌”.
ناڤهاتى گۆتژى، ”پێدڤییه‌ پێرابوونێن قانوونى ل همبه‌رى وان مه‌لایان هه‌بن كو ژده‌رڤه‌ی دادگه‌هێ‌ ژنان ماره‌دكه‌ن”.
وه‌لاتییه‌ك ب ناڤێ كرمانجێ‌ چالی ژى دبێژیت: ”پشتی سه‌رچوونا چاخێ‌ كه‌ڤرین و سه‌رهه‌لدانا زه‌لامسالاریێ‌، ژن وه‌ك ئامرازه‌ك بۆ حه‌ز و هه‌ستان بكارهاتییه‌ و ب گه‌شه‌كرنا ژیانێ‌ ژی ئاوایێن بنده‌ستكرنا ژنێ‌ و خاپاندنا وان ژی جۆر ب جۆرن، میناك ل وه‌لاتیێن پێشكه‌ڤتی ژنڤرۆشى وه‌ك ئه‌ڤا كو ل جیهانا سێیه‌م و پاشكه‌ڤتی نینه‌، لێ‌ لاشێ‌ ژنێ‌ وه‌ك كه‌رسته‌یه‌كێ بازرگانی دهێته‌ دیتن، بۆ میناك رێكلامێن بازرگانی، هه‌روه‌ك د كه‌لتوورێ‌ كورده‌واری ژی دا، بنده‌ستێ‌ یا ژنێ‌ و زه‌لامسالاریێ ره‌نگێن جودا ب خوه‌ڤه‌ دگرتن، وه‌ك وه‌رگرتنا نه‌ختی و شیر بهایێ فرۆتنا ژنێ‌ بوویه‌، یان ژی ل ئه‌نجامێ‌ كێشه‌یێن جڤاكی و ل بێ‌ پاره‌یى و هه‌ژاریێ،‌ شوودانا كچان ل شوونا خوینداریێ‌ بوو. لێ‌ نها ره‌نگه‌كێ‌ دى یێ‌ ب ترس داكه‌ڤتییه‌ ناڤ جڤاكێ كورده‌وارى، ئه‌و ژی ل ئه‌نجامێ‌ شكه‌ستنا بازرگانیێ‌ یان قه‌رداربوون و نه‌بوونا شیانێن دانا قه‌رزان، ژن بوویه‌ڤ ئامرازێ‌ لادانا وێ‌ شكه‌ستنا ئابووری یان ژی قه‌رزداریێ‌ و ب دیتنا من ئه‌ڤ دیارده‌یه‌ به‌ربه‌لاڤ نه‌بوویه‌، لێ دڤێت رێكخراو به‌ره‌ڤانیێ‌ ل ژنان بكه‌ن”.
مه‌حه‌مه‌د ئه‌مین رێڤه‌به‌رێ‌ به‌رهنگاربوونا توندوتیژییا ژنان ل ئاكرێ‌ دبێژیت: ”ده‌ما ئه‌ڤ ئاڕێشه‌یێن هۆسا دروست دبن، ناهێنه‌ دادگه‌هێ‌ و ژن سكلایان تۆمارنه‌كه‌ن، له‌و ژى ئه‌ڤ ئاڕێشه‌یه‌ دیار نینن، ئانكو ب تنێ هاتینه‌ ئازراندن و هه‌ر كه‌سه‌ك مه‌ لدۆر ڤان ئاڕێشه‌یان ئاگه‌هدار بكه‌ت، دڤێت به‌لگه‌ ژى هه‌بن”.
ناڤهاتى ئه‌و ئێكه‌ ژى گۆت: ”ده‌ما ئه‌ڤ ئاڕێشه‌ چێدبن، هنده‌ك بنه‌مال د ناڤ خوه‌ دا چاره‌دكه‌ن، داكو بد ناڤ خه‌لكی دا به‌لاڤنه‌بن و ئه‌م وه‌كو رێڤه‌به‌ییا به‌رهنگاربوونا توندوتیژیێ‌ به‌رده‌وام دووڤچوونان دكه‌ین، لێ ئه‌ڤ ئاڕێشه‌ ناهێنه‌ ده‌ف مه‌، لێ هه‌ر چه‌وا بیت ئه‌م دێ‌ به‌رده‌وامیێ‌ ده‌ینه‌ كارێ خوه‌ كو ئه‌ڤ ئاڕێشه‌ به‌ره‌ڤ نه‌مانێ بچن، لێ دڤێت ژن ب خوه‌ بهێته‌ دادگه‌هێ‌ و سكالایێ‌ تۆماربكه‌ت”.

بابه‌تێن ب ڤێ مژارێ ڤه‌ گرێدای